Урок мужнасці правялі для прадстаўнікоў Выдавецкага дома “Педагагічная прэса” шасцікласнікі сярэдняй школы № 1 Хоцімска, які стаў адным з самых яркіх і эмацыянальных момантаў прэс-туру па Магілёўскай вобласці. Хлопчыкі і дзяўчынкі падзяліліся легендарнымі гісторыямі сваякоў, якія абаранялі краіну падчас Вялікай Айчыннай вайны. Падрабязнасці – у матэрыяле карэспандэнта “Настаўніцкай газеты”.
Шасцікласнікі 1-й хоцімскай школы правялі каласальную пошукавую работу. Яны разам з бацькамі і класным кіраўніком Наталляй Мяньшэнінай сабралі ўнікальную інфармацыю, апрацавалі яе і цяпер прадстаўляюць на школьных мерапрыемствах. Лісты з фронту прадзедаў, гісторыі лёсаў простых салдат і жыхароў, якія знайшлі ў сабе сілы змагацца з ворагам, выклікаюць буру эмоцый. Навучэнцы ганарацца сваімі продкамі і разумеюць, што, дзякуючы іх маленькім і вялікім подзвігам, могуць жыць у мірнай краіне.
Увогуле, у 1-й хоцімскай школе грамадзянска-патрыятычны напрамак рэалізуецца і ў час летніх канікул. У навучальнай установе дзейнічае музей, які з’яўляецца пляцоўкай для арганізацыі мерапрыемстваў для дзяцей, якія наведваюць школьны лагер. Музейная экспазіцыя ахоплівае розныя перыяды развіцця Хоцімшчыны і налічвае не адну сотню экспанатаў.
Работу ў гэтым напрамку развіваюць і ў хоцімскім раённым цэнтры творчасці дзяцей і моладзі “Ветразь надзей”. У прыватнасці, педагог Надзея Кавалёва расказала пра гістарычныя вандроўкі з дзецьмі, падчас якіх вядзецца адпаведная пошукавая дзейнасць. Напрыклад, яны здолелі знайсці пацвярджэнні генацыду падчас вайны ў адносінах да землякоў. Зразумела, што ў летні перыяд не робіцца перапынак у такой дзейнасці. Адпаведная работа працягваецца.
Да таго ж у цэнтры творчасці арганізаваны лагер “Родничок”. Тут дзеці адпачываюць, займаючыся творчасцю. Зрабіць аплікацыю або намаляваць аўтапартрэт у поўны рост — вельмі захапляльна. Як і паўдзельнічаць у спартыўных гульнях, відавочцамі якіх мы сталі ў сярэдняй школе № 2 Хоцімска. Хлопчыкі і дзяўчынкі з вялікім азартам бегалі, скакалі, лоўка штурхалі перад сабой гімнастычныя палкі і спрытна пераапраналіся ў гімнасцёркі. Тут арганізаваны аздараўленчы лагер “Патрыёт” і рэалізуецца праект “Мая малая радзіма”. Дзеці разам з педагогамі вывучаюць славутасці роднага краю і гісторыі герояў, чые імёны носяць вуліцы пасёлка. Разнастаіць адпачынак можна ў басейне, які нядаўна пабудавалі на тэрыторыі школы, і на новай спартыўнай пляцоўцы, абсталяванай сучаснымі трэнажорамі.
Як адзначыў начальнік аддзела па адукацыі Хоцімскага райвыканкама Алег Ткачоў, у раёне падчас летняй аздараўленчай кампаніі кожная навучальная ўстанова не толькі імкнецца арганізаваць арыгінальную забаўляльную праграму, але і робіць кожны дзень для хлопчыкаў і дзяўчынак карысным. У рэгіёне пільна сочаць за харчаваннем і рэжымам дня дзяцей.
***
У Касцюковіцкім раёне падчас другога дня прэс-туру прадстаўнікоў Выдавецкага дома “Педагагічная прэса” мы таксама знаёміліся з арганізацыяй летняга адпачынку дзяцей і падлеткаў.
