Пазітыўна і дынамічна

У Міністэрстве адукацыі адбылася сустрэча першага намесніка міністра адукацыі В.А.Богуша з дэлегацыяй Свярдлоўскай вобласці Расійскай Федэрацыі на чале з першым намеснікам губернатара А.В.Арловым. На сустрэчы прысутнічалі з расійскага боку рэктары ўральскіх УВА, дырэктары тэхнікумаў і каледжаў, з беларускага боку — кіраўнікі ўстаноў адукацыі, прадстаўнікі Міністэрства адукацыі.

У прывітальным слове да гасцей з Расійскай Федэрацыі Вадзім Анатольевіч Богуш падкрэсліў, што супрацоўніцтва паміж брацкімі народамі мае даўнюю і багатую гісторыю, у тым ліку ў адукацыйнай сферы. За гэты час абедзвюм краінам удалося не толькі захаваць цесныя, творчыя сувязі, але і ўзбагаціць іх, рэалізоўваючы ўсё новыя і новыя перспектыўныя напрамкі і прадукцыйна выкарыстоўваючы напрацаваны вопыт.

Першы намеснік губернатара Свярдлоўскай вобласці А.В.Арлоў адзначыў, што супрацоўніцтва Свярдлоўскай вобласці і Беларусі дасягнула такога ўзроўню ў навукова-адукацыйнай сферы, што можа быць прыкладам для іншых рэгіёнаў Расійскай Федэрацыі. Кіраўнік дэлегацыі падкрэсліў, што ўзаемаадносіны паміж Беларуссю і Свярдлоўскай вобласцю маюць пазітыўны і дынамічны характар. Гэтае супрацоўніцтва ажыццяўляецца ў рамках Пагаднення аб супрацоўніцтве ў гандлёва-эканамічнай, навукова-тэхнічнай і культурнай сферах.

— Нам удаецца захоўваць і з кожным годам узбагачаць нашы сувязі з беларускімі калегамі, — заявіў кіраўнік расійскай дэлегацыі. — Тым больш гэта вельмі актуальна, калі ўзаемаадносіны Беларусі і Расійскай Федэрацыі сёння засноўваюцца на супрацоўніцтве з расійскімі рэгіёнамі, асабліва з такімі магутнымі, як наша Свярдлоўская вобласць, якая па плошчы супастаўная з Беларуссю.

Сапраўды, Уральскі рэгіён лічыцца адным з буйных суб’ектаў Расійскай Федэрацыі, дзе сканцэнтраваны прамысловыя, адукацыйныя і навуковыя рэсурсы. У рэгіёне дзейнічае больш за 30 інстытутаў уральскага аддзялення Расійскай акадэміі навук, больш за 30 ВНУ, дзе вучыцца звыш 200 тысяч студэнтаў. Уральскія ВНУ рыхтуюць спецыялістаў практычна па ўсім спектры спецыяльнасцей, якія існуюць у Расійскай Федэрацыі, у тым ліку для высокатэхналагічных галін. Рыхтуецца да запуску першы міжрэгіянальны цэнтр кампетэнцый па тэхнічных спецыяльнасцях.

Абмяркоўваючы перспектывы развіцця партнёрскіх адносін у сферы вышэйшай адукацыі, В.А.Какшароў, старшыня савета рэктараў, рэктар Уральскага федэральнага ўніверсітэта імя першага Прэзідэнта Расіі Б.М.Ельцына, расказаў, што ўніверсітэт з’яўляецца адной з самых буйных шматпрофільных устаноў Уральскага рэгіёна, дзе вучацца 35 тысяч студэнтаў. Універсітэт мае статус вядучага, што дае яму права на распрацоўку і ўкараненне асабістых адукацыйных стандартаў і вучэбных праграм. У склад установы ўваходзяць Уральскі энергетычны інстытут, Цэнтр па рабоце з прадпрыемствамі. Установа нацэлена на ажыўленае міжнароднае супрацоўніцтва ў адукацыі і навуцы і мае намер больш актыўна дзяліцца сваім вопытам з беларускімі ўніверсітэтамі. На сённяшні дзень уральскі ўніверсітэт узаемадзейнічае з БДУ, БНТУ, БДУІР, МДЛУ, рэгіянальнымі ўніверсітэтамі нашай краіны. Вынікам такой работы стала рэалізацыя шэрага сумесных праектаў і правядзенне разнастайных мерапрыемстваў, у тым ліку ў рамках Саюзнай дзяржавы.

Увогуле, сёння рэалізуецца 14 дагавораў паміж УВА Беларусі і ўніверсітэтамі Свярдлоўскай вобласці. Адным з прыкладаў такога ўзаемадзеяння стала супрацоўніцтва паміж Беларускім і Уральскім дзяржаўнымі эканамічнымі ўніверсітэтамі, што і пацвердзілі на сустрэчы рэктары гэтых устаноў У.М.Шымаў і Я.П.Сілін.

— Мы супрацоўнічаем з расійскімі калегамі з 2007 года, але ў нас яшчэ існуюць істотныя рэзервы, мы гатовы рухацца далей у сферы развіцця вышэйшай адукацыі, вучэбна-метадычнай і навуковай дзейнасці, — заявіў Уладзімір Мікалаевіч.

