Аляксандр ЛУКАШЭНКА: “Адказнасць наша найвышэйшая, таму што нас выбірае народ”

Прэзідэнт Беларусі Аляксандр Лукашэнка разлічвае на далейшы рост прафесіяналізму парламента. Аб гэтым кіраўнік дзяржавы заявіў на сустрэчы са Старшынёй Палаты прадстаўнікоў Нацыянальнага сходу Уладзімірам Андрэйчанкам.

У 2016 годзе ў краіне павінны прайсці парламенцкія выбары. Прэзідэнт звярнуў увагу, што дэпутаты цяперашняга склікання павінны прыняць актыўны ўдзел у падрыхтоўцы да выбарчай кампаніі, якая мае адбыцца. На думку кіраўніка дзяржавы, неабходна ўзмацніць работу ў акругах з насельніцтвам, аказаць мясцовым уладам дадатковую дапамогу ў вырашэнні рэгіянальных праблем. Такія меры павінны пасадзейнічаць таму, каб у новы парламент прыйшлі актыўныя і падрыхтаваныя людзі, якія змогуць вырашаць праблемы сацыяльна-эканамічнага развіцця краіны.
Аляксандр Лукашэнка адзначыў, што гэта работа на дзяржаву, у такім выпадку няма патрэбы гуляць у нейкую незразумелую дэмакратыю.
“Адказнасць наша найвышэйшая, таму што нас выбірае народ. Ён бачыць нас перш за ўсё”, — падкрэсліў прэзідэнт. Аляксандр Лукашэнка выказаў задавальненне работай парламентарыяў бягучага склікання. Разам з тым ён дадаў, што будзе рабіць усё для таго, каб у парламент выбіраліся яшчэ больш прафесійныя дэпутаты.
Прэзідэнт Беларусі Аляксандр Лукашэнка заявіў, што плануе прыняць удзел у заключным пасяджэнні парламента пятага склікання.
Кіраўнік дзяржавы адзначыў, што хацеў бы на гэтым пасяджэнні абмеркаваць з парламентарыямі надзённыя праблемы. Прэзідэнт заклікаў Уладзіміра Андрэйчанку не знімаць з парламенцкага кантролю актуальныя пытанні, падключаць да іх вырашэння дэпутатаў, нягледзячы на тое, што Нацыянальны сход цяперашняга склікання ў гэтым годзе завяршае сваю работу. Парламенту таксама трэба будзе завяршыць пачатае ў заканадаўчай дзейнасці і прыняць неабходныя краіне ў першую чаргу дакументы.
Прэзідэнт падкрэсліў, што парламент у Беларусі заўсёды быў своеасаблівай шкалой кадраў. “Людзі тут на працягу чатырох гадоў атрымліваюць вельмі моцную падрыхтоўку. Страціць такі кадравы патэнцыял недапушчальна”, — сказаў Аляксандр Лукашэнка. Кіраўнік дзяржавы лічыць, што найбольш здольных, прафесійна адораных парламентарыяў пасля завяршэння дэпутацкіх паўнамоцтваў неабходна прыцягваць у народную гаспадарку, у органы кіравання і г.д.

Пакінуць каментарый

Ваш электронны адрас не будзе апублікаваны. Абавязковыя палі пазначаны *