Сфарміраваць у дзяцей маральныя ўстоі і правільныя духоўныя арыенціры. Для педагогаў Добраўскай сярэдняй школы Горацкага раёна гэта адзін з прыярытэтаў адукацыйнай дзейнасці. Падрабязнасці – у матэрыяле карэспандэнта “Настаўніцкай газеты”.
— Сучасныя навучэнцы ўсюды акружаны інфармацыйнымі патокамі, дзе папулярызуюцца матэрыяльныя даброты. Паняцці адказнасці, прыстойнасці, чалавекалюбства перастаюць быць дамінантнымі ў свядомасці большасці маладых людзей. У гэтых умовах маральнае выхаванне набывае асаблівую значнасць. Усім калектывам імкнёмся ствараць у школе адаптыўнае асяроддзе, якое садзейнічае духоўнаму станаўленню дзяцей, — расказала дырэктар Марына Блахіна.
Духоўна-маральны складнік уваходзіць ва ўсе кампаненты вучэбнага працэсу. На ўроках, перапынках, выхаваўчых мерапрыемствах педагогі далучаюць вучняў да праваслаўных каштоўнасцей, стараюцца закласці ў дзіцячыя душы правільныя перакананні. Разумець асновы хрысціянства школьнікі вучацца на факультатыве “Духоўна-маральная культура і патрыятызм”.
— На занятках шмат гаворым вучням аб праваслаўных традыцыях, нацыянальных якасцях, уласцівых беларускаму народу. Сумесна абмяркоўваем знакавыя гістарычныя падзеі, канкрэтныя прыклады праяўлення патрыятызму. Даволі часта арганізуем тэматычныя тэатралізаваныя пастаноўкі па матывах праваслаўных свят. Усё гэта ў комплексе дапамагае выхоўваць сумленнасць і міласэрнасць, фарміруе ў дзяцей любоў да блізкіх і адданасць Радзіме, — паведаміла настаўніца пачатковых класаў Наталля Клачкова.
Навучэнцы актыўнічаюць у сацыяльна значных справах і дабрачыннасці. Разам з педагогамі яны шмат робяць для захавання гістарычнай памяці пра воінаў — абаронцаў Айчыны. Школьнікі заўсёды гатовы адгукнуцца і прыйсці на дапамогу ветэранам, адзінокім пажылым людзям, аднагодкам, якія маюць абмежаваныя магчымасці.
— Усе мерапрыемствы арганізуем у цесным узаемадзеянні з сем’ямі навучэнцаў. Мы ўпэўнены: плён будзе тады, калі ідэалы, якія трансліруюцца ў школе, падтрымліваюцца ў сям’і. У выхаванні дзяцей бацькі — галоўныя памочнікі настаўнікаў. У нас дзейнічае бацькоўскі клуб “Дамашні ачаг”. Для мам і татаў рэгулярна праводзяцца круглыя сталы, камунікатыўныя пляцоўкі, — адзначыла Наталля Аляксандраўна.
Добраўская школа цесна супрацоўнічае з прадстаўнікамі Беларускай Праваслаўнай Царквы. Асабліва трывалыя кантакты ва ўстанове наладжаны з настаяцелем храма Божай Маці “Спадарожніца хлябоў”, размешчанага ў Горках.
— Іерэй Мікіта Храмянкоў — часты госць школы. Ён удзельнічае ў святах, праводзіць духоўныя гутаркі з навучэнцамі і бацькамі. Адкрытыя размовы прыносяць вынік. Шэраг нядобранадзейных сем’яў пасля дыялогаў са святаром перагледзелі свае паводзіны, — расказала настаўніца беларускай мовы і літаратуры Вікторыя Ісакава.
Багаты вопыт выхаваўчай работы калектыў школы зараз абагульняе ў рамках рэалізацыі рэспубліканскага інавацыйнага праекта. Знакавым дасягненнем стала стварэнне рэсурснага цэнтра і перамога ў рэспубліканскім конкурсе “Выхаваць чалавека”, прысвечаным памяці Героя Беларусі мітрапаліта Філарэта.
— Духоўна-маральнае развіццё асобы з’яўляецца складаным, шматпланавым працэсам. І тут патрэбна аб’яднанне намаганняў сям’і, школы і святароў. У нашай навучальнай установе многае зроблена ў гэтым напрамку, але на дасягнутым не спыняемся. Педагогі распрацавалі лэпбукі, прэзентацыі, відэазамалёўкі, наглядныя дыдактычныя матэрыялы. У найбліжэйшы час плануем адкрыць тэматычна аформлены кабінет, дзе будзем праводзіць метадычныя мерапрыемствы, заняткі для вучняў, — падкрэсліла Марына Блахіна. — У планах таксама пошук новых эфектыўных форм выхавання. Будзем працягваць укладваць у сэрцы дзяцей праваслаўныя ісціны з надзеяй на тое, што гэтыя нормы стануць асновай іх светапогляду.
Ганна СІНЬКЕВІЧ
Фота аўтара
