Дом, у якім мы жывём

Што больш за ўсё хвалюе зараз адзінаццацікласнікаў і іх бацькоў? Безумоўна, выпускныя экзамены, здача цэнтралізаванага тэсціравання, паступленне. Як і многіх дзевяцікласнікаў, канечне. А калі ўсе гэтыя этапы будуць пройдзены, шчасліўчыкі, якія паступяць у абраную ўстанову адукацыі, задумаюцца над тым, дзе жыць і як жыць. Лепш за ўсё, канечне, у студэнцкім інтэрнаце, прычым толькі ў сталіцы дзясяткі тысяч студэнтаў розных устаноў адукацыі жывуць менавіта там. Ды і сама такая магчымасць — ужо цудоўна, бо месцаў пакуль хапае не кожнаму. Але яшчэ больш шанцуе тым, хто жыве ў лепшых інтэрнатах горада.

Стары інтэрнат на новы лад

Па выніках гарадскога агляду-конкурсу 2016 года лепшым у сваёй намінацыі прызнаны інтэрнат № 1 Беларускага дзяржаўнага эканамічнага ўніверсітэта, што на вуліцы Бабруйскай, недалёка ад чыгуначнага і Цэнтральнага аўтобуснага вакзалаў Мінска. Зразумела, “Настаўніцкая газета” не магла не пацікавіцца, што ж вылучае гэты інтэрнат сярод іншых.

Часовае жыллё для студэнтаў факультэта камерцыі і турыстычнай індустрыі, а ў гэтым (адным з 8 інтэрнатаў БДЭУ) жывуць толькі яны, размяшчаецца ў будынку аж 1956 года пабудовы. Першая думка, калі даведваешся пра гэта: як яны здолелі заняць першае месца, маючы настолькі стары будынак, асабліва пры наяўнасці ў Мінску навюткіх сучасных інтэрнатаў у студэнцкай вёсцы? Аднак здолелі. І таму, што ўніверсітэт капітальна адрамантаваў будынак, і таму, што тут наладжана выхаваўчая работа, студэнцкае самакіраванне, сувязь студэнтаў з адміністрацыяй УВА, арганізаваны вольны час, добраўпарадкавана тэрыторыя. А конкурс на лепшы інтэрнат — гэта не толькі высвятленне таго, у якім з іх лепш арганізаваны быт і ўмовы пражывання, хаця і яны, безумоўна, улічваюцца. Камісія наогул літаральна зазірае ў кожную шчыліну, калі наведвае інтэрнаты (арганізатары агляду-конкурсу — галоўнае ўпраўленне ідэалагічнай работы, культуры і па справах моладзі і камітэт па адукацыі Мінгарвыканкама).

Інтэрнат № 1 разлічаны на 242 студэнты, тут амаль столькі пастаянна і пражывае. Адзін пакой на першым паверсе бывае заняты не заўсёды: ён абсталяваны для студэнтаў з фізічнымі асаблівасцямі, і цяпер падчас сесій у ім разам з маці жыве іншагародняя студэнтка-завочніца з праблемамі апорна-рухальнага апарату. Для такіх людзей у інтэрнаце таксама абсталяваны пандусы на вуліцы і ўнутры будынка.

Іншыя студэнты, а ў пераважнай большасці гэта дзяўчаты, жывуць у блоках, дзе размешчаны пакоі на два чалавекі. Хтосьці нават жыве адзін. У кожным блоку свае санвузлы і кухні. З’явіліся гэтыя выгоды тут параўнальна нядаўна: капітальны рамонт, ці, можа, правільней сказаць, маштабная рэканструкцыя скончана ў 2011 годзе і доўжылася прыкладна чатыры гады. Прычым большая частка грошай на рамонт — гэта пазабюджэтныя сродкі ўніверсітэта. А сярод выгод тут ёсць яшчэ спартыўная зала з трэнажорамі і абсталяваннем, гасцёўня на першым паверсе, пакоі для самападрыхтоўкі, пральня, іншыя зручнасці. Дарэчы, усё, уключаючы заняткі ў спартыўнай зале, абсалютна бясплатна. А раней тут быў звычайны інтэрнат калідорнага тыпу са “зручнасцямі” і кухняй на паверсе.

Праўда, трапіць у лепшы інтэрнат эканамічнага ўніверсітэта і ўсяго горада не так проста. У БДЭУ, дзе разам з завочнікамі вучыцца больш за 17 тысяч чалавек, наогул не самая простая сітуацыя з засяленнем студэнтаў: месцаў хапае толькі для 51,3% дзяўчат і хлопцаў. Кожны, хто атрымаў месца ў інтэрнаце, вельмі цэніць гэта і стараецца замацавацца на ім, вылучаючыся вучобай, паводзінамі, удзелам у грамадскім жыцці. Спрыяе гэтаму і невысокая штомесячная плата. Зараз яна складае 27,6 рубля ў месяц за месца ў інтэрнаце № 1. Пры гэтым няважна, вучыцца студэнт на бюджэтным ці пазабюджэтным аддзяленні, галоўныя крытэрыі, як я ўжо сказала, іншыя.

І, зразумела, тыя, хто мае льготы — сіроты і г.д., атрымліваюць месцы адразу. А рашэнне аб засяленні прымае дэканат разам са студсаветам факультэта.

