Міністр адукацыі Андрэй Іванец азнаёміўся з навучальным працэсам у Беларускім дзяржаўным медыцынскім універсітэце. Падрабязнасці – у матэрыяле карэспандэнта “Настаўніцкай газеты”.
Разам з рэктарам БДМУ Сяргеем Рубніковічам кіраўнік Міністэрства адукацыі пабываў у розных аўдыторыях сімуляцыйна-атэстацыйнага цэнтра, які абсталяваны робатамі і трэнажорамі апошняга пакалення, убачыў, як студэнты-медыкі на практычных занятках вывучаюць і адпрацоўваюць складаныя клінічныя выпадкі.
Міністр адзначыў, што пасля нарады ў кіраўніка дзяржавы, якая ў першую чаргу тычылася павышэння якасці вышэйшай адукацыі і ў цэлым правядзення поўнай рэвізіі стану нацыянальнай вышэйшай школы, вельмі важна прыйсці ва ўніверсітэты, да калектываў і яшчэ раз свежым вокам паглядзець на тыя праблемныя пытанні, якія агучыў Прэзідэнт:
— Прыйшоўшы ў Беларускі дзяржаўны медыцынскі ўніверсітэт, было вельмі важна не проста азнаёміцца з матэрыяльна-тэхнічнай базай, а пагутарыць з выкладчыкамі, студэнтамі, даведацца іх меркаванне аб новых адукацыйных тэхналогіях, якія актыўна ўкараняюцца ва ўніверсітэтах. У прыватнасці, для медыцынскай адукацыі гэта стварэнне сімуляцыйных цэнтраў, выкарыстанне інфармацыйна-камунікацыйных тэхналогій пры навучанні. Азнаёміўшыся з матэрыяльна-тэхнічнай базай, хочацца сказаць, што для будучых медыкаў створаны ідэальныя ўмовы, таму што навучанне праходзіць у малых групах, відаць, наколькі індывідуальна выкладчык можа працаваць з кожным студэнтам. Важна пры ўкараненні тэхналагічных навін захаваць і тыя лепшыя напрацоўкі, якія выкарыстоўваліся дзесяцігоддзямі савецкай сістэмай адукацыі. Пры гэтым трэба глядзець наперад, бачыць перспектыву і ацэньваць, наколькі сістэма адукацыі сёння адпавядае тым патрабаванням па падрыхтоўцы кваліфікаваных спецыялістаў, якія вылучае заўтрашні дзень.
Размаўляючы з міністрам, педагогі і студэнты высока ацанілі магчымасці сучасных адукацыйных тэхналогій, якія апошнія гады актыўна ўкараняюцца ў навучальны працэс. Студэнты 2—3 курсаў упэўнены, што, дзякуючы заняткам у цэнтры, увайсці ў прафесію ім будзе нашмат лягчэй. У медыцыне няма дробязей, а ўрачэбная памылка можа каштаваць жыцця. Каб іх не дапускаць, патрэбна добрая практыка, якую якраз забяспечвае сімуляцыйны цэнтр.
Студэнтам падабаецца займацца тут і асвойваць медыцынскія маніпуляцыі рознага ўзроўню складанасці. Кожны можа прапрацаваць на справе ўсё тое, што вывучаецца ў тэорыі на лекцыях.
Таксама Андрэй Іванец сустрэўся з рэктаратам, дэканамі, членамі студэнцкага прафсаюза, самакіравання і навуковай супольнасці, універсітэцкім актывам БРСМ.
— Калі мы гаворым аб прадастаўленні маладому спецыялісту першага працоўнага месца, то павінны разумець, якія ўмовы створаны для яго прафесійнага росту. Ён павінен мець такія ўмовы, каб, з аднаго боку, стаць прафесіяналам, а з другога — бесперапынна павышаць кваліфікацыю. Пасля гэтага прыйдзе ўсё астатняе — адпаведны кар’ерны рост і неабходныя матэрыяльныя даброты. Кожны малады чалавек павінен разумець, якія ўмовы для яго стварае дзяржава. Гэта трэба не толькі цаніць, але і ўсведамляць, што краіна чакае аддачы ад маладых спецыялістаў, якія прыйдуць і будуць працаваць у сваёй галіне для дзяржавы. Трэба станавіцца сапраўднымі прафесіяналамі і разумець, наколькі яны важныя для краіны, — падзяліўся Андрэй Іванец.
Гаворачы аб выкліках сучаснасці, якія патрабуюць падрыхтоўкі кваліфікаваных спецыялістаў на перспектыву, міністр заўважыў, што адукацыйнае ведамства на працягу апошніх гадоў праводзіць вялікую сістэмную работу, аптымізуючы структуру падрыхтоўкі спецыялістаў. На ўзроўні вышэйшай адукацыі, згодна з патрабаваннямі часу, на працягу апошніх трох гадоў павялічаны набор на медыцынскія і педагагічныя спецыяльнасці, на досыць высокім узроўні падтрымліваецца набор на інжынерныя спецыяльнасці, паколькі для прамысловасці патрабуюцца высокакваліфікаваныя інжынеры, тэхнолагі, канструктары. Ствараюцца неабходныя ўмовы і для ранняй прафарыентацыі старшакласнікаў. У прыярытэце — будучыя інжынеры і аграрыі.
Марына КУНЯЎСКАЯ
Фота аўтара
