Дзе даюць старт у бізнес?

Захапляючая кніга ўспамінаў пра студэнцкае жыццё замест банальнага выпускнога фотаальбома… Кафэ здаровага харчавання, дзе замест фаст-фуду вам прапануюць свежыя сокі і салату з агародніны… Займальны музейны квест замест сумнага сузірання экспанатаў выставы… Гэта зусім не ўтопіі і не пустыя фантазіі, а рэальныя бізнес-праекты пачынаючых прадпрымальнікаў — студэнтаў Гомельскага дзяржаўнага ўніверсітэта імя Францыска Скарыны.

Упершыню ў сценах УВА прайшоў самы непрадказальны і доўгачаканы конкурс бізнес-ідэй і праектаў “Мой стартап”. Яго ўдзельнікі ініцыятыўныя і крэатыўныя маладыя людзі, якія ўмеюць рызыкаваць і прымаць смелыя рашэнні, а на пытанне “Ці ёсць у вас ідэя?” заўсёды гатовы адказаць: “Не звычайная ідэя, а справа на мільён!”

Свае “справы на мільён”, прадстаўленыя ў намінацыях “Лепшая бізнес-ідэя”, “Лепшы бізнес-праект” і “Лепшая ініцыятыва для ГДУ”, шасці камандам — удзельніцам фіналу трэба было прадумаць да дробязей, ацаніць навізну ідэй, іх запатрабаванасць і канкурэнтаздольнасць, пралічыць магчымую рызыку і даходнасць, а галоўнае, бліскуча правесці публічную прэзентацыю і пераканаць журы, што менавіта іх праект заслугоўвае перамогі.

Для пераможцы ў якасці прыза навукова-даследчы сектар універсітэта прадаставіў 1000 беларускіх рублёў. Аднак не столькі грошы прываблівалі пачынаючых бізнесменаў, колькі магчымасць паверыць у свае сілы.

У намінацыі “Бізнес-праект” студэнты юрыдычнага факультэта Вадзім Будзькоў і Яўген Бруевіч прэзентавалі гледачам сваю настальгічна-рамантычную “Часцінку маладосці”. Ідэя заключалася ў тым, што памяць пра самую цудоўную і бесклапотную пару студэнцтва лепш за ўсе захоўваць не на фотаздымках, а выказваць у форме аўтарскіх апавяданняў. Уражанні выпускнікоў пра навучанне ва ўніверсітэце, іх аповеды пра яскравыя падзеі і кур’ёзныя сітуацыі, іх мары і пажаданні складуць асобную главу вялікай кнігі студэнцкіх успамінаў. Адна глава — адна асоба са сваімі асаблівасцямі, вартасцямі і недахопамі. Пагартаць старонкі такой кнігі, перачытаць сачыненні аднагрупнікаў і ўспомніць маладосць куды цікавей, чым прагледзець стандартны фотаальбом. Як лічаць самі аўтары праекта, простымі фотаздымкамі сёння нікога не здзівіш, імі запоўнены сацыяльныя сеткі.

Па меркаванні журы конкурсу, прэзентацыя Вадзіма і Яўгена адрознівалася найбольш дэталёвай распрацоўкай. У хлопцаў гарэлі вочы ў працэсе абароны праекта, яны з вялікім натхненнем адстойвалі сваё пачынанне. За гэта і атрымалі перамогу.

Цікавымі і наватарскімі былі распрацоўкі таксама іншых фіналістаў конкурсу. Напрыклад, студэнтка факультэта замежных моў Вікторыя Бусел разглядала магчымасць адкрыцця ў Гомелі кафэ правільнага харчавання “100 гадоў без бед”. Будучы біёлаг Аляксандр Арашкевіч прапанаваў стварыць бансай-аддзяленне на базе лесагаспадарчага прадпрыемства. Прадстаўніцы эканамічнага факультэта Вікторыя Мамаева і Юлія Клепікава задумаліся над правядзеннем музейнага квеста “Горад фарфору і паперы”.

Сацыяльна значны “Экабрэйк” студэнта юрыдычнага факультэта Юрыя Сярова быў закліканы ўдыхнуць новае жыццё ў вучэбна-навуковую базу “Чонкі”. А ідэя GSU TAT (TALKS ABOUT TECHNOLOGIES), прэзентаваная Яўгенам Благадаравым ад калектыву матэматычнага факультэта, абяцала зрабіць навучанне ва ўніверсітэце больш цікавым і пазнавальным.

“Усе фіналісты конкурсу — вялікія малайцы. Іх ідэі і актыўнасць заслугоўваюць павагі, — адзначыў старшыня прафкама студэнтаў універсітэта стваральнік бізнес-школы “Стартап ГДУ” Сяргей Азяўчыкаў. — Тут важна не столькі перамога, колькі каштоўны вопыт, які набываюць юныя прадпрымальнікі”. З ім салідарны і пераможцы. Яны працягвалі б пакараць свет бізнесу, нават калі б не атрымалі перамогу.

Святлана ХАЗЕЙ.
Фота Галіны ЛАСАЕВАЙ.