Педагогі нашай установы выхоўваюць дзяцей на аснове нацыянальных, духоўна-маральных і патрыятычных традыцый. Работа з дашкольнікамі будуецца паслядоўна: ад больш блізкага і знаёмага (сям’я, дзіцячы сад, мікрараён) да больш складанага (горад, краіна).
У рабоце па фарміраванні ў дзяцей вобраза малой радзімы ўлічваю іх узроставыя асаблівасці, аддаючы перавагу тэмам “Сям’я”, “Праца людзей”, “Традыцыі”, “Грамадскія падзеі”, “Прырода”, “Свет жывёл” і інш. Знаёмлю выхаванцаў з традыцыямі народа і роднага горада (дзень горада, “Баранавіцкая вясна”, свята Перамогі), вядомымі памятнымі мясцінамі і славутымі аб’ектамі Баранавіч (сквер памяці воінаў-інтэрнацыяналістаў, помнік вязням Баранавіцкага гета, помнік Вызвалення, музей чыгункі, парк жывёл, помнік вераб’ю і інш.), знакамітымі людзьмі, у гонар якіх названы вуліцы і скверы горада (У.Карват — першы Герой Беларусі, А.Марфіцкі і А.Жураўлевіч — летчыкі-героі, Ганна і Марыя Шчэрба — славутыя спартсменкі і інш.)
Знаёмства дашкольнікаў з родным горадам — працэс працяглы і не можа праходзіць ад выпадку да выпадку. Так, для фарміравання ў дзяцей уяўленняў пра Баранавічы арганізоўваю назіранні, экскурсіі і мэтавыя прагулкі, для паглыблення і сістэматызацыі атрыманых ведаў — гутаркі і дыдактычныя гульні, для фарміравання станоўчых адносін да з’яў грамадскага жыцця — творчыя гутаркі і зносіны, тэматычныя заняткі, выставы выяўленчай творчасці.
Падчас шматлікіх прагулак дзеці разглядаюць і абмяркоўваюць убачаныя будынкі: вялікія/маленькія, для чаго прызначаны. Акцэнтую ўвагу на асаблівасцях архітэктуры. Свае ўражанні дашкольнікі адлюстроўваюць у малюнках на тэму “Мая вуліца”, канструяванні на тэму “Дамы на маёй вуліцы”, аплікацыі на тэму “Мой дзіцячы сад” і інш. Разам з гэтымі паняццямі дзеці знаёмяцца са значэннем слоў “горад” і “малая радзіма”.
Уяўленні пра малую радзіму фарміруюцца на тэматычных занятках “Мая малая радзіма” і “Мы па вуліцы ідзём”, на якіх выхаванцы вывучаюць назвы гарадскіх вуліц, запамінаюць, дзе жывуць. Цікавасць да гераічнага мінулага роднага горада і краіны ў цэлым выклікае знаёмства з вуліцамі, названымі ў гонар герояў Вялікай Айчыннай вайны: І.Андрэева, А.Валошына, А.Нікіціна, М.Сцепанішчава і інш. Не пакідаю па-за ўвагай і вуліцу, дзе знаходзіцца дашкольная ўстанова, — імя З.Касмадзям’янскай.
Разглядаючы ілюстрацыі з сімваламі Баранавіч, дзеці знаёмяцца з іх значэннем, гісторыяй узнікнення горада. Набытыя веды замацоўваюцца ў сюжэтна-ролевых гульнях і гульнях-падарожжах “Падарожжа па родным горадзе”, “Магазін” і “Пошта”. Асабліва падабаецца дашкольнікам сюжэтна-ролевая гульня “Кафэ здаровага харчавання”. Знаёмячыся з аб’ектамі гарадской інфраструктуры, дзеці пашыраюць і паглыбляюць веды пра малую радзіму.
Улічваючы ўзроставыя асаблівасці выхаванцаў, шырока прымяняю гульнявыя прыёмы, якія павышаюць пазнавальную актыўнасць дзяцей, ствараюць спрыяльную эмацыянальную атмасферу заняткаў. Так, вялікую цікавасць у дзяцей выклікаюць гульні “Паездкі і вандроўкі”, “Можна — нельга”, “Я — твая частка”. Падчас гульняў “Падарожжа па горадзе” і “Складзі карцінку” дашкольнікі расказваюць пра славутасці горада, што дазваляе сістэматызаваць атрыманыя веды і заахвоціць да набыцця новых.
Арганізоўваю гутаркі “Мой горад” і “Славутасці горада”, падчас якіх дзеці вырашаюць праблемныя сітуацыі, складаюць вершы-сінквейны.
Не забываю, што Радзіма — гэта і лес, і поле, і рэкі, і жывёлы, якія жывуць там. Тэматычныя заняткі “Прырода роднага краю” знаёмяць дзяцей з прыроднай разнастайнасцю роднага краю, вучаць бачыць яго прыгажосць, фарміруюць эмацыянальную чуллівасць, беражлівыя адносіны да навакольнага свету.
Вялікую ўвагу ўдзяляю ўзаемадзеянню з бацькамі. Іх станоўчы прыклад адыгрывае важную ролю ў выхаванні любові да Радзімы.
Алена КАРЖАНЕЎСКАЯ,
выхавальніца ясляў-сада № 43 Баранавіч.
