Інструкцыя аб парадку правядзення дыспансерызацыі дарослага і дзіцячага насельніцтва Рэспублікі Беларусь зацверджана пастановай Міністэрства аховы здароўя ад 30 жніўня 2023 года № 125. Падрабязнасці – у матэрыяле карэспандэнта “Настаўніцкай газеты”.
З 1 студзеня 2024 года зменіцца парадак правядзення дыспансерызацыі дарослага і дзіцячага насельніцтва Беларусі.
Правядзенне дыспансерызацыі накіравана на:
- правядзенне медыцынскай прафілактыкі;
- прапаганду здаровага ладу жыцця;
- выхаванне адказнасці грамадзян за сваё здароўе;
- выяўленне хранічных неінфекцыйных захворванняў на ранніх стадыях.
Вызначаны наступныя групы дыспансернага назірання, у якіх праводзіцца дыспансерызацыя:
- дарослае насельніцтва — з 18 гадоў да 39 гадоў і з 40 гадоў і старэй;
- дзіцячае насельніцтва — да 1 года і з 1 года да 17 гадоў.
Праходзяць дыспансерызацыю на працягу:
- аднаго працоўнага дня:
асобы ва ўзросце ад 18 да 40 гадоў (адзін раз у тры гады);
асобы, якія дасягнулі ўзросту 40 гадоў (адзін раз у год);
- двух працоўных дзён адзін раз у год:
асобы, якія дасягнулі агульнаўстаноўленага пенсіённага ўзросту;
- асобы на працягу пяці гадоў да дасягнення агульнаўстаноўленага пенсіённага ўзросту.
Дыспансерызацыю праводзяць:
- дарослага насельніцтва — медработнікі ў амбулаторна-паліклінічных арганізацыях аховы здароўя па месцы жыхарства (месцы знаходжання), месцы працы (вучобы, службы) і (або) іншых арганізацыях, якія разам з асноўнай дзейнасцю таксама ажыццяўляюць медыцынскую дзейнасць ва ўстаноўленым заканадаўствам парадку;
- дзіцячага насельніцтва — урач-педыятр участковы ці ўрач агульнай практыкі, які абслугоўвае дзіцячае насельніцтва ў амбулаторна-паліклінічных арганізацыях і (або) іншых арганізацыях аховы здароўя.
Для яе правядзення могуць выкарыстоўвацца выязныя формы работы, у тым ліку з прымяненнем перасовачных фельчарска-акушэрскіх пунктаў.
У ходзе дыспансерызацыі медработнікамі:
- аналізуюцца медыцынскія дакументы пацыента;
- праводзіцца анкетаванне пацыентаў з афармленнем анкеты выяўлення фактараў рызыкі развіцця неінфекцыйных захворванняў;
- праводзіцца ацэнка фактараў рызыкі развіцця неінфекцыйных захворванняў;
- праводзіцца медыцынскі агляд пацыента і прымаецца рашэнне аб правядзенні дадатковай дыягностыкі;
- афармляецца карта ўліку правядзення дыспансерызацыі дарослага або карта ўліку правядзення дыспансерызацыі дзіцяці;
- кансультуюцца пацыенты па пытаннях медыцынскай прафілактыкі, прапаганды здаровага ладу жыцця і выхавання адказнасці грамадзян за сваё здароўе;
- ажыццяўляюцца іншыя функцыі, звязаныя з правядзеннем дыспансерызацыі.
Паводле інструкцыі пры правядзенні дыспансерызацыі дарослага і дзіцячага насельніцтва ўлічваюцца вынікі медыцынскіх аглядаў, праведзеных урачамі-спецыялістамі, медыцынскіх умяшанняў, зробленых на працягу 12 месяцаў, якія папярэднічаюць месяцу, у якім праводзіцца дыспансерызацыя. Дыспансерызацыя дзяцей ажыццяўляецца пераважна ў месяц іх нараджэння.
Прававым актам устаноўлены таксама:
- схемы правядзення дыспансерызацыі:
– дарослага насельніцтва;
– дзяцей ва ўзросце да 1 года;
– дзяцей ва ўзросце ад 1 года да 17 гадоў;
– дзяцей ва ўзросце да 1 года, якія маюць групы рызыкі развіцця захворванняў (станаў);
- пералікі захворванняў (станаў), якія падлягаюць медыцынскаму назіранню ў амбулаторных умовах, для дарослага і дзіцячага насельніцтва;
- крытэрыі эфектыўнасці дыспансерызацыі дарослага і дзіцячага насельніцтва.
Ведамасная пастанова ад 9 жніўня 2022 года № 83 “Аб парадку правядзення дыспансерызацыі дарослага і дзіцячага насельніцтва” прызнаецца страціўшай сілу.
Па матэрыялах Pravo.by падрыхтавала Вольга ДУБОЎСКАЯ
Фота pixabay.com