Гаспадыня школьнага дома

Яна стала педагогам у 19 гадоў. Пасля заканчэння Ваўкавыскага педагагічнага вучылішча Ала Іванаўна Галавенка пачала працаваць настаўніцай у першым класе. Выбар прафесіі быў жаданым. І вось ужо больш за 30 гадоў школа — родны дом для настаўніцы.

Свае першыя крокі ў прафесіі Ала Іванаўна ўспамінае з цеплынёй. Па-першае, навучэнцы першага класа — гэта сама непасрэднасць. І калі хто-небудзь з дзетак, забыўшыся, звяртаўся да маладзенькай настаўніцы: “Мама, паглядзі, мама, хадзі сюды!” — адчуванне адказнасці за іх павялічвалася. Па-другое, калектыў лідскай школы № 4, дзе Ала Іванаўна працавала на працягу 10 гадоў, стаў тым падмуркам, які дапамог зразумець, як трэба працаваць у школе і ўдасканальвацца.

— Вельмі хацелася працаваць, засвойваць новыя методыкі, фантазіраваць разам са сваімі навучэнцамі, — успамінае А.І.Галавенка. — І як было прыемна, калі праз шмат гадоў — тады я ўжо стала дырэктарам 12-й гродзенскай школы — мае першыя навучэнцы знайшлі мяне праз інтэрнэт. Такі падарунак памяці. Я іх таксама памятаю і люблю.

Яна і зараз ведае ўсіх навучэнцаў сваёй школы, а вучацца тут 650 вучняў.

Жаданне самаўдасканальвацца і вучыцца ніколі не пакідала педагога, таму А.І.Галавенка вырашыла прадоўжыць адукацыю і паступіла на філалагічны факультэт Гродзенскага дзяржаўнага ўніверсітэта імя Янкі Купалы.

— Я добра памятаю сваіх настаўнікаў з Урцішскай школы, што ў Іўеўскім раёне, і вельмі ім удзячна. Але, напэўна, у кожнага навучэнца самым вялікім аўтарытэтам з’яўляецца ўсё ж такі адзін педагог. Для мяне гэта настаўніца рускай мовы і літаратуры Ганна Сяргееўна Ханчэўская, — успамінае Ала Іванаўна. — Я не проста захаплялася яе прадметам, мне падабалася, як яна вяла ўрок. Дома паўтарала яе рухі і марыла, як сама буду весці ўрок.

Другі этап прафесійнага жыцця Алы Галавенка звязана з гродзенскай школай № 12. Тут яна пачынала працаваць як настаўніца рускай мовы і літаратуры, пасля была завучам, і вось апошнія пяць гадоў — дырэктар. Калі прапанавалі гэтую пасаду, вагалася, але ж падтрымкай было тое, што Ала Іванаўна добра ведала магчымасці калег і патрабаванні школы. Да таго ж вельмі хацелася ўвасобіць у жыццё сваё бачанне школы як сапраўднага дома для навучэнцаў, іх бацькоў, а таксама педагогаў, школы, якая павінна развівацца і рыхтаваць дзяцей да адказнага жыцця праз актыўную дзейнасць на карысць навучэнцам, педагогам, грамадству. З 2016 года сярэдняя школа № 12 з’яўляецца членам асацыяцыі “Адукацыя для ўстойлівага развіцця”.

Больш за 30 гадоў у 12-й школе вучацца дзеці з асаблівасцямі псіхафізічнага развіцця. Інклюзія — гэта магчымасць не толькі дапамагаць такім дзецям, але і ўсім астатнім навучэнцам бачыць іх праблемы і жыць побач, дапамагаць у сацыялізацыі. Гэта як лакмусавая паперка для нас, гаворыць Ала Іванаўна. Валанцёрскі рух “Школа чалавечнасці” рэалізаваў восем праектаў і адзначаны за перамогі ў конкурсах.

Пярвічная арганізацыя БРСМ школы два гады запар з’яўляецца лепшай у Гродне, а ў мінулым годзе стала лепшай у вобласці. Школьны атрад юных інспектараў руху — 8-разовы пераможца абласнога агляду-конкурсу, пераможца гарадскіх конкурсаў і алімпіяд па Правілах дарожнага руху, прызёр рэспубліканскіх злётаў.

