Парламентарыі сфарміравалі групу дружбы з Беларуссю

- 11:04Інфармацыйная гадзіна

Рабочая група па супрацоўніцтве з парламентам Беларусі сфарміравана ў румынскім парламенце. Размова аб гэтым ішла на сустрэчы Надзвычайнага і Паўнамоцнага Пасла Румыніі ў Беларусі Віярэла Машану з намеснікам старшыні Палаты прадстаўнікоў Баляславам Пірштуком, паведамілі ў прэс-службе Палаты прадстаўнікоў.

Бакі выказаліся на карысць далейшага развіцця двухбаковых адносін на ўзаемнай аснове. У парламенцкай сферы дасягнута дамоўленасць аб актывізацыі абмену візітамі паміж заканадаўчымі органамі абедзвюх дзяржаў на ўзроўні рабочых груп. “Віярэл Машану праінфармаваў Баляслава Пірштука аб тым, што ў красавіку бягучага года ў парламенце Румыніі сфарміравана група дружбы з Беларуссю на чале з сенатарам Іаанам-Крысціянам Кіртэшам”, — расказалі ў прэс-службе.

Удзельнікі сустрэчы таксама сышліся на думцы аб неабходнасці ўмацавання рэгіянальнага дыялогу паміж Беларуссю і Румыніяй для далейшага развіцця гандлёва-эканамічнага супрацоўніцтва па самым шырокім спектры пытанняў.

Апрача іншага, субяседнікі абмяняліся думкамі аб узаемадзеянні парламентарыяў на міжнародных пляцоўках, уключаючы ПА АБСЕ.