Не апошняе слова ў вырашэнні гэтага пытання мае студэнцкі савет інтэрната, які ўзначальвае трэцякурсніца Вольга Маісеенка. Савет вырашае пытанні пакарання тых, хто праштрафіўся, скажам, карыстаўся забароненымі электрапрыборамі, і заахвочвання тых, хто, напрыклад, вылучыўся ў спорце, грамадскай дзейнасці, навуковай рабоце. Максімальна часта ў пасяджэннях савета стараюцца ўдзельнічаць дэкан факультэта Сяргей Іванавіч Скрыба і яго намеснік Аляксандр Іванавіч Ярчак. Нярэдка наведваюць інтэрнат і куратары курсаў.

Ад бібліятэкі да музея

— Мы, як і адміністрацыя УВА, імкнёмся ведаць пра кожнага студэнта як мага больш, — гаворыць загадчык інтэрната Людміла Пятроўна Кароткая. — І пра вучобу, і пра захапленні, і пра сям’ю, каб лепш улічваць іх інтарэсы і патрэбнасці. Нядаўна наш выхавальнік Таццяна Уладзіміраўна Казак разам са студэнтамі-актывістамі правяла анкетаванне жыхароў інтэрната і была здзіўлена таму, як актыўна студэнты на яго адазваліся. Высветлілася, напрыклад, што некаторыя жадаюць сустрэцца з псіхолагам, таму мы плануем у хуткім часе стварыць псіхалагічны праект.

“Усіх, хто ўпершыню засяляецца ў інтэрнат, мы аўтаматычна ўключаем у нашу групу “УКантакце”, — дадае Т.У.Казак, — каб прыцягнуць да агульнага жыцця, падтрымаць.

У групе размяшчаем усе аб’явы, навіны, абмяркоўваем спрэчныя пытанні. Ёсць група і ў “Інстаграме”.

На момант нашага наведвання інтэрната ў адным з агульных пакояў былі раскладзены малюнкі тутэйшых жыхароў, якія раней удзельнічалі і зараз збіраюцца ўдзельнічаць ва ўнутрыінтэрнацкай выставе. Таксама ў пакоі ёсць тэлевізар і абсталяванне для гуртка караоке, які арганізавалі самі студэнты. Дарэчы, усе гурткі арганізоўваюць студэнты. І, канечне, яны бясплатныя. А ўвогуле, ініцыятыўнай моладзі хапае. Якраз з адной такой энтузіясткай, аматаркай фітнесу, першакурсніцай Сашай Буранковай мы і пазнаёміліся. Яна не толькі любіць фітнес, але і далучае да заняткаў іншых. Дзяўчына паказала нам блок, у якім жыве і якім цалкам задаволена.

На кожным паверсе адна са сцен занята фотаздымкамі на тэму адпачынку на канікулах, з выявамі хатніх любімцаў, змешчана выстава работ студэнта, які ўжо даўно займаецца мастацкай фатаграфіяй. Ёсць у інтэрнаце і свая бібліятэка, якая адкрылася не так даўно. Пакуль яна невялікая, але пастаянна папаўняецца. Так, зусім нядаўна ў ёй з’явілася кніга, якую на Міжнароднай мінскай кніжнай выставе-кірмашы выйграла адна з жыхарак інтэрната.

Але, бадай, самы цікавы пакой гэтага дома для студэнтаў — музей беларускага побыту і культуры, дзе сабраны карціны, кнігі, рэчы штодзённага ўжытку нашых продкаў, мастацкія вырабы, засушаныя травы, з якіх беларусы традыцыйна гатуюць чай. Студэнты збіралі ўсё самі, і работа гэтая працягваецца. Атрымліваецца цікава, прыгожа. А галоўнае — музей жывы, актыўна выкарыстоўваецца. Так, Максім Майсюк, студэнт БДЭУ, які жыве ў інтэрнаце, вялікі прыхільнік беларускай мовы і культуры, у Міжнародны дзень роднай мовы праводзіў тут мерапрыемства для студэнтаў. Арганізавала ж музей трэцякурсніца Валерыя Мурына (адкрыўся ён у кастрычніку). Экскурсіі на рускай і беларускай мовах для жадаючых таксама праводзяць Лера і Максім.

А яшчэ студэнты ездзяць на экскурсіі, якія таксама самі арганізоўваюць, разам наведалі футбольны матч “Беларусь — Іспанія”, пабывалі на рыцарскім турніры ў Лідскім замку. Пры гэтым жыхары інтэрната № 1 далучаюць да сваіх заняткаў і іншых студэнтаў, у тым ліку замежных. Так, нядаўна падчас Тыдня беларускай кухні ў музеі інтэрната правялі “Дранік-батл” для ўсіх жадаючых студэнтаў факультэта.

— Студсавет — гэта мая правая рука, а Таццяна Уладзіміраўна актыўна займаецца выхаваўчай работай. Яна настолькі захоплена справай, што нярэдка застаецца ў інтэрнаце да позняга вечара, — гаворыць напрыканцы нашай экскурсіі ў інтэрнат Л.П.Кароткая.

***

У розныя гады ў гарадскім аглядзе-конкурсе перамагалі розныя інтэрнаты розных навучальных устаноў. Па выніках конкурсу 2015 года пераможцам быў інтэрнат № 2 Беларускага дзяржаўнага ўніверсітэта інфарматыкі і радыёэлектронікі, 2014-га — інтэрнат № 10 Беларускага дзяржаўнага медыцынскага ўніверсітэта. І калі былыя і цяперашнія пераможцы і лаўрэаты не будуць зніжаць планку, то хутка пра многія інтэрнаты можна будзе сказаць, што яны лепшыя.

Марына ХІДДЖАЗ.
Фота Алега ІГНАТОВІЧА.

Пакінуць каментарый

Ваш электронны адрас не будзе апублікаваны. Абавязковыя палі пазначаны *