Вынікі інавацыйнай работы навучальныя ўстановы рэгіёна дэманстравалі падчас метадычнага фестывалю, які штогод арганізуецца абласным інстытутам развіцця адукацыі. Гэта ўжо традыцыя, якая дае педагогам магчымасць абмяняцца перадавым вопытам. Падрабязнасці — у матэрыяле карэспандэнта «Настаўніцкай газеты».
Зараз па вобласці актыўнай інавацыйнай дзейнасцю займаюцца звыш 160 ўстаноў дашкольнай, агульнай сярэдняй, дадатковай і спецыяльнай адукацыі.
Тэматыка эксперыментальных пляцовак даволі разнастайная. Гэта распрацоўка мадэлей грамадзянска-патрыятычнага выхавання, фарміраванне метапрадметных кампетэнцый навучэнцаў ва ўмовах інфарматызацыі, эканамічнай і экалагічнай культуры, функцыянальнай і чытацкай дасведчанасці, нацыянальнай ідэнтычнасці вучняў, аптымізацыя кіравання педагагічнай самаадукацыяй і іншыя напрамкі.
— Інавацыйная дзейнасць ва ўстановах адукацыі ажыццяўляецца ў адпаведнасці з рэалізацыяй мэт устойлівага развіцця. Педагагічныя калектывы вобласці займаюцца інавацыямі масава і актыўна. Спектр распрацовак таксама шырокі. Работа ідзе ва ўзаемадзеянні з іншымі ведамствамі, што дазваляе развівацца па найбольш актуальных напрамках. Важна, што лепшы вопыт трансліруецца і рэкамендуецца да паўсюднага ўкаранення, — падкрэсліў першы намеснік начальніка галоўнага ўпраўлення па адукацыі Магілёўскага аблвыканкама Ігар Лашкевіч.
У ходзе фестывалю адбылося пленарнае пасяджэнне і работа ў тэматычных секцыях. Сумесна педагогі абмеркавалі шэраг надзённых для рэгіянальнай сістэмы адукацыі пытанняў. Асаблівы акцэнт быў зроблены на развіцці прафесійнай кампетэнтнасці педагогаў, механізмах комплекснай падтрымкі інавацый.
Ганна СІНЬКЕВІЧ
Фота аўтара