Удасканаленне сістэмы адукацыі стала ключавой тэмай калегіі Адміністрацыі Прэзідэнта, якая прайшла на базе Беларускага дзяржаўнага педагагічнага ўніверсітэта імя Максіма Танка.
Асаблівая ўвага
Удзельнікі калегіі сканцэнтраваліся на абмеркаванні тэм і пасылаў, якія прагучалі напярэдадні на нарадзе ў Прэзідэнта аб развіцці нацыянальнай сістэмы адукацыі. Гаворка ішла пра кадравае забеспячэнне галіны, удасканаленне адукацыйнага працэсу і сістэмы адбору абітурыентаў.
Кіраўнік Адміністрацыі Прэзідэнта Ігар Сергяенка адзначыў, што сфера адукацыі мае асаблівае значэнне для краіны, бо з ёй у той ці іншай ступені звязана вялікая колькасць людзей — настаўнікі, навучэнцы, іх бацькі, работнікі, якія забяспечваюць дзейнасць устаноў адукацыі, мясцовыя органы ўлады. “Адукацыйная сфера дынамічна мяняецца, з’яўляюцца новыя формы і матэрыялы. Адпаведна, ідзе рух наперад. Сёння мы ўбачылі тое новае, што рэалізуецца Міністэрствам адукацыі”, — адзначыў Ігар Сергяенка.
Сістэма адукацыі знаходзіцца пад асаблівай увагай Адміністрацыі Прэзідэнта, падкрэсліў намеснік кіраўніка Адміністрацыі Ігар Луцкі. “Ад таго, якой яна будзе, якія будзе даваць адказы на выклікі часу, залежыць, ці сфарміруем мы здаровую і адукаваную нацыю, здольную адстойваць свае ідэалы, свабоду і незалежнасць, забяспечваць паступальнае развіццё краіны і грамадства”, — сказаў ён.
Ігар Уладзіміравіч падкрэсліў, што за апошнія гады дзяржавай шмат зроблена для развіцця адукацыі: створана неабходная заканадаўчая база, забяспечана стабільнае фінансаванне, навучэнцам і педагогам аказваецца сацыяльная падтрымка.
У фае БДПУ імя Максіма Танка была арганізавана выстава творчых дасягненняў педагогаў, вучэбнай і вучэбна-метадычнай літаратуры, узораў новых тэхналогій у адукацыі і выхаванні. Акрамя таго, была прадстаўлена інфармацыя аб падрыхтоўцы да выпуску вучэбных выданняў, рабоце нацыянальнага адукацыйнага партала, Рэспубліканскага маладзёжнага цэнтра, сістэме павышэння кваліфікацыі і перападрыхтоўкі педагагічных кадраў, укараненні новых спецыяльнасцей і кваліфікацый, развіцці валанцёрскага руху, патрыятычным выхаванні дзяцей і моладзі.
“Па вялікім рахунку сістэма працуе зладжана. Сведчанне таго — умацаванне пазіцый нацыянальнай адукацыі на сусветным узроўні, рост колькасці замежных грамадзян, якія жадаюць вучыцца ў нас, перамогі нашых школьнікаў на міжнародных алімпіядах, а таксама тое, што нашых выпускнікоў з рукамі і нагамі, калі можна так сказаць, гатовы забраць да сябе многія кампаніі, у тым ліку і за мяжой, — канстатаваў Ігар Луцкі. — Працы шмат, задача ва ўсіх адна — выхаваць адукаванага грамадзяніна і патрыёта. Не толькі адукацыя, але і выхаванне — асноўная функцыя нашых педагогаў. Хацелася б, каб усе дзеці, якія заканчваюць школы, універсітэты, рэалізоўвалі свой патэнцыял на роднай зямлі”.
Акрамя таго, на калегіі гаварылі пра забяспечанасць месцамі ў дзіцячых дашкольных установах адукацыі, закрыццё і рэарганізацыю школ, цякучасць і недахоп спецыялістаў па тэхнічных і прыродазнаўчых напрамках (матэматыцы, фізіцы, інфарматыцы). Закраналася тэма выхаваўчага працэсу, у тым ліку работы кіраўнікоў па ваенна-патрыятычным выхаванні.
Стан і перспектывы
У размове з журналістамі міністр адукацыі Андрэй Іванец нагадаў, што з 1 верасня ўступае ў сілу абноўлены Кодэкс аб адукацыі, для чаго была праведзена вялікая работа па змяненні нарматыўна-прававой базы. Цяпер, паводле яго слоў, важна ацаніць, наколькі сістэма адукацыі гатова ўспрыняць і рэалізаваць гэтыя навацыі.
Частку новаўвядзенняў пачалі паступова ўкараняць, напрыклад, мэтавы набор ва УВА быў павялічаны падчас уступнай кампаніі гэтага года. “На мэтавую падрыхтоўку мы прынялі дастаткова вялікую колькасць маладых людзей. Для такіх галін, як ахова здароўя, сельская гаспадарка, набор мэтавікаў склаў амаль 50% ад агульнай колькасці бюджэтных месцаў. Чаму гэта важна? Таму што ў гэтыя галіны павінны прыходзіць тыя кадры, якія матываваныя, свядома выбралі прафесію і якія павінны замацавацца не толькі ў Мінску, але і ў рэгіёнах”, — растлумачыў міністр.
Па педагагічных спецыяльнасцях Андрэй Іванец прывёў наступныя даныя: кожны трэці выпускнік педагагічнага класа выбірае профільны ўніверсітэт, кожны чацвёрты з тых, хто паступае на бюджэт у педагагічную УВА, — выпускнік педкласа, а кожны пяты — выдатнік або медаліст. Гэта азначае, што каля 45% студэнтаў педагагічных універсітэтаў з’яўляюцца выдатнікамі або выпускнікамі педкласаў. Сёлета больш за 5,8 тысячы выпускнікоў педагагічных УВА прыступілі да работы. Таксама ўжо адпрацавалі год па спецыяльнасці тыя, хто спачатку вучыўся ў педагагічных класах, а затым паступіў у профільны ўніверсітэт. Водзывы дырэктараў школ пра такіх маладых спецыялістаў вельмі добрыя.
Міністр заўважыў, што беларуская адукацыя становіцца ўсё больш папулярнай за мяжой: за апошнія пяць гадоў колькасць замежных студэнтаў у краіне павялічылася ў паўтара разу. З 17 тысяч чалавек 5 гадоў назад яна вырасла да 32 тысяч са 107 краін у цяперашні час.
Адбываецца паступовае амаладжэнне педагагічных кадраў, доля пенсіянераў сярод настаўнікаў — 9,5%. “Мы лічым, што гэта аптымальная лічба, бо падрастаючае пакаленне, маладыя спецыялісты маюць патрэбу ў настаўніцтве. І хто як не тыя педагогі, якія ўсё жыццё адпрацавалі ў адукацыі, могуць перадаць ім свой вопыт. Гэта добры сплаў маладосці і вопыту”, — перакананы міністр.
Падрыхтавала Вольга ДУБОЎСКАЯ.