У лютым споўнілася 130 гадоў з дня нараджэння В.В.Біянкі. Тыдзень, прысвечаны творчасці дзіцячага пісьменніка, прайшоў у дзіцячым садзе № 17 “Залаты ключык” Жодзіна.
Тэматычны тыдзень у дзіцячым садзе — форма работы для педагогаў нашай установы адукацыі не новая, але разнастайнасць выбранай тэматыкі прыемна здзіўляе. На пастаяннай аснове ў дзіцячым садзе праводзяцца тыдзень бацькоўскай любові, тыдзень беларускай мовы, у мінулым годзе быў праведзены тыдзень тэатра. У бягучым навучальным годзе, грунтуючыся на адной з задач установы адукацыі — фарміраванне асноў маральна-патрыятычнага выхавання дашкольнікаў з дапамогай далучэння да твораў дзіцячай мастацкай літаратуры, педагогі прыйшлі да адзінай думкі — укараніць у практыку мерапрыемствы, прысвечаныя творчасці дзіцячых аўтараў. Так з’явіўся план правядзення тэматычнага тыдня, прысвечанага творчасці В.Біянкі. Да таго ж у 2024 годзе спаўняецца 130 гадоў з дня нараджэння выдатнага дзіцячага пісьменніка. Чым не нагода ўдзяліць увагу творчасці аўтара?
У першы дзень тэматычнага тыдня намеснікам загадчыка па асноўнай дзейнасці Таццянай Хадаронак была падрыхтавана кніжная выстава творчасці В.Біянкі. Арганізацыя развіццёвага прадметна-прасторавага асяроддзя дазволіла выкарыстоўваць выставу на працягу тыдня ў розных узроставых групах. У гэты ж дзень дзяцей азнаёмілі з біяграфіяй аўтара і правялі гутарку па першым творы аўтара “Чый нос лепшы?”.
У другі дзень выхавальнікі старшых груп адправіліся з дзецьмі на экскурсію ў гарадскую бібліятэку, дзе іх чакаў квест, заснаваны на творах аўтара. Для гэтага выхавальнікамі ў групах была праведзена папярэдняя работа — чытанне твораў В.Біянкі, якія ляглі ў аснову пазнавальнага квеста. Акрамя таго, дзеці азнаёміліся з выставай “Ляснымі сцежкамі Віталія Біянкі”, змаглі самастойна пагартаць ілюстраваныя кнігі аб прыродзе і нават змайстравалі закладкі для кніг у выглядзе персанажа кнігі “Мышаня Пік”.
Яркай падзеяй тыдня стаў тэатральны дзень. У групах выхавальнікі падчас нерэгламентаванай дзейнасці арганізавалі тэатральныя паказы, выкарыстоўваючы розныя віды тэатраў, а ў музычнай зале малышы сабраліся на паказ лялечнага спектакля паводле твора “Хвасты”.
На працягу тыдня педагогі з дзецьмі слухалі аўдыязапісы твораў, праглядзелі мультфільм “Як Мурашка дадому спяшаўся”, разгадвалі загадкі і кросенсы пра герояў казак і апавяданняў Віталія Біянкі, ляпілі і малявалі герояў па матывах яго твораў і чыталі, вельмі шмат чыталі. Малышоў азнаёмілі з творамі “Ліс і Мышаня”, “Купанне медзведзянят”, “Падкідыш”, “Снежная кніга”, “Снягірушка-мілушка”, “Лясныя хаткі” і інш.
У нашым дзіцячым садзе вядзецца актыўная работа з кнігай. Выхавальнікі далучаюць да працэсу чытання бацькоў выхаванцаў. Цікавай формай з’яўляецца буккросінг — абмен кнігамі. Гэтым разам буккросінг быў арганізаваны сярод педагогаў. Выхавальнікі актыўна абменьваліся кнігамі з калегамі, каб за гэты кароткі прамежак часу расказаць пра неверагодныя прыгоды жывёл — герояў твораў В.Біянкі.
Праведзеная работа дазволіла педагогам павысіць сваю кампетэнтнасць у пытанні арганізацыі работы па мастацка-маўленчай дзейнасці, накіраванай на фарміраванне маральна-патрыятычных пачуццяў праз далучэнне да твораў дзіцячай мастацкай літаратуры, выкарыстоўваючы творы аб прыродзе В.Біянкі, якія раскрываюць таямніцы роднага краю, дапамагаюць выхоўваць такія пачуцці, як дабрыня, спагадлівасць, храбрасць, дружалюбнасць і суперажыванне. А дзеці змаглі паглыбіцца ў свет лясных насельнікаў, пазнаёміліся з жыхарамі вадаёмаў і лугоў, адчулі характар і даведаліся аб ладзе жыцця кожнага героя пісьменніка-чараўніка, які ўмеў бачыць цуды ў простых рэчах.
Таццяна ХАДАРОНАК,
намеснік загадчыка па асноўнай дзейнасці
дзіцячага сада № 17 Жодзіна
