Падрыхтоўка сучасных канкурэнтаздольных спецыялістаў, развіццё ў іх камунікабельнасці, індывідуальнасці і ўпэўненасці ў заўтрашнім дні — асноўныя прынцыпы работы Баранавіцкага дзяржаўнага прафесійна-тэхнічнага каледжа сферы абслугоўвання. З 2003 года ўстанова ажыццяўляе падрыхтоўку рабочых (служачых) як з прафесійна-тэхнічнай адукацыяй, так і спецыялістаў з сярэдняй спецыяльнай адукацыяй для сферы абслугоўвання і лёгкай прамысловасці.
Каледж аператыўна рэагуе на змяненні ў сацыяльным, культурным і эканамічным жыцці нашай краіны і карэкціруе пералік спецыяльнасцей і прафесій. Так, побач з прафесіямі швачкі, краўца, закройшчыка, цырульніка, зборшчыка абутку, па якіх ужо даўно вядзецца падрыхтоўка, за апошнія гады было арганізавана навучанне страхавых агентаў, прадаўцоў — кантралёраў-касіраў, майстроў па манікюры. Акрамя таго, у каледжы можна працягнуць навучанне па прафесіях узроўню сярэдняй спецыяльнай адукацыі — мадэльера-канструктара, мастака-мадэльера. Дарэчы, удзельнікаў прэс-туру ўстанова сустрэла яркімі музычнымі нумарамі, парадам мадэлей адзення, выставай работ навучэнцаў. Тут быў арганізаваны фестываль творчых аб’яднанняў па інтарэсах, які выклікаў вялікую цікавасць у школьнікаў і жыхароў горада. Госці маглі азнаёміцца з асаблівасцямі прафесій, па якіх ідзе падрыхтоўка ва ўстанове.
— Штогод каледж паспяхова выконвае кантрольныя лічбы прыёму навучэнцаў дзякуючы сфарміраванаму станоўчаму іміджу ўстановы адукацыі, вялікай прафарыентацыйнай рабоце, якая праводзіцца як са школамі горада і рэгіёна, так і з арганізацыямі — заказчыкамі кадраў, — расказвае дырэктар каледжа Святлана Уладзіміраўна Шышына. — Выпускнікі каледжа запатрабаваны на рынку працы. Доказам гэтага з’яўляецца штогадовае 100-працэнтнае працаўладкаванне. Штогод больш за 50% выпускнікоў атрымліваюць 4 і вышэйшы кваліфікацыйны разрад. Навучаючыся асноўнай спецыяльнасці, ёсць магчымасць атрымаць дадатковую адукацыю па прафесіях цырульніка, візажыста, майстра па манікюры, майстра па педыкюры, адміністратара, швачкі, прадаўца; закончыць адукацыйныя курсы “1С Прадпрыемства”, “Бухгалтарскі ўлік”, “Дамашняе атэлье”, курсы падрыхтоўкі да цэнтралізаванага тэсціравання, курсы для пажылых людзей, якія асвойваюць ПК, і інш. Атрыманае пасведчанне дзяржаўнага ўзору дазволіць выпускніку пашырыць магчымасці працаўладкавання.
Педагагічны калектыў каледжа плённа працуе ў напрамку інфарматызацыі адукацыйнага працэсу. Сёння ва ўстанове ёсць 5 камп’ютарных кабінетаў, мабільны камп’ютарны клас, лінгафонны кабінет, інтэрактыўныя комплексы, мультымедыйнае абсталяванне, пастаянны доступ у інтэрнэт і інш. Укараненне інфармацыйных тэхналогій адбываецца па розных напрамках (вучэбная работа, прафарыентацыя, выхаваўчая работа і праектна-даследчая дзейнасць).
— Навучэнцы прыносяць у каледж усё больш мабільных прылад, прычым выкарыстоўваюць іх у асноўным для забавы (гульняў і зносін у сацыяльных сетках), часам для работы на ўроках (атрымаць даведку з “Вікіпедыі”, перавесці словы або фразы праз праграму-перакладчык, папрацаваць з тэкстамі кніг на занятках, прачытаць даклады з мабільных прылад), для падрыхтоўкі дамашніх заданняў, — расказвае метадыст каледжа Наталля Васільеўна Герасімовіч. — У такой сітуацыі натуральным з’яўляецца выкарыстанне магчымасцей мабільных прылад навучэнцаў на ўроку. У сувязі з гэтым другі год у каледжы рэалізоўваецца інавацыйны праект “Укараненне тэхналогій мабільнага навучання ў адукацыйны працэс устаноў прафесійнай адукацыі”.