Акрамя таго, школа № 12 тройчы станавілася пляцоўкай для рэалізацыі рэспубліканскіх інавацыйных праектаў. Больш за восем гадоў рэалізоўвае праграмы экалагічнага выхавання, а ў 2014 годзе стала ўдзельнікам конкурсу праектаў “Энергаэфектыўная ўстанова адукацыі”, перамога ў якім дазволіла атрымаць матэрыяльную дапамогу ў памеры 3,5 тысячы еўра і на гэтыя грошы стварыць музей-лабараторыю “Школа руплівых гаспадароў”, якая зараз з’яўляецца цэнтрам экалагічнага выхавання і для жыхароў мікрараёна, выхаванцаў дзіцячых садкоў. На абласным і рэспубліканскім этапах конкурсу “Энергамарафон” 12-я школа займала 1-е і 2-е месцы. А зусім нядаўна “Школа руплівых гаспадароў” была адзначана спецыяльным фондам Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў (больш падрабязна пра дзейнасць школы па выхаванні ў навучэнцаў прынцыпаў рацыянальных адносін да прыродных рэсурсаў чытайце на стар. 8 нумара).

У 2015 годзе школа прыняла актыўны ўдзел у рэалізацыі міжнароднага праекта My eco country, накіраванага на распаўсюджванне ведаў пра энергаэфектыўны лад жыцця, уключэнне дзяцей у даследчую і творчую дзейнасць па прапагандзе энергазберажэння, а нядаўна завяршыўся ініцыіраваны навучальнай установай праект міжнароднага маладзёжнага супрацоўніцтва “Энергазберажэнне ў фармаце 5D”.

— Сёння настаўнік павінен быць генератарам ідэй — толькі тады ён будзе цікавы сваім вучням, — гаворыць Ала Іванаўна. — Вельмі зацікаўлена ў маладых настаўніках, яны нясуць новы зарад, новыя погляды, а мы са свайго боку дапамагаем ім не расчаравацца ў прафесіі. Люблю бываць на іх уроках і прашу паказаць усё самае лепшае, што ўмеюць маладыя настаўнікі. Цаню чалавечыя якасці: сумленнасць, адказнасць і, канечне, прафесіяналізм. Ала Іванаўна выкладае рускую мову і літаратуру ў 6-х класах. На пытанне, ці строгі яна настаўнік, адказвае, што лічыць важным даваць шанс кожнаму навучэнцу, не караць, а натхняць. Для школьнікаў гэта прынцып “адкладзенай адзнакі”, для педагогаў — праз добрае слова і падтрымку матываваць на лепшую работу.

Начальнік аддзела адукацыі, спорту і турызму Кастрычніцкага раёна Гродна Алена Адамовіч адзначае арганізатарскія якасці А.І.Галавенка, якія дапамагаюць школе не толькі ўдасканальваць вучэбны і выхаваўчы працэс, але і атрымліваць грошы на рэалізацыю шматлікіх праектаў і развіваць адукацыйнае асяроддзе ўстановы. А калега па школе Галіна Богдан дадае, што Ала Іванаўна — вельмі добры метадыст і педагог, чые ўрокі дзеці пачынаюць з “Ура!”, а заканчваюць “Ужо?”, гэта гаспадыня, якая клапоціцца пра дабрабыт школьнага дома 24 гадзіны ўсе 365 дзён года.

А на заканчэнне яшчэ адзін факт, які характарызуе школу і яе дырэктара: настаўнік беларускай мовы і літаратуры Павел Ушкевіч стаў пераможцам раённага этапу Рэспубліканскага конкурсу прафесійнага майстэрства педагагічных работнікаў “Настаўнік года Рэспублікі Беларусь”.

Надзея ВАШКЕЛЕВІЧ.
Фота аўтара.

Пакінуць каментарый

Ваш электронны адрас не будзе апублікаваны. Абавязковыя палі пазначаны *