Эфектыўны педвопыт — на канферэнцыі ў АПА

На мінулым тыдні ў Акадэміі паслядыпломнай адукацыі прайшла Рэспубліканская канферэнцыя “Эфектыўны педагагічны вопыт: ад тэорыі да практыкі”. У мерапрыемстве прыняло ўдзел каля 300 педагагічных работнікаў устаноў адукацыі краіны ўсіх узроўняў, у тым ліку 53 настаўнікі кваліфікацыйнай катэгорыі “настаўнік-метадыст”.

Канферэнцыя была арганізавана Акадэміяй паслядыпломнай адукацыі, грамадскім аб’яднаннем “Беларускае педагагічнае таварыства”. Мэта — абмеркаванне асноўных напрамкаў дзейнасці па выяўленні, абагульненні, прадастаўленні і распаўсюджванні эфектыўнага педагагічнага вопыту. Самымі актыўнымі ўдзельнікамі сталі педагагічныя работнікі Магілёўскай вобласці, колькасць якіх склала 27% ад агульнай лічбы.

На пленарным пасяджэнні рэктар Акадэміі паслядыпломнай адукацыі Андрэй Манастырны ў сваім выступленні спыніўся на інфармацыйным суправаджэнні інавацыйнай дзейнасці, якое дазволіць удасканальваць сістэму працы з установамі адукацыі па рэалізацыі інавацыйных праектаў.

Аб асноўных напрамках метадычнага суправаджэння эфектыўнага педагагічнага вопыту расказала ўдзельнікам канферэнцыі намеснік дырэктара Сінькоўскага ясляў-сада — сярэдняй школы Смаргонскага раёна Галіна Жалевіч.

Начальнік каардынацыйнага цэнтра “Адукацыя ў інтарэсах устойлівага развіцця” Беларускага дзяржаўнага педагагічнага ўніверсітэта імя Максіма Танка старшыня Асацыяцыі настаўнікаў-метадыстаў Рэспублікі Беларусь “Імкненне” Інеса Зубрыліна ў сваім выступленні зрабіла акцэнт на змесце прафесійнай дзейнасці настаўніка-метадыста.

Начальнік цэнтра развіццёвых педагагічных тэхналогій АПА Іван Фёдараў прэзентаваў новы вучэбна-метадычны дапаможнік “Вопыт педагагічнай дзейнасці: выяўленне, абагульненне, апісанне і распаўсюджванне”.

Акрамя таго, на пленарным пасяджэнні ішла гаворка пра ролю педагагічнага савета ў фарміраванні прафесійных кампетэнцый педагога (намеснік дырэктара па вучэбнай рабоце сярэдняй школы № 19 Магілёва Ганна Шэпелева) і асобасна-прафесійнае развіццё настаўніка на аснове аналізу індывідуальнага педагагічнага вопыту (настаўнік працоўнага навучання настаўнік-метадыст сярэдняй школы № 1 Слаўгарада Эдуард Гардзееў).

Для ўдзельнікаў канферэнцыі была арганізавана работа чатырох секцый: “Сучасныя методыкі і тэхналогіі навучання як аснова эфектыўнага педагагічнага вопыту”, “Сістэма работы па арганізацыі праектнай і даследчай дзейнасці”, “Метадычнае суправаджэнне эфектыўнага педагагічнага вопыту” і “Інфармацыйныя тэхналогіі ў арганізацыі адукацыйнага працэсу”.

У кожнай з секцый былі цікавыя і карысныя выступленні. У прыватнасці, намеснік дырэктара па вучэбнай рабоце настаўнік-метадыст Таццяна Бязносава гаварыла пра сацыялізацыю навучэнцаў на ўроках грамадазнаўства праз фарміраванне сацыяльна-працоўных кампетэнцый. Настаўнік матэматыкі настаўнік-метадыст сярэдняй школы № 20 Оршы Валерый Герасімаў расказваў пра будову школьнага курса матэматыкі для 1—6 класаў на аснове прынцыпу сістэмнай дыферэнцыяцыі як найважнейшага рэсурсу інавацыйных тэхналогій навучання.

Настаўніца інфарматыкі сярэдняй школы № 10 Светлагорска Алена Асадчая дзялілася сістэмай работы па фарміраванні сацыяльнай паспяховасці навучэнцаў праз канструяванне робатаў і праграмаванне іх дзеянняў. А настаўніца пачатковых класаў сярэдняй школы № 2 Касцюковіч Ала Чахунова дзялілася трэнінгавымі тэхналогіямі ў цьютарскім суправаджэнні даследчай дзейнасці малодшых школьнікаў.

“Прэзентацыя вопыту на кваліфікацыйным экзамене на вышэйшую катэгорыю” стала тэмай выступлення прафесара кафедры педагогікі і менеджменту адукацыі Акадэміі паслядыпломнай адукацыі Мікалая Запрудскага. Настаўніца хіміі і біялогіі настаўнік-метадыст сярэдняй школы № 42 Мінска Алена Гарбар гаварыла пра аўтарскае вучэбна-метадычнае забеспячэнне адукацыйнага працэсу “Методыка арганізацыі і правядзення ўрокаў абагульнення і сістэматызацыі ведаў”.

Настаўніца абслуговай працы настаўнік-метадыст сярэдняй школы № 3 Пружан Галіна Зуй у сваім выступленні расказвала пра сеткавую супольнасць як эфектыўны інструмент абагульнення педагагічнага вопыту, аўтарскіх методык. І тут жа настаўніца беларускай мовы і літаратуры Хальчанскай базавай школы Веткаўскага раёна Алена Мігаль падзялілася вынікамі рэалізацыі міжпрадметных сувязей на аснове матэрыялаў абласнога віртуальнага адукацыйнага рэсурсу “Белы ветразь”.

118 чалавек (42%) прынялі ўдзел у рабоце секцый, выступілі з дакладамі на пленарным пасяджэнні. Па выніках рэспубліканскай канферэнцыі будзе выпушчаны электронны зборнік матэрыялаў, у які ўвойдзе 275 артыкулаў.

Вольга ДУБОЎСКАЯ.