Акружыць увагай і клопатам, раскрыць патэнцыял кожнага малыша — такіх прынцыпаў у рабоце прытрымліваецца педагагічны калектыў дзіцячага сада № 2 Мсціслава. На працягу ўжо некалькіх гадоў гэтая дашкольная ўстанова з’яўляецца лепшай у раёне. Падрабязнасці – у матэрыяле карэспандэнта “Настаўніцкай газеты”.
— Дасягненняў сапраўды шмат. Выхаванцы вынікова праяўляюць сябе ў конкурсах і спаборніцтвах. І гэта цалкам заслуга педагогаў. У нашай установе няма выпадковых людзей. Усе спецыялісты — высокакваліфікаваныя прафесіяналы, якія працуюць з душой і бязмежна любяць дзяцей, — расказала загадчыца Сняжана Міхаленка.
Сёння мсціслаўскі дзіцячы сад № 2 наведваюць 109 хлопчыкаў і дзяўчынак. З іх больш за сорак — малышы з асаблівасцямі псіхафізічнага развіцця. Установа з’яўляецца апорнай па інтэграваным навучанні і выхаванні.
— Стараемся прадастаўляць роўныя ўмовы для ўсебаковага развіцця кожнага дзіцяці. Агульнымі намаганнямі стварылі адаптыўнае адукацыйнае асяроддзе для асаблівых выхаванцаў, забяспечылі псіхолага-педагагічнае суправаджэнне інтэграванага навучання і пераемнасць работы спецыялістаў. Дзеці з асаблівасцямі атрымліваюць неабходную дапамогу ў нашым карэкцыйным пункце, прыцягваюцца да сумеснай з норматыповымі аднагодкамі дзейнасці. Гэтыя крокі дазваляюць паступальна і дзейсна рухацца да інклюзіі, — паведаміла Сняжана Віктараўна.
Паводле яе слоў, калектыў педагогаў кіруецца дэвізам “Мы разам — мы побач”. Знаходжанне дзяцей у дашкольнай установе выхавальнікі імкнуцца рабіць яркім, радасным і шчаслівым. Яны забяспечваюць дыферэнцыраваны падыход да малых, заахвочваюць іх творчасць, развіваюць уменні і навыкі.
— Плённа працуем па ўсіх напрамках. Аднак акцэнт робім на патрыятычным выхаванні. Прывіваем дзецям любоў да роднага горада, гордасць за сваю краіну. Зараз актыўна займаемся рэалізацыяй рэспубліканскага інавацыйнага праекта па стварэнні рэгіянальнай мадэлі фарміравання грамадзянска-патрыятычнай пазіцыі ў дзяцей. У рамках інавацыі распрацаваны маршруты выхаднога дня па Мсціславе, інтэрактыўныя гульні і дыдактычныя дапаможнікі. У групах з’явіліся патрыятычныя куткі, дзе выхаванцы могуць наглядна азнаёміцца з нацыянальнымі сімваламі, прыродай і культурнай спадчынай Беларусі, — адзначыла Сняжана Міхаленка.
Робім таксама ўпор на экалагічнае выхаванне. Установа мае статус “Зялёная школа”, мэтанакіравана рэалізуе аднайменны праект. Пад куратарствам педагогаў выхаванцы вывучаюць і павялічваюць біяразнастайнасць малой радзімы, засвойваюць правілы энергазберажэння і рацыянальнага спажывання рэсурсаў, выступаюць за беражлівыя адносіны да навакольнага асяроддзя.
— З ліку выхаванцаў старшай групы стварылі энергетычны патруль “Юныя энергазберагайкі”. Ужо традыцыяй сталі шматлікія тэматычныя акцыі. Мы вырабляем кармушкі для птушак і шпакоўні, саджаем кветкі на клумбах, займаемся добраўпарадкаваннем тэрыторыі сада, сартуем карысныя адходы. Такія практычныя справы найлепшым чынам садзейнічаюць экалагічнай асвеце дзяцей, — запэўніла Сняжана Віктараўна.
Адной з ключавых сваіх задач педагогі бачаць падрыхтоўку выхаванцаў да пераходу на ўзровень агульнай сярэдняй адукацыі. Дашкольная ўстанова ўзаемадзейнічае са школамі і эфектыўна рэалізуе праект Парка высокіх тэхналогій “Інфарматыка без разеткі”.
— Праз праект у гульнявой форме развіваем у дзяцей алгарытмічнае мысленне і логіку. А кантакт са школамі садзейнічае іх сацыялізацыі. Як вынік, усе нашы выпускнікі паспяхова працягваюць далейшае навучанне, — патлумачыла загадчыца.
Педагогі дзіцячага сада № 2 Мсціслава, рэалізаваўшы адну ініцыятыву, пачынаюць наступную. Візітнай карткай установы сталі рэгулярныя і цікавыя творчыя мерапрыемствы, якія праводзяцца ў тандэме з бацькамі.
— Прытрымліваемся меркавання, што мамы і таты — нашы галоўныя партнёры ў арганізацыі адукацыйнага працэсу, — падкрэсліла Сняжана Міхаленка. — Менавіта цеснае супрацоўніцтва з сям’ёй дае магчымасць гадаваць дзяцей гарманічна развітымі асобамі.
Ганна СІНЬКЕВІЧ
Фота аўтара
