Фестываль дружбы і талерантнасці

У Крупках упершыню прайшоў фестываль дружбы народаў. Праўда, замежных гасцей на ім не было — іх ролі выконвалі старшакласнікі ўстаноў адукацыі Крупскага раёна. Аднак гэта не перашкодзіла ўдзельнікам фестывалю пазнаёміцца бліжэй з культурай розных краін. Мерапрыемства “Разам дружная сям’я” арганізавалі ў Крупскім цэнтры дзіцячай творчасці.

У савецкія часы фестывалі дружбы народаў былі частай з’явай. Сёння іх не так многа, ды і паехаць, напрыклад, у Гродна, на фестываль нацыянальных культур атрымліваецца не ў кожнага школьніка. Між тым такія мерапрыемствы дапамагаюць выхоўваць у дзяцей талерантнасць, далучаць іх да багацця культур іншых народаў. Менавіта гэта і падштурхнула супрацоўнікаў Крупскага ЦДТ арганізаваць фестываль дружбы народаў.
“Дзякуючы такім мерапрыемствам у дзяцей фарміруецца паважлівае стаўленне да культуры, традыцый і звычаяў розных народаў, якія пражываюць на тэрыторыі Рэспублікі Беларусь, выхоўваецца цярпімасць да іншага ладу жыцця, думак, паводзін, каштоўнасцей”, — лічыць Ірына Уладзіміраўна Драніца, дырэктар Крупскага ЦДТ. Удзел у фестывалі прынялі 14 каманд амаль з усіх школ раёна. Кожная каманда павінна была прадставіць на фестывалі краіну, выхадцы з якой жывуць у Беларусі. Выбар каманды рабілі самі, вывучалі пэўную краіну і яе народ, а потым свае веды дэманстравалі на сцэне. Школьнікаў зацікавілі Грузія, Грэцыя, Індыя, Іспанія, Украіна, Японія, пяць каманд прадстаўлялі родную Беларусь.
Па ўмовах фестывалю, удзельнікам прапаноўваліся чатыры заданні. Першы конкурс — дэфіле ў народных касцюмах. Кожная каманда стварала для паказу мужчынскі і жаночы касцюмы. Дарэчы, амаль усё адзенне шылі самі: і індзійскія сары, і грэчаскія хітоны, і японскія кімано. Другое заданне патрабавала паказаць нацыянальны танец, песню ці абрад выбранай краіны. Госці мерапрыемства ўбачылі іспанскі танец з кастаньетамі, грузінскі танец з барабанамі, грэчаскі сіртакі, пачулі песні і вершы на ўкраінскай мове, пабывалі на японскай чайнай і на індзійскай шлюбнай цырымоніях. Хачапуры, варэнікі, сушы, бульбяныя клёцкі са скваркамі і іншыя прысмакі паспрабавалі члены журы ў трэцім конкурсе, дзе ўдзельнікі прадстаўлялі нацыянальныя стравы краін. Выконваючы апошняе конкурснае заданне, каманды прэзентавалі выбраныя краіны, стараліся коратка, але яскрава і змястоўна расказаць пра іх.
Па выніках конкурсных заданняў журы вызначала пераможцаў. Імі сталі дзве каманды — прадстаўніцы адной установы адукацыі, сярэдняй школы № 1 імя У.М.Марцінкевіча. Навучэнцам і педагогам гэтай школы настолькі спадабалася ідэя правядзення фестывалю дружбы народаў, што напярэдадні аналагічнае мерапрыемства прайшло ў іх установе. Тады і былі выбраны дзве каманды для ўдзелу ў раённым мерапрыемстве.
Па рэакцыі ўдзельнікаў і гасцей фестывалю было відаць, што мерапрыемства прыйшлося ім даспадобы. Ды і ці можа не спадабацца паказ, дзе рэюць драконы, гучаць барабаны, на сцэну выходзіць віцязь у тыгравай шкуры і з’яўляецца тандыр? У Крупскім ЦДТ плануюць зрабіць мерапрыемства штогадовым, каб беларускія школьнікі даведаліся пра ўсе народы на Зямлі.

Дар’я РЭВА.
Фота прадастаўлена Крупскім ЦДТ.

Пакінуць каментарый

Ваш электронны адрас не будзе апублікаваны. Абавязковыя палі пазначаны *