Музычныя фарбы цымбалаў

Настаўніца музыкі па класе цымбалаў сярэдняй школы № 116 Мінска заўсёды імкнецца да развіцця эстэтычных пачуццяў, выхоўвае высокі мастацкі густ. Інеса Паўлаўна Азарава — за такое інтэлектуальнае адукацыйнае асяроддзе, у якім дзіця будзе адчуваць сябе камфортна і мець усе магчымасці развіваць сваю індывідуальнасць. Канечне, стварыць яго няпроста, але , па меркаванні Інесы Паўлаўны, настаўнік — гэта заўсёды творчы лідар, генератар ідэй, чалавек, які дае імпульс да імкнення навучэнцаў у дасягненні пэўных мэт. Прынамсі, сама настаўніца менавіта такая.

Свае любімыя цымбалы Інеса Паўлаўна прапагандуе на працягу 23 гадоў. Менавіта столькі яна ў музычнай педагогіцы. “Багаты педагагічны вопыт Інесы Паўлаўны Азаравай, яе здольнасць бачыць і ацэньваць тое, што адбываецца ў адукацыйным асяроддзі музычнага мастацтва, дазваляе ёй прымяняць сучасныя тэхналогіі, нетрадыцыйныя прыёмы і метады вядзення заняткаў”, — гавораць пра яе калегі.

Інеса Паўлаўна з’яўляецца кіраўніком метадычнага аб’яднання настаўнікаў музычнай накіраванасці ў сярэдняй школе № 116 Мінска. Яна актыўна прапагандуе свой педагагічны вопыт на метадычных аб’яднаннях настаўнікаў музыкі, на семінарах-практыкумах рэспубліканскага значэння, у інтэрнэце — на персанальным сайце “Цымбалы — візітная картка Беларусі”, у выданні часопіса “Мастацкая i музычная адукацыя”.

Інеса Паўлаўна з’яўляецца актыўным членам Рэспубліканскай творчай групы настаўнікаў выяўленчага мастацтва і музыкі пры Беларускім педагагічным таварыстве, лаўрэатам Рэспубліканскага завочнага конкурсу метадычных распрацовак настаўнікаў музыкі ў намінацыі “Факультатыўныя заняткі мастацкай накіраванасці”.

За тры гады работы ў 116-й школе Інеса Паўлаўна стварыла два калектывы інструментальнай музыкі: ансамблі “Рамонак” і “Пацешкі”. Зразумела, што карпатлівая, мэтанакіраваная работа прыносіць вынікі. Разам са сваімі гадаванцамі настаўніца паспяхова ўдзельнічае ў Рэспубліканскім адкрытым конкурсе выканаўцаў на народных інструментах імя І.І.Жыновіча, у Рэспубліканскім фестывалі-конкурсе “Перазвон”, у Міжнародным конкурсе таленавітых дзяцей і моладзі “Новыя вяршыні”, у Рэспубліканскім конкурсе музычнага мастацтва Беларусі “Спадчына”, у Міжнародным музычным інтэрнэт-конкурсе Musikcompetition.

Акрамя таго, Інеса Паўлаўна з’яўляецца ўдзельнікам зводнага аркестра настаўнікаў Фрунзенскага раёна і, зразумела, карыстаецца заслужаным аўтарытэтам сярод настаўнікаў, навучэнцаў і бацькоў. У сувязі з гэтым атрыманне прэміі Мінгарвыканкама за эмацыянальна-вобразнае развіццё навучэнцаў на ўроках па класе цымбалаў на аснове сістэмы навучання “Усе фарбы музыкі” (на матэрыяле беларускай мастацкай творчасці) стала абсалютна заканамерным.

— Я з’яўляюся прыхільніцай эмацыянальна-вобразнага развіцця, менавіта таму пры абагульненні вопыту акцэнт у рабоце ставіла на фарміраванне асобы з дапамогай эмоцый і вобразаў. Хацелася як мага больш прадставіць нагляднага матэрыялу і творчых заданняў, якія спрыяюць пашырэнню і паглыбленню эмацыянальнай сферы вучняў. Быў прадстаўлены шырокі спектр магчымасцей выбару для вучняў як пры падборы твораў, так і пры рашэнні заданняў, якія складзены ў кантэксце фарміравання культуры эмацыянальнага свету вучня, што з’яўляецца адным з важных складнікаў усведамлення асобаснага сэнсу любога чалавека, — адзначыла настаўніца.

Педагагічны вопыт, прадстаўлены Інесай Паўлаўнай, узнімае актуальную для музычнай адукацыі праблему развіцця эмацыянальна-вобразнай сферы сучасных школьнікаў.

У якасці асноўнага педагагічнага інструмента яна прапанавала і падрабязна раскрыла ўнікальную сістэму навучання “Усе фарбы музыкі”, якая ўключае праграму (змест, структура, метады навучання), восем тэматычных зборнікаў (нотны матэрыял, заданні, слоўнік эмацыянальных тэрмінаў), музычна-дыдактычны комплекс (геральдычныя рэбусы, музычнае лато, міфалагічныя інтэрвалы, інтэрвальная гульня “Знайдзі другую палавінку”, веер каляровых асацыяцый, гульня лінейна-колеравых асацыяцый “Магнітыус”) і базавыя мадэлі эмацыянальна-вобразнага развіцця вучняў на ўроках па класе цымбалаў. Усе кампаненты методыкі распрацаваны на аснове беларускай мастацкай творчасці.

Вольга ДУБОЎСКАЯ.
Фота Алега ІГНАТОВІЧА.

Пакінуць каментарый

Ваш электронны адрас не будзе апублікаваны. Абавязковыя палі пазначаны *