Кафедра нацыянальнай эканомікі і дзяржаўнага кіравання факультэта менеджменту БДЭУ актыўна вядзе абмен з расіянамі па распрацоўцы вучэбных планаў і праграм, выкарыстанні сучасных форм і метадаў навучання ў вышэйшай школе, вядзецца абмеркаванне магчымасці сумеснага выдання вучэбных дапаможнікаў, правядзення навукова-практычных канферэнцый і семінараў, абмену студэнтаў, маладых вучоных, прафесарска-выкладчыцкага складу двух універсітэтаў. У.М.Шымаў паведаміў, што разглядаюцца магчымасці публікацыі ў выданнях БДЭУ і УрДЭУ артыкулаў супрацоўнікаў і аспірантаў на тэмы, якія б адпавядалі ўзаемным навуковым інтарэсам, а таксама правядзенне рэцэнзавання навукова-даследчых і метадычных работ.

— Як новую форму супрацоўніцтва мы прапаноўваем расійскім калегам арганізаваць пастаянна дзеючую пляцоўку па абмеркаванні актуальных праблем рэгіянальнай і нацыянальнай эканомікі нашых краін і пытанняў падрыхтоўкі кадраў, у ролі якой можа выступіць міжуніверсітэцкі навуковы семінар, дзе мы можам рэгулярна збірацца разам, — прапанаваў Уладзімір Мікалаевіч Шымаў.

А.В.Арлоў падкрэсліў, што, улічваючы тое, што ў рэгіёне працуе больш за 14 тысяч прамысловых прадпрыемстваў, працоўныя рэсурсы маюць патрэбу ў папаўненні і павышэнні кваліфікацыі. Таму задача рэгіёна — забяспечыць прафесійную падрыхтоўку рабочых кадраў і спецыялістаў з улікам патрабаванняў заказчыкаў кадраў.

Я.А.Рыбакоў, дырэктар Уральскага дзяржаўнага каледжа імя І.І.Палзунова, адзначыў значную ролю ў прафарыентацыйнай рабоце і павышэнні іміджу рабочай прафесіі такіх кірункаў дзейнасці, як спаборніцтвы WorldSkills і JuniorSkills, у якіх таксама прымаюць удзел беларускія школьнікі і моладзь. А.Х.Шкляр, рэктар РІПА, пацвердзіў значнасць развіцця супрацоўніцтва ў сферы прафесійнай адукацыі з расійскімі калегамі, асабліва ў гэты час, калі імкліва развіваюцца сучасныя тэхналогіі і эканомікі дзвюх краін ідуць па інавацыйным шляху. Аркадзь Ханонавіч расказаў пра асноўныя кірункі навукова-метадычнага суправаджэння прафесійнай адукацыі і адзначыў яго важнасць пры падрыхтоўцы кадраў.

— Нашы краіны сёння вельмі клапоцяцца пра паляпшэнне матэрыяльна-тэхнічнай базы ўстаноў прафесійнай адукацыі і забеспячэнне іх абсталяваннем, якое б адпавядала сённяшняй вытворчасці, — адзначыў Аркадзь Ханонавіч. — Гэта вельмі ўхвальна, але недастаткова ў прафесійнай падрыхтоўцы. Важна стварыць сучасныя методыкі прафесійнай адукацыі, насыціць змест навучання неабходнымі ведамі і надаць вучэбнаму працэсу практыканакіраванасць. У прафесійнай адукацыі мы павінны рыхтаваць не толькі прафесіянала, але і фарміраваць асобу, імідж працоўнай дзейнасці, папулярызаваць статус рабочага. РІПА з’яўляецца базавай арганізацыяй краін СНД, і інстытуту даручана папулярызаваць сістэму прафесійнай адукацыі ў краінах Садружнасці. І таму супрацоўніцтва з рэгіёнамі Расійскай Федэрацыі з’яўляецца для РІПА і ўсёй айчыннай прафесійнай адукацыі прыярытэтным.

Аркадзь Ханонавіч прапанаваў наладзіць сувязі з расійскімі калегамі ў сферы дзейнасці па выданні вучэбна-дапаможнай літаратуры, у павышэнні кваліфікацыі педагагічных кадраў устаноў прафесійнай адукацыі, у прыватнасці майстроў вытворчага навучання і выкарыстання ў гэтым дыстанцыйнай формы.

У канцы сустрэчы адбылося падпісанне Пагаднення аб супрацоўніцтве паміж філіялам РІПА “Мінскі аўтамеханічны каледж імя акадэміка М.С.Высоцкага” і Уральскім дзяржаўным каледжам імя І.І.Палзунова. Пагадненні падпісалі дырэктары ўстаноў В.Р.Кірыленка і Я.А.Рыбакоў.

Ала КЛЮЙКО.
Фота Алега ІГНАТОВІЧА.

Пакінуць каментарый

Ваш электронны адрас не будзе апублікаваны. Абавязковыя палі пазначаны *