Make Yourself

23 лістапада, напрыканцы Тыдня тэхнічнай творчасці, адбыўся фінал конкурсу інтэрактыўных аплетаў па матэматыцы і англійскай мове Make Yourself. Школьнікі прэзентавалі ўласныя гульні, створаныя ў асяроддзі праграмавання Scratch, якія дапамогуць іх равеснікам цікава і лёгка вывучаць гэтыя прадметы.

Фота да матэрыяла: Make Yourself.У параўнанні з мінулым годам, конкурс значна пашырыўся. Па-першае, цяпер прымаюцца праграмы не толькі па матэматыцы, але і па англійскай мове. Па-другое, змяніўся ўзрост удзельнікаў: да навучэнцаў 5 і 6 класаў далучыліся вучні пачатковай школы. Заяўкі на ўдзел падалі 70 школьнікаў.

— Scratch даступны дзецям любога ўзросту, — тлумачыць Таццяна Уладзіміраўна Чалдышкіна, намеснік дырэктара па выхаваўчай рабоце гімназіі № 37 Мінска, адказная за дзейнасць рэсурснага цэнтра Фрунзенскага раёна сталіцы. — Ён развівае творчы патэнцыял, павышае матывацыю да навучання, дапамагае засвойваць вучэбныя прадметы. Конкурс акумулюе міжпрадметныя сувязі: дзеці займаюцца і праграмаваннем, і матэматыкай, і англійскай мовай, і рускай.

Абарона работ па традыцыі выглядала як кансультацыя сам-насам з экспертамі. На працягу дзвюх гадзін з дзецьмі працавалі спецыялісты ў сферы ІT і стварэнні гульняў, а таксама студэнты Беларускага дзяржаўнага педагагічнага ўніверсітэта імя Максіма Танка, якія давалі парады наконт вучэбнага зместу праграм. Пакуль спецыялісты выпрабоўвалі распрацаваную гульню, дзеці тлумачылі яе ідэю і ўнутраную арганізацыю.

Фота да матэрыяла: Make Yourself.Адначасова школьнікі знаёміліся з работамі іншых удзельнікаў конкурсу, каб выбраць аплет, які атрымае прыз сімпатый гледачоў, а таксама падгледзець карысныя ідэі для сваёй праграмы.

— Цяпер мы будзем публікаваць работы пераможцаў, каб будучыя ўдзельнікі конкурсу маглі павучыцца на іх прыкладзе, а настаўнікі — выкарыстоўваць гульні на ўроках, — расказала Наталля Курсавая, член аўтарскай групы конкурсу Make Yourself, настаўніца інфарматыкі гімназіі № 37 Мінска. — Гульні будуць размешчаны на сайтах Мінскага гарадскога інстытута развіцця адукацыі і Акадэміі паслядыпломнай адукацыі, а таксама ў групе Make Yourself у Фэйсбуку.

Удасканаліць свае работы школьнікам дапамогуць і майстар-класы, праведзеныя для іх прафесійнымі гейм-дызайнерамі. Антон Мамаеў (“Мелсофт”) расказаў пра пошук аўдыторыі гульні і кіраванне эмоцыямі гульца, патлумачыў, чаму гульні бываюць сумнымі і як гэтага не дапусціць.

Віталь Мароз і Галіна Атрашкова (Easy Team) патлумачылі, як прайсці шлях ад ідэі да гатовай гульні і на што звярнуць увагу падчас яе тэсціравання.

— Я нават не чакала, што ўзровень работ будзе такім высокім! — парадавалася эксперт конкурсу Галіна Атрашкова. — Параіла б толькі дзецям больш рыхтавацца да прэзентацыі сваёй гульні: добра арыентавацца ў кодзе, быць гатовымі да таго, што эксперт зазірне ва ўсе яго куточкі і задасць пытанні. А таксама больш увагі ўдзяляць дызайну.

На аснове каментарыяў экспертаў і ўбачаных работ школьнікі ўдасканаляць свае праграмы ці нават створаць новыя, каб у студзені зноў прэзентаваць іх на конкурсе. Да гэтага часу плануецца пашырыць тэмы і геаграфію конкурсу. Напрыклад, ужо прагучалі прапановы настаўнікаў прымаць аплеты не толькі па англійскай, але і па іншых замежных мовах.

— Зараз мы праводзім конкурс у межах Мінска, ужо далучаюцца педагогі з Гомеля і Гомельскай вобласці, — расказала Алена Мікалаеўна Емяльянава, начальнік аддзела інфарматызацыі Мінскага гарадскога інстытута развіцця адукацыі. — Конкурс мае патэнцыял і можа выйсці нават на міжнародны ўзровень.

Конкурс інтэрактыўных аплетаў па вучэбных прадметах “Матэматыка” і “Англійская мова” Make Yourself праводзіцца ўжо другі раз. Яго арганізатарамі выступаюць Мінскі гарадскі інстытут развіцця адукацыі, Беларускі дзяржаўны педагагічны ўніверсітэт імя Максіма Танка, упраўленне па адукацыі адміністрацыі Фрунзенскага раёна Мінска, асацыяцыя “Адукацыя для ўстойлівага развіцця”, Інфармацыйны цэнтр па атамнай энергетыцы Мінска і гімназія № 37 — рэсурсны цэнтр інфармацыйных тэхналогій Фрунзенскага раёна Мінска.

Мар’я ЯНКОВІЧ.
Фота аўтара.