Традыцыйную выставу-продаж прадукцыі ўстаноў адукацыі Віцебшчыны наведалі дзясяткі тысяч віцяблян і гасцей горада. Падрабязнасці – у матэрыяле карэспандэнта “Настаўніцкай газеты”.
Каля Палаца спорту ў абласным цэнтры размясціліся пляцоўкі 25 каледжаў, а таксама ўстаноў агульнай сярэдняй, дадатковай і спецыяльнай адукацыі 12 раёнаў паўночнага рэгіёна. Тое, што яны прадставілі, парадавала як дбайных гаспадароў, так і самых патрабавальных знаўцаў модных трэндаў: велізарны выбар сельскагаспадарчай прадукцыі, арыгінальныя сувеніры, адзенне, абутак і аксесуары, цудоўны хатні тэкстыль, карысныя ў побыце вырабы з дрэва і металу. Што немалаважна, усе тавары на падобных кірмашах заўсёды якасныя і па вельмі прывабных цэнах.
Пакупніцкі ажыятаж быў відавочны, бо чэргі ўтвараліся паўсюдна. Аднак рухаліся яны на дзіва хутка. Ветлівыя і добразычлівыя прадаўцы (у іх пераўвасобіліся работнікі ўстаноў адукацыі) поруч са сваімі спрытнымі памочнікамі-навучэнцамі працавалі дружна, з захапленнем і веданнем справы.
Пры гэтым расказвалі, дзе вучаць вырошчваць важкія ўраджаі або “агракласную” расаду, даглядаць пчальнікі і збіраць мёд, майстраваць якасныя рэчы з асартыменту тавараў масавага попыту, ствараць сапраўдны эксклюзіў на радасць сабе і людзям. Тых, хто зацікавіўся ўсім гэтым, чакала дэталёвая інфармацыя пра ўстановы адукацыі ці канкрэтныя аб’яднанні па інтарэсах на прафарыентацыйных пляцоўках.
Наведвальнікаў запрашалі паслухаць яркія выступленні агітбрыгад, паназіраць за работай вопытных і маладых прафесіяналаў у “Горадзе майстроў”, паўдзельнічаць у майстар-класах і пры жаданні захаваць свае ўражанні на здымках у разнастайных фотазонах. Падрабязныя кансультацыі з першых вуснаў па дапрофільнай і профільнай прафесійнай падрыхтоўцы ў школах, спецыяльнасцях і ўмовах навучання ў каледжах, перспектывах працаўладкавання выпускнікоў можна было атрымаць не толькі ад навучэнцаў і педагогаў, але і ад дырэктараў навучальных устаноў. Нездарма штораз на выставу-продаж мэтанакіравана прыходзяць будучыя абітурыенты: як класамі ці арганізаванымі групамі пад кіраўніцтвам настаўнікаў, так і самастойна, з сябрамі, бацькамі.
Па словах начальніка галоўнага ўпраўлення па адукацыі аблвыканкама Дзмітрыя Хомы, кожнае такое мерапрыемства накіравана найперш на прафарыентацыю праз наглядную дэманстрацыю таго, што ўмеюць установы адукацыі. Разам з тым, безумоўна, для іх гэта магчымасць зарабіць, для кіраўнікоў і педагогаў — абмяняцца вопытам, абмеркаваць новыя ідэі і сумесныя праекты, а для навучэнцаў — азнаёміцца з дасягненнямі равеснікаў, папрактыкавацца ў продажы ўласнаручна вырабленай прадукцыі і пераканацца ў яе запатрабаванасці.
Паколькі ў разгары вясна, большасць пакупнікоў рупліва прыцэньвалася да саджанцаў, кветкавай і агародніннай расады, бульбы і насення, драўлянай мэблі, мангалаў і сельскагаспадарчага інвентару, іншых карысных вырабаў для дома з прысядзібным участкам або дачы. Напрыклад, Віцебскі дзяржаўны тэхнічны каледж прапаноўваў кампактныя дзіцячыя спартыўныя комплексы, садова-паркавыя мініяцюры, настольныя гульні як для дзяцей, так і для дарослых. Аматараў вела- і мотатэхнікі як магнітам прыцягвала экспазіцыя Аршанскага дзяржаўнага механіка-эканамічнага каледжа, дзе на азнаямленчай пляцоўцы размясціліся адноўленыя ў майстэрнях легенды айчыннага аўтапрама. Сярод прыгажуноў-матацыклаў вылучаўся спартыўны “Мінск”: на рэспубліканскай выставе тэхнічнай і інавацыйнай творчасці гэтая работа адзначана дыпломам I ступені ў намінацыі “Прамысловы дызайн”. Не меншай папулярнасцю карыстаўся выстаўлены побач незвычайны ліхтар чыгуначніка ўзору сярэдзіны мінулага стагоддзя: навучэнцы сумесна з выкладчыкамі ўдасканалілі рарытэт, цяпер ён здольны працаваць як на газе, так і на сучаснай сонечнай батарэі.
Бойка ішоў гандаль прадуктовымі вырабамі: як гатовымі, так і паўфабрыкатамі. Гурманы з раніцы ўпадабалі пляцоўкі Аршанскага дзяржаўнага каледжа харчавання, Віцебскага дзяржаўнага індустрыяльнага і Відзаўскага дзяржаўнага каледжаў. Тут штораз можна не проста падсілкавацца і запасціся таннымі прадуктамі, але і азнаёміцца з інавацыйнымі харчовымі навінкамі, пашырыць кулінарную эрудыцыю і навыкі гатавання страў. Варта дадаць, арыгінальныя пачастункі (нярэдка па мясцовых рэцэптах) прапаноўваліся паўсюдна: напіткі на травах, піца “Школьная”, піражкі, размаляваныя пернікі, каўбасы, дранікі і бліны са cкваркамі — смаката!
Святочную атмасферу ўдала падтрымлівалі аніматары і самадзейныя артысты. На галоўнай канцэртнай пляцоўцы творчую феерыю стварылі для гледачоў лепшыя самадзейныя калектывы ўстаноў адукацыі. Скразной ніткай праз іх выступленні, афармленне фотазон і выставачных экспазіцый праходзіла тэма гістарычнай памяці, удзячнасці абаронцам роднай зямлі, якія адстаялі мір і незалежнасць Радзімы ў баях з гітлераўцамі. Па даўняй традыцыі ветэраны Вялікай Айчыннай вайны, малалетнія вязні фашызму, ветэраны педагагічнай працы — самыя ганаровыя госці абласных выстаў. Дарэчы, пры продажы любой прадукцыі для іх прадугледжаны значныя скідкі, па магчымасці арганізуецца дастаўка набытага на дом.
Між тым кірмаш паступова блізіўся да завяршэння. Прадаўцы задаволена ўсміхаліся: удалы дзень, і надвор’е не падвяло — ні дажджынкі! Наведвальнікі спяшаліся дадому з пакупкамі. На вачах пусцелі кузавы грузавікоў з агароднінай і зернем, вырашчанымі на палетках каледжаў сельскагаспадарчага профілю. Бліжэй да полудня бульбу было ўжо цяжка знайсці: распрадалі. А праз гадзіну-дзве тое ж можна было сказаць пра большую частку прывезенай прадукцыі.
Таццяна БОНДАРАВА
Фота аўтара
