Беларусь прыме на аздараўленне сірыйскіх дзяцей

Прэзідэнт Беларусі Аляксандр Лукашэнка падпісаў распараджэнне аб выдзяленні сродкаў для арганізацыі адпачынку ў краіне сірыйскіх дзяцей у жніўні 2017 года. Аб гэтым паведамілі ў прэс-службе кіраўніка дзяржавы.

Аздараўленне ў Беларусі з 14 па 28 жніўня пройдуць 80 дзяцей з Сірыі. Прычым адна палавіна з іх будзе аздараўлівацца ў Нацыянальным дзіцячым адукацыйна-аздараўленчым цэнтры “Зубраня” за кошт рэспубліканскага бюджэту, другая будзе адпачываць у дзіцячым аздараўленчым лагеры “Крынічка” філіяла “Мінская гарадская тэлефонная сетка” РУП “Белтэлекам” за кошт сродкаў мясцовага бюджэту Мінска.

У праграму адпачынку будуць уключаны аздараўленчыя і забаўляльныя мерапрыемствы, экскурсійная праграма, накіраваная на азнаямленне з беларускімі традыцыямі і культурай.

Рэалізацыя праекта па аздараўленні сірыйскіх дзяцей у Беларусі стане паслядоўным прадаўжэннем канструктыўнага развіцця беларуска-сірыйскага супрацоўніцтва, а таксама аказання гуманітарнай дапамогі. Гэта будзе садзейнічаць фарміраванню дружалюбных адносін паміж беларускімі і сірыйскімі дзецьмі, умацаванню пазітыўнага іміджу нашай краіны за мяжой.