Украіна: рэйтынг ВНУ “ТОП-200 Украіна” 2016 года ўзначаліў Кіеўскі політэхнічны інстытут

У гэтым годзе рэйтынг “Топ-200 Україна” адзначае свой першы юбілей — ён выходзіць дзясяты раз. Стартаваўшы ў 2006 годзе, праект “Топ-200 Україна” стаў першым і застаецца на сёння адзіным акрэдытаваным Міжнароднай экспертнай групай па ранжыраванні (IREG) акадэмічным рэйтынгам ва Украіне. Яго адметнай рысай з’яўляецца спроба параўнаць паміж сабой універсітэты розных тыпаў на аснове прымянення ў адносінах да іх універсальнай сістэмы крытэрыяў.

У 2016 годзе лідарам рэйтынгу “ТОП-200 Україна” стаў Нацыянальны тэхнічны ўніверсітэт Украіны “Кіеўскі політэхнічны інстытут”, які з істотным адрывам ад іншых ВНУ Украіны выйшаў наперад па крытэрыі “Інавацыйная дзейнасць універсітэтаў”.

Па словах кіраўніка праекта “ТОП- 200 Україна” Алесі Лінавіцкай, за апошні год у інавацыйнай экасістэме КПІ Sikorsky Challenge было створана больш за 40 стартапаў, 29 з іх атрымалі інвестыцыі ад прыватных венчурных фондаў і высокатэхналагічных кампаній у агульным аб’ёме 573 млн грыўняў.

Другое месца ў рэйтынгу заняў Кіеўскі нацыянальны ўніверсітэт імя Тараса Шаўчэнкі. Лінавіцкая адзначае, што каманда “ТОП-200 Україна” не здолела атрымаць даныя аб інвесціраванні яго стартапаў прыватнымі венчурнымі фондамі або высокатэхналагічнымі кампаніямі, але Універсітэт Шаўчэнкі мае найбольшае бюджэтнае фінансаванне навукі — каля 85 млн грыўняў, яго выпускнікі шырока запатрабаваны органамі дзяржаўнай улады, універсітэт уваходзіць у 500 лепшых ВНУ свету па рэйтынгу QS і мае самы высокі рэйтынг у Scopus сярод універсітэтаў Украіны.

Трэцяе і чацвёртае месцы занялі харкаўскія ВНУ: Нацыянальны ўніверсітэт імя В.М.Каразіна і Нацыянальны тэхнічны ўніверсітэт “Харкаўскі політэхнічны інстытут” адпаведна. На пятае месца выйшаў Нацыянальны ўніверсітэт “Львоўская політэхніка”, паведамляе “Освіта.UA”.

Пакінуць каментарый

Ваш электронны адрас не будзе апублікаваны. Абавязковыя палі пазначаны *