Сетка мінскіх устаноў адукацыі ў цэлым укамплектавана педагагічнымі кадрамі, аднак пытанні падрыхтоўкі педагогаў, іх прафесійнага росту павінны вырашацца своечасова, адзначыў на выніковай калегіі старшыня камітэта па адукацыі Мінгарвыканкама Андрэй Стрыгельскі, паведамляе карэспандэнт «Настаўніцкай газеты».
— Зніжаецца колькасць настаўнікаў з вышэйшай і першай катэгорыяй (на сёння іх 73 %). Што тычыцца ўстаноў дашкольнай адукацыі, то тут назіраем паляпшэнне паказчыкаў па ўсіх пазіцыях: 67 % педагогаў маюць вышэйшую адукацыю, колькасць выхавальнікаў з адукацыяй па профілі «Педагогіка дзяцінства» павялічылася на 11 %, з першай і вышэйшай катэгорыяй працуюць 54 % педагогаў-дашкольнікаў.
У каледжах назіраецца тэндэнцыя да амаладжэння кадраў. Павялічваецца колькасць работнікаў з вышэйшай адукацыяй. Першую і вышэйшую катэгорыю маюць 60 % педагогаў, што яўна недастаткова. І рэзервы тут ёсць, — мяркуе А. Стрыгельскі.
Найбольш запатрабаваныя спецыяльнасці, дзе фарміруецца пэўны дэфіцыт, — гэта дашкольная, фізіка-матэматычная, лінгвістычная адукацыя і фізічная культура.
На думку старшыні камітэта, патрэба сённяшняга дня — нарошчваць падрыхтоўку такіх спецыялістаў і шукаць рэзервы ў сябе. Ужо адкрыта падрыхтоўка ў Мінскім гарадскім педагагічным каледжы выхавальнікаў суправаджэння, у каледжы рамесніцтва і дызайну — настаўнікаў працоўнага навучання. З гэтага навучальнага года два каледжы — механіка-тэхналагічны і індустрыі моды — сталі рыхтаваць майстроў вытворчага навучання. У 2024-м плануецца ў гарадскім педкаледжы ажыццяўляць падрыхтоўку настаўнікаў фізічнай культуры, у 2025-м — педагогаў-арганізатараў. Таксама будуць нарошчвацца аб’ёмы падрыхтоўкі настаўнікаў пачатковых класаў і выхавальнікаў дашкольнай адукацыі.
У 2023 г. сістэма адукацыі горада папоўнілася маладымі спецыялістамі, іх прыйшло больш за 1100. Пазіцыі па замацавальнасці маладых спецыялістаў палепшыліся: летась 72 % працягнула будаваць сваю кар’еру ў сістэме адукацыі Мінска.
— Галоўнае, каб неабходную ўвагу на месцах атрымаў кожны малады педагог, а не толькі той, хто са студэнцкай лаўкі актыўны і паспяховы. Маладым неабходна падтрымка, якасная работа інстытута настаўніцтва, — лічыць А. Стрыгельскі. — А раёнам неабходна актыўна выкарыстоўваць магчымасць мэтавага навучання, якое з’яўляецца гарантам доўгатэрміновага замацавання маладых спецыялістаў.
Наталля КАЛЯДЗІЧ
