Моладзь — фактар перамен

На беразе Нарачы моладзь з розных краін спявала эквадорскія песні, выконвала венесуэльскія танцы, іграла на кітайскіх народных інструментах. Ён не перашкаджаў моўны бар’ер, бо ўсе размаўлялі на мове сяброўства. Так праходзіў у НДААЦ “Зубраня” ХІІІ Міжнародны маладзёжны форум “Сяброўства без межаў”.

Удзельнікі адкрытага дыялогу падчас сустрэчы абмеркавалі пытанні адукацыі, маладзёжнай палітыкі, міжнароднага супрацоўніцтва. Усе яны — людзі неабыякавыя да таго, што адбываецца навокал, іх хвалююць розныя пытанні, а форум — цудоўная магчымасць абмеркаваць іх з шырокім колам равеснікаў, даведацца, як аналагічныя праблемы вырашаюцца ў іншых краінах, і знайсці шляхі ўзаемадзеяння для іх сумеснага вырашэння.

Міжнародны маладзёжны форум “Сяброўства без межаў” праводзіцца з 2005 года. За гэты час яго ўдзельнікамі сталі больш за 800 чалавек з 20 краін свету. Сёлета гэта 71 прадстаўнік 13 дзяржаў: Азербайджана, Беларусі, Венесуэлы, Кітая, Латвіі, Літвы, Польшчы, Расіі, Таджыкістана, Туркменістана, Украіны, Эквадора, ЮАР. Арганізатарамі форуму выступаюць Міністэрства адукацыі Рэспублікі Беларусь і НДААЦ “Зубраня”. Сёлета форум праводзіўся ў партнёрстве з Прадстаўніцтвам Дзіцячага фонду ААН (ЮНІСЕФ) у Рэспубліцы Беларусь.

У склад дэлегацый увайшлі маладыя людзі ва ўзросце ад 15 да 31 года — лідары дзіцячых і маладзёжных грамадскіх арганізацый, маладыя спецыялісты, прадстаўнікі муніцыпальных і дзяржаўных органаў кіравання, блогеры і маладыя журналісты, навукоўцы і выкладчыкі ў галіне IT-тэхналогій, кіраўнікі сацыяльных праектаў. Штогод форум становіцца дэмакратычнай пляцоўкай для ўзаемадзеяння творчай моладзі ў абмеркаванні значных грамадскіх праектаў і ініцыятыў, а таксама для прыцягнення ўвагі да праблем моладзі ва ўсім свеце.

Праграма форуму ўключала адукацыйны, спартыўна-аздараўленчы, культурна-забаўляльны і пазнавальна-экскурсійны кампаненты. Арганізатары стварылі цудоўныя ўмовы для работы і адпачынку ўдзельнікаў форуму, а таксама для добразычлівай атмасферы.

Форум пачаўся са знаёмства з краінай, якая гасцінна іх прымала. Моладзь сустрэлася на гульнявой пляцоўцы “Будзем знаёмы” і правяла вечар сяброўства ля вогнішча. Знаёмства з традыцыямі і культурай беларускага народа пачалося з наведвання этнаграфічнай гасцінай “Хутар Неслуч”, а прадоўжылася падчас экскурсій у сталіцу, Мір і Нясвіж.

Удзельнікаў форуму чакала сустрэча “Моладзь як фактар перамен”, падчас якой абмяркоўваліся розныя аспекты маладзёжнай палітыкі, узаемадзеяння з міжнароднымі структурамі, дзіцячага і маладзёжнага супрацоўніцтва.

Фарумчане бралі ўдзел у семінары “Сацыяльная інклюзія падлеткаў з найбольш уразлівых груп у працэсы прыняцця рашэнняў”, а таксама змаглі пашырыць свае веды аб дзейнасці ЮНІСЕФ падчас гульні-квеста.

Больш даведацца аб краінах, што прадставілі свае дэлегацыі, фарумчане змаглі падчас мерапрыемства “Шматкаляровая палітра”. Кожная дэлегацыя рыхтавала прэзентацыйны нумар, у якім прадставіла сваю краіну, яе культурныя традыцыі, расказала пра моладзь і ўстановы адукацыі. Для гэтага юнакі і дзяўчаты спявалі нацыянальныя песні, выконвалі народныя танцы, ігралі на нацыянальных інструментах, паказвалі відэафільмы пра родную краіну.

Важнай падзеяй для ўдзельнікаў форуму стала сустрэча з міністрам адукацыі Рэспублікі Беларусь І.В.Карпенкам, якая прайшла ў Нацыянальным цэнтры мастацкай творчасці дзяцей і моладзі. Міністр звярнуў увагу, што ў рамках рэалізацыі дзяржаўнай маладзёжнай палітыкі міжнароднаму супрацоўніцтву ўдзяляецца вялікая ўвага, і падкрэсліў важнасць правядзення падобных мерапрыемстваў.

— Перакананы, што калі з дапамогай такіх мерапрыемстваў мы сфарміруем палітычную культуру моладзі, то свет стане больш добрым і гуманным. Калі мы будзем лепш разумець адно аднаго, то лягчэй зможам вырашаць розныя сумесныя праблемы.

Удзельнікі сустрэчы мелі магчымасць задаць пытанні міністру. Іх цікавілі перспектывы ўзаемадзеяння паміж Беларуссю і краінамі — удзельніцамі форуму ў сферы адукацыі і маладзёжнай палітыкі, сумесныя праекты.

З многімі краінамі такое ўзаемадзеянне ўжо існуе, — адзначыў міністр. Як, напрыклад, з Кітайскай Народнай Рэспублікай, супрацоўніцтва з якой у сферы адукацыі развіваецца дынамічна.

Паколькі сустрэча адбывалася адразу пасля правядзення IV Форуму рэгіёнаў Беларусі і Расіі, усім было цікава даведацца, якія рашэнні ў сферы адукацыі былі прыняты на форуме. Ігар Васільевіч адзначыў, што работа падчас яго правядзення была надзвычай плённай, было выказана мноства карысных ініцыятыў і прапаноў. У прыватнасці, у хуткім часе вырашана правесці ў Магілёве сумесную калегію міністэрстваў адукацыі Рэспублікі Беларусь і Расійскай Федэрацыі.

Дар’я РЭВА.
Фота аўтара.

Пакінуць каментарый

Ваш электронны адрас не будзе апублікаваны. Абавязковыя палі пазначаны *