Карціну для дзяцей малююць дарослыя. І менавіта ад нас залежыць, што будуць ведаць нашы дзеці пра гераічны подзвіг беларускага народа ў гады Вялікай Айчыннай вайны.
Кожны педагог задаваўся пытаннем, як такую цяжкую тэму данесці да дзіцяці дашкольнага ўзросту. Перад педагогамі стаіць складаная задача: сфарміраваць уяўленне аб гістарычным мінулым краіны на зразумелай для сучаснага дашкольніка мове. Сёння дзіця ўжо не здзівіш традыцыйнай падачай матэрыялу.
Цікавасць дзяцей да гаджэтаў і неабходнасць фарміравання асноў грамадзянска-патрыятычнай культуры натхніла на ідэю стварэння інтэрактыўнага гульнявога дапаможніка “Пункт на карте — Жыткаўшчына”.
Для стварэння гэтага праекта былі вывучаны летапісы вёсак і аграгарадкоў раёна. Праведзена даследчая работа па вывучэнні гісторыі роднага краю. Педагогамі створаны картатэкі патрыятычных гульняў з улікам рэгіянальнага кампанента. Праведзены шэраг заняткаў і гутарак з дзецьмі па маральна-патрыятычным выхаванні.
Каб наладзіць больш цеснае супрацоўніцтва з бацькамі, правялі прадметнае анкетаванне, па выніках якога планавалі ўзаемадзеянне з сем’ямі выхаванцаў. Сумесна з бацькамі вывучаліся змяненні ў гісторыі станаўлення раёна, абапіраючыся не толькі на летапіс, але і на апавяданні бабуль і дзядуляў. Было арганізавана наведванне выстаў, музеяў, экскурсій да гістарычных мясцін, прысвечаных Вялікай Перамозе. Арганізаваны выставы фотагазет, патрыятычных альбомаў, плакатаў.
Зыходзячы з набытай інфармацыі, створаны зборнік “Гісторыя вёсак і гарадоў Жыткавіцкага раёна”, што і лягло ў аснову стварэння інтэрактыўна-гульнявога дапаможніка “Пункт на карце — Жыткаўшчына”.
Інтэрактыўны гульнявы дапаможнік складаецца з дзвюх частак: металічная аснова з магнітнымі пазламі ў выглядзе карты Жыткавіцкага раёна і мультымедыйная ўстаноўка. На металічнай аснове размешчаны магнітныя пазлы, з якіх дзіцяці неабходна сабраць карту Жыткавіцкага раёна (14 пазлаў).
На кожным пазле размешчана кнопка. Пры ўстаноўцы пазла па ўзоры і націску на кнопку пазл пачынае “размаўляць”. І дзіця атрымлівае інфармацыю аб падзеях, якія адбываліся падчас ВАВ на гэтай мясцовасці, яе паходжанні, славутасцях. Таксама на макеце ёсць кнопка, з дапамогай якой агучваецца заданне. Такое інтэрактыўнае ўзаемадзеянне з пазламі стала магчымым дзякуючы выкарыстанню платформы Arduino і флэш-карты. Функцыі флэш-карты дазваляюць змяняць інфармацыю ў залежнасці ад мэты і задач заняткаў, гульні. Візуалізаваць інфармацыю дапамагае падключэнне да камп’ютарнага манітора.
У будучыні плануецца сінхранізаваць манітор з пазлам, што дазволіць візуалізаваць аўдыязапісы. У такім выпадку гэта будуць невялікія мультфільмы, створаныя дзецьмі.
Дзеля распаўсюджвання набытага вопыту ў астатнія дашкольныя ўстановы праект быў прадстаўлены на абласным этапе рэспубліканскага маладзёжнага інавацыйнага праекта “100 ідэй для Беларусі”. Там паступіла прапанова распрацаваць інструкцыю па зборцы інтэрактыўных гульнявых дапаможнікаў і часткова запусціць у вытворчасць неабходныя дэталі.
Стварэнне такога роду дапаможнікаў дазволіць расказаць дзецям дашкольнага ўзросту аб гісторыі свайго народа ў даступнай, сучаснай форме. А педагогам будзе добрым памочнікам для арганізацыі адукацыйнага працэсу.
Працягам праекта “Пункт на карце — Жыткаўшчына” стаў абласны праект “Пункта на карце”, дзе прадстаўлены маршруты выхаднога дня ў якасці відэаролікаў, на якіх самі дзеці запрашаюць наведаць славутасці Гомельскай вобласці, у тым ліку славутасці Тураўскай зямлі Жыткавіцкага раёна.
Алена АЎДЗЕЙЧЫК,
загадчыца дзіцячага сада № 5 Жыткавіч