Педагогамі каледжа апрабавана тэхналогія стварэння і правядзення ўрокаў з выкарыстаннем мабільных прылад, сфарміраваны ўменні і навыкі выкарыстання іх інструментаў і дадаткаў. У гэтым змаглі пераканацца ўдзельнікі прэс-туру, наведаўшы фрагменты ўрокаў па прыкладной інфарматыцы (правяла Т.М.Бегер), таваразнаўстве харчовых тавараў (К.В.Паклонская), а таксама фрагмент пазакласнага мерапрыемства “Год малой радзімы”, якое арганізавала выкладчыца англійскай мовы І.Г.Алексіч. Навучэнцы працавалі з QR-кодамі, з заданнямі інтэрнэт-курсаў, распрацаваных педагогамі і размешчаных на платформе Moodle (дарэчы, усяго на сайце каледжа ў раздзеле “Віртуальная школа” размешчана каля 20 курсаў, і кожны навучэнец, атрымаўшы ад выкладчыка лагін і пароль, мае магчымасць самастойна вывучыць тэарэтычны матэрыял, праглядзець відэа і прэзентацыі, рашыць задачы, выканаць кантрольны тэст, разгадаць крыжаванку і г.д.), быў арганізаваны тэлемост з музеем. Было відаць, што выкарыстанне інтэрактыўных форм работы павышае пазнавальную матывацыю, дазваляе актыўна ўключыць кожнага ў працэс засваення вучэбнага матэрыялу, вучыць навыкам паспяховых зносін.
Адзін з вызначальных фактараў развіцця навучальнай установы — навукова-даследчая работа. У каледжы на працягу 10 гадоў дзейнічае навуковае таварыства “Веды. Пошук. Творчасць”. Штогод яго членамі з’яўляюцца каля 40 навучэнцаў. Расце колькасць і якасць даследчых работ і праектаў, прадстаўленых як на навукова-практычнай канферэнцыі “З навукай у будучыню”, якая праводзіцца ўнутры каледжа, так і абласной. Пры гэтым прыярытэты аддаюцца праектам прафесійнай накіраванасці, работам у галіне інфармацыйных тэхналогій, сацыяльным праектам.
Асаблівую цікавасць у сваіх даследчых праектах навучэнцы праяўляюць да швейнай справы. Гэтыя праекты арыентаваны на захаванне народных традыцый у дэкаратыўна-прыкладной творчасці, дапамагаюць ва ўдасканаленні прафесій-
нага майстэрства. Многія праекты, створаныя ў выніку праектна-даследчай і творчай дзейнасці, былі ўкаранёны ў вытворчасць швейных майстэрняў і рэсурснага цэнтра каледжа. Некаторыя з іх (куртка-рукзак, сумка-арганайзер, калекцыя адзення “Маленькая какетка” і інш.) рэалізаваны насельніцтву, а таксама выкарыстоўваюцца
як сцэнічныя касцюмы для мастацкіх калектываў горада і раёна.
Работы навучэнцаў удастойваюцца рознага ўзроўню дыпломаў на Міжнародным фестывалі “Неўскія берагі” ў Санкт-Пецярбургу, “Эстэт б’юці экспа” ў Кіеве, рэспубліканскіх конкурсах “Млын моды”, “Белыя росы”, “Ружа вятроў”, “ Натхненне”, “Галерэя стылю” і многіх іншых. Добрых вынікаў дасягнулі сёлета навучэнцы каледжа — удзельнікі Рэспубліканскага конкурсу “Млын моды” Вольга Басарановіч з калекцыяй “Лепарэла”, Валерыя Карташова з калекцыяй дзіцячага адзення “Мотаверсія”, Марына Блакіцкая з калекцыяй жаночага адзення “У месячным святле”. Сёлета на Міжнародным фестывалі творчых прафесій “Мінскі вернісаж” Алена Лапатко была ўзнагароджана дыпломам у намінацыі “Дызайн жаночага адзення ад куцюр”, а Лізавета Саакава атрымала дыплом як мастак-дызайнер па касцюмах на Міжнародным фестывалі прыгажосці “Неўскія берагі”.
