Найбольш эфектыўны механізм удзелу ўсіх дзяржаў у назначэнні новага генсакратара — рэальнае галасаванне ў Генасамблеі

Беларусь заклікае пазбягаць залішняй рэгламентацыі працэсу назначэння Генеральнага сакратара ААН. Аб гэтым заявіў пастаянны прадстаўнік Беларусі пры ААН Андрэй Дапкюнас у час дыскусіі рабочай групы па актывізацыі дзейнасці Генеральнай асамблеі ААН у Нью-Ёрку, паведамілі ў прэс-службе МЗС Беларусі.

Дыскусія прысвячалася працэдуры падбору і назначэння Генеральнага сакратара ААН. “Андрэй Дапкюнас заклікаў да большага ўзаемнага даверу членаў Генеральнай асамблеі і Савета Бяспекі ААН, што дало б магчымасць пазбегнуць залішняй рэгламентацыі працэсу назначэння генеральнага сакратара”, — праінфармавалі ў прэс-службе.
Група абмеркавала магчымасць назначэння наступнага кіраўніка Сакратарыята ААН на адзін тэрмін без магчымасці прадаўжэння (цяпер склалася практыка назначэння на два пяцігадовыя тэрміны) і ўнясення Саветам Бяспекі ААН на разгляд Генеральнай асамблеі некалькіх кандыдатур, а не адной, як рабілася раней.
У сувязі з частым згадваннем у ААН выбараў як асноўнага інструмента забеспячэння падсправаздачнасці генеральнага сакратара перад дзяржавамі — членамі ААН Андрэй Дапкюнас выказаў меркаванне, што найбольш эфектыўным чынам падсправаздачнасць кіраўніка Сакратарыята ААН можа быць забяспечана не столькі на выбарах раз у 5—7 гадоў, а праз практычныя ініцыятыўныя крокі дзяржаў-членаў і галоўных органаў ААН у адпаведнасці з іх статутнымі паўнамоцтвамі.
Андрэй Дапкюнас чарговы раз звярнуў увагу ўдзельнікаў дыскусіі на тое, што першае за апошнія 50 гадоў рэальнае галасаванне па кандыдатуры генеральнага сакратара ў Генасамблеі ААН, якое павінна адбыцца восенню 2016 года, будзе найбольш эфектыўным механізмам забеспячэння ўдзелу ўсіх без выключэння дзяржаў ААН у назначэнні новага кіраўніка Сакратарыята Арганізацыі Аб’яднаных Нацый. “Вылучаная два гады назад прапанова Беларусі аб неабходнасці дакладнага выканання правіл працэдуры Генеральнай асамблеі ААН, якімі прадугледжана тайнае галасаванне па кандыдатах на пасаду генеральнага сакратара, падтрымана і актыўна адстойваецца аб’яднаннем “Рух недалучэння”, Бразіліяй, Егіптам, Калумбіяй, ПАР, Эквадорам і іншымі краінамі”, — адзначылі ў прэс-службе МЗС.

Пакінуць каментарый

Ваш электронны адрас не будзе апублікаваны. Абавязковыя палі пазначаны *