Гасцінна расчыніла свае дзверы сярэдняя школа № 3 Шчучына для ўдзельнікаў профільнага аздараўленчага лагера.
Сорак крэатыўных і вясёлых, мэтанакіраваных і зацікаўленых навучэнцаў з профільных педагагічных, аграрных і прававых класаў сабраліся ў аздараўленчым лагеры “Сузор’е”, каб не толькі адпачыць у камандзе равеснікаў, але і паглыбіцца ў будучыя прафесіі.
Гэтаму садзейнічала насычаная праграма, распрацаваная камандай педагогаў-прафесіяналаў лагера пад кіраўніцтвам Марыі Іванаўны Конан і Ірыны Іосіфаўны Бяляўскай.
Прыцягненне сацыяльных партнёраў прадпрыемстваў, арганізацый рэгіёна па напрамках работы лагера стала важнай умовай яго паспяховасці. Кожны дзень лагернай змены тры атрады выхаванцаў і каманда педагогаў адпраўляліся на прафарыентацыйныя экскурсіі, дзе станавіліся ўдзельнікамі майстар-класаў, прафесійных проб, сустрэч з прафесіяналамі на іх рабочых месцах. У занальным інстытуце раслінаводства навуковыя работнікі з такім натхненнем расказвалі ўдзельнікам сустрэчы аб дасягненнях інстытута і аб навуковых даследаваннях, якія праводзяцца, што дзеці пераканаліся: гэтыя людзі жывуць сваёй справай, сваёй прафесіяй. На сучасным прадпрыемстве “Праймілк” старшакласнікі цікавіліся пытаннямі экалогіі і энергазберажэння, умовамі і формамі матывацыі працы работнікаў, запатрабаванымі прафесіямі, і, вядома ж, пачаставаліся смачнай прадукцыяй прадпрыемства.
Алена Аляксандраўна Федасеева, Людміла Анатольеўна Куралёва, Наталля Сямёнаўна Маліноўская і многія іншыя прафесіяналы дзяліліся з выхаванцамі сакрэтамі іх прафесійнага поспеху, арганізаваўшы для дзяцей майстар-класы. А прафесійныя пробы для будучых педагогаў, аграрыяў і правазнаўцаў дапамаглі атрымаць вопыт “пражывання” прафесіі і сфарміраваць сваю пазіцыю адносна сябе ў ёй. Здзейсніць адкрыцці ў галіне псіхалогіі асобы дапамог удзельнікам лагернай змены гульнявы прафарыентацыйны мультыпарк “Я і прафесія”, арганізаваны педагогам-псіхолагам Кацярынай Войцехаўнай Гайдукевіч.
Экскурс у гісторыю рэгіёна для выхаванцаў лагера адбыўся ў музеі “Гісторыя ўтварэння Шчучыншчыны”, музеі жанчыны, музеі гісторыі Шчучыншчыны, падчас пазнавальных квест-гульняў і віртуальных экскурсій.
Кожны дзень выхаванцаў акружалі вопытныя педагогі, дзяліліся сваімі ведамі, прафесійным вопытам, як роўныя абмяркоўвалі са старшакласнікамі праблемы сучаснай педагогікі, аграрнай справы, права. Культурна-адпачынкавыя мерапрыемствы і спартыўныя спаборніцтвы, працоўныя і экалагічныя дэсанты, гульня “Зарніца” і інтэлектуальныя турніры, экскурсіі па знакавых месцах Шчучыншчыны і майстэрня прафесійных адкрыццяў — усё гэта зрабіла незабыўным адпачынак і наблізіла да свету прафесій удзельнікаў лагернай змены “Сузор’е”.
Гелена БАРОНІК,
метадыст Шчучынскага палаца творчасці дзяцей і моладзі.