У апошнія гады члены навуковага таварыства пад кіраўніцтвам педагогаў ствараюць і рэалізоўваюць сацыяльныя праекты. Адзін з іх — “Жыць у памяці пакаленняў…” — накіраваны на рэканструкцыю і добраўпарадкаванне сквера імя М.Ц.Сцепанішчава. Праект завершаны: атрымалася нават перайменаваць прылеглы аўтобусны прыпынак у “Сквер імя М.Ц.Сцепанішчава”, стварыць і ўсталяваць памятны знак і памятную дошку, вырабіць і ўстанавіць у скверы памятны абеліск.
У снежні 2017 года каледж перамог у Міжнародным конкурсе сацыяльных праектаў “Не побач, а разам”, які рэалізоўваецца за кошт фінансавых сродкаў, атрыманых ад нямецкага фонду “Памяць, адказнасць і будучыня”. Мэтай праекта з’яўляецца стварэнне ўмоў для ўзаемадзеяння падлеткаў з пажылымі людзьмі з мэтай паляпшэння якасці жыцця старэйшага пакалення, аказання ім дапамогі.
Укараніць у адукацыйны працэс перадавыя тэхналогіі і максімальна наблізіць умовы навучання да вытворчых дазволіла адкрыццё ў 2015 годзе рэсурснага цэнтра па напрамку “Тэхналогія вытворчасці швейных вырабаў”. Сёння рэсурсны цэнтр — гэта 6 швейных майстэрняў і 3 лабараторыі, аснашчаныя найноўшым высокатэхналагічным вучэбна-вытворчым абсталяваннем. У цэнтры рэалізоўваюцца праграмы для навучання хлопцаў і дзяўчат сваёй установы і ўстаноў адукацыі Брэстчыны прыёмам работы і стварэння вырабаў на сучасным абсталяванні, уменню працаваць у праграме аўтаматызаванага праектавання адзення “Аўтакрой”. Вучэбная версія гэтай праграмы дазваляе ў рэжыме рэальнага часу праектаваць любы швейны выраб ад распрацоўкі мадэлі да стварэння камплекта лякал.
За 4 гады работы рэсурснага цэнтра тут прайшлі навучанне 2765 чалавек, на яго базе праходзяць стажыроўку майстры вытворчага навучання і выкладчыкі спецыяльных прадметаў, што дазваляе своечасова асвойваць новыя тэхналогіі ў вытворчасці. Прафесійная падрыхтоўка, перападрыхтоўка і павышэнне кваліфікацыі праводзяцца для педагагічных работнікаў устаноў базавай і сярэдняй адукацыі (настаўнікаў працы). З верасня 2018 года ў каледжы арганізавана прафесійная падрыхтоўка навучэнцаў 10—11 класаў агульнаадукацыйных школ Баранавіч па кваліфікацыі “аператар швейнага абсталявання”. Гэтую прафесію сёлета асвойвалі
53 дзесяцікласнікі. На базе рэсурснага цэнтра працуе вучэбнае атэлье, дзе ажыццяўляецца як індывідуальны пашыў, так і стварэнне вырабаў дробнымі партыямі па заказах насельніцтва, прадпрыемстваў, арганізацый, устаноў адукацыі, у тым ліку і на аснове даследчых работ дзяцей.
Удзельнікі прэс-туру змаглі пабачыць дыпломныя работы выпускнікоў спецыяльнасці “Мастак-мадэльер”, якія праходзілі практыку ў рэсурсным цэнтры, — шыкоўныя кактэйльныя і крэатыўныя прычоскі.
Да новага навучальнага года плануецца ўвесці ў эксплуатацыю другі корпус рэсурснага цэнтра. На яго рэканструкцыю і аснашчэнне з абласнога бюджэту выдзелена 1,4 млн рублёў, з рэспубліканскага — 306 тысяч рублёў. Пачало ўжо паступаць першае абсталяванне.
Адукацыйнае асяроддзе каледжа дазваляе навучэнцам развівацца ў прафесіі. Яны творча падыходзяць да справы, самарэалізоўваюцца ў абранай спецыяльнасці, імкнуцца да пазнання ўсіх яе тонкасцей, вучацца эфектыўна ўзаемадзейнічаць адно з адным, браць адказнасць за вынік зробленай работы, прымаць рашэнні ў стандартных і нестандартных сітуацыях.
Наталля КАЛЯДЗІЧ.
Фота Алега ІГНАТОВІЧА.
