Добры прыклад для астатніх краін

Цесныя і плённыя адносіны паміж Беларуссю і Расіяй з’яўляюцца прыкладам для іншых краін. Аб гэтым заявіў статс-сакратар — намеснік міністра замежных спраў Расіі Рыгор Карасін у інтэрв’ю карэспандэнту БелТА і журналістам СМІ Саюзнай дзяржавы.

“Вельмі цесныя і плённыя адносіны практычна ва ўсіх сферах паміж Мінскам і Масквой — добры прыклад для астатніх краін, — сказаў Рыгор Карасін. — Таму што Саюзная дзяржава — гэта вышэйшая форма інтэграцыйнай мадэлі. Услед за гэтым з’явіўся Мытны саюз, цяпер ён ператвораны ў Еўразійскі эканамічны саюз, які актыўна дзейнічае”.

Высокапастаўлены дыпламат заўважыў, што апаненты, у тым ліку за мяжой, часта адзначаюць, што беларускі і расійскі бакі нярэдка дыскутуюць наконт цэн, тарыфаў і іншых пытанняў. “Калі людзі блізка жывуць адно з адным і ўзаемадзейнічаюць ва ўсіх сферах, цалкам зразумела, што ўзнікае цэлая сума пытанняў, якія неабходна адрэгуляваць”, — падкрэсліў намеснік кіраўніка МЗС Расійскай Федэрацыі.

Ён нагадаў, што Беларусь і Расія ўстанавілі дыпламатычныя адносіны падпісаннем адпаведнага пратакола 25 чэрвеня 1992 года. “Нягледзячы на тую блізкасць, якая традыцыйна характарызавала нашы сувязі як на палітычным, так і на чалавечым, міжасобасным узроўні, гэта быў неабходны крок, прыняты ў дыпламатычнай практыцы, які даў магчымасць на новым этапе дзвюм краінам абмяняцца дыппрадстаўніцтвамі на ўзроўні пасольстваў”, — сказаў Рыгор Карасін.

Ён адзначыў, што за мінулыя два з паловай дзесяцігоддзі сфарміравана ўстойлівая інфраструктура ўзаемадзеяння па ўсіх напрамках сумеснай работы і не ў апошнюю чаргу дзякуючы механізму сумесных калегій, які ў той ці іншай форме эфектыўна функцыянуе паміж большасцю беларускіх і расійскіх ведамстваў.

“Выкананне палажэнняў аб стварэнні Саюзнай дзяржавы ад 8 снежня 1999 года дало магчымасць забяспечыць роўнасць правоў грамадзян дзвюх краін у многіх сферах, паглыбленне гуманітарных сувязей, пашырэнне ўзаемадзеяння ў эканамічнай сферы, дасягненне высокага ўзроўню прамысловай і навукова-тэхнічнай кааперацыі, — прадоўжыў намеснік міністра. — Планы на будучыню ў нас таксама маштабныя. Аб іх зусім нядаўна ішла размова на пасяджэнні Савета Міністраў Саюзнай дзяржавы 8 снежня ў Гомелі, дзе быў адобраны канцэптуальны дакумент — прыярытэтныя напрамкі і першачарговыя задачы далейшага развіцця Саюзнай дзяржавы на 2018—2022 гады. Пасля яго зацвярджэння на чарговым пасяджэнні Вышэйшага дзяржсавета Саюзнай дзяржавы будзем гатовы пачаць яго актыўную рэалізацыю”.

Пакінуць каментарый

Ваш электронны адрас не будзе апублікаваны. Абавязковыя палі пазначаны *