У Касцюковіцкай раённай гімназіі дзейнічае аздараўленчы лагер з дзённым знаходжаннем “Разумнікі і разумніцы”. Як адзначыла яго начальнік Наталля Моціна, у аснове дзейнасці — распрацоўка модульных праектаў. Гэтым летам педагогі і навучэнцы працуюць над ініцыятывай “Галактык.by”, у межах якой дзеці праз творчасць, тэматычны пазнавальны матэрыял вывучаюць космас. А натхніла гімназічных педагогаў на рэалізацыю такога напрамку першая беларуская жанчына-касманаўт Марына Васілеўская. Нам жа была прадстаўлена творчая справаздача дзейнасці гімназічнага лагера. Дзеці ў песнях, танцах і вершах падзяліліся сваімі ўражаннямі: ім вельмі падабаецца такі адпачынак.
Шырокім спектрам дзейнасці ўразіў Касцюковіцкі раённы цэнтр дзіцячай творчасці. Тут арганізаваны аздараўленчы лагер мастацкага профілю “Мара”. У мінулым годзе яго ўдзельнікі атрымалі дыплом ІІ ступені ў акцыі “Правільнае лета” ў намінацыі “Дзіцячы аўтапоезд”. Цяпер “Мару” з задавальненнем наведваюць 40 школьнікаў. І гэта нядзіўна, бо педагогі цэнтра — людзі творчыя і апантаныя. Напрыклад, дырэктар Аляксандр Перапечын займаецца гістарычнай рэканструкцыяй (у 2011 годзе стварыў клуб “Ратнік”) і робіць гэта прафесійна. Кальчугі, мячы, коп’і, шлемы, шатры — усё выглядае сапраўдным, таму прыцягвае ўвагу і дзяцей, і дарослых.
У сярэдняй школе № 1 Касцюковіч ужо не першы год арганізоўваецца профільны аздараўленчы лагер “Абаронца Айчыны”, які наведваюць 65 вучняў. Дырэктар школы Святлана Касцянкова расказала, што напрыканцы змены заўсёды праводзіцца ваенна-патрыятычная гульня “Зарніца”, дзе дзеці дэманструюць свае спартыўныя і ваенныя навыкі. У гэтым годзе яна праходзіла з удзелам начальніка групы прызыву на вайсковую службу Касцюковіцкага РВК маёра Паўла Гарбачова.
У Мурынборскай сярэдняй школе ў лагеры працы і адпачынку “Імпульс” навучэнцы працуюць на школьным агародзе і не толькі. Тэрыторыя навучальнай установы ўражвае сваёй дагледжанасцю: роўны газон, прыгожыя кветнікі і праполатыя грады, на якіх растуць морква, буракі, цыбуля, капуста, бульба. Акрамя таго, як зазначыла дырэктар школы Ніна Дыліка, ужо трэці раз вучні школы далучацца да ўдзельнікаў сельскагаспадарчага студэнцкага атрада “Зорка” імя воіна-інтэрнацыяналіста М.К.Брындзікава, дзе змогуць падзарабіць.
Падводзячы вынікі сустрэчы, начальнік аддзела па адукацыі Касцюковіцкага райвыканкама Алена Хомчанка заўважыла, што летні адпачынак дзяцей і працоўная дзейнасць падлеткаў у раёне арганізаваны з улікам пажаданняў школьнікаў і бацькоў.
“Кожная ўстанова адукацыі мае свае традыцыі, але штогод імкнёмся прыўносіць нешта новае, каб усім было цікава”, — адзначыла Алена Сямёнаўна.
І атрымліваецца сапраўды цікава, бо ў кожнай з наведаных устаноў мы бачылі эмоцыі дзяцей — радасць, захапленне, натхненне і задавальненне.
Вольга ДУБОЎСКАЯ
Фота Алега ІГНАТОВІЧА