Урок-чэлендж і настаўнікі-куміры

На гэтым уроку не спатрэбіліся ні класны журнал з адзнакамі, ні падручнікі са складанымі тэмамі і правіламі. Настаўнікамі сталі папулярныя блогеры Дзіма Ермузевіч і Юля Гадунова, за якімі сочаць у сацыяльных сетках больш як 2,5 мільёна чалавек, а новы матэрыял выкладаўся пяцікласнікам падчас відовішчных доследаў. Эксперыментальны водны ўрок-чэлендж прайшоў у сярэдняй школе № 91 Мінска.

У беларускіх школах з пачатку навучальнага года сталі больш жорсткімі патрабаванні да якасці харчавання. Салодкія напіткі з-за колькасці цукру ў іх складзе канчаткова выключылі з меню сталовых і буфетаў, але мала для каго альтэрнатывай ім стала пітная вада. Для таго каб звярнуць увагу на важнасць вады для самаадчування і нават паспяховасці ў школе, прайшоў першы ў Беларусі ўрок у новым фармаце.

Блогеры расказалі не толькі пра ўласцівасці пітной вады на ўроку, але і пра тое, што самі вядуць здаровы лад жыцця. Так, Юля Гадунова выпівае штодня па 5 шклянак вады, а Дзіма Ермузевіч выбраў спартыўны чэлендж, і цяпер яго падпісчыкі сочаць за тым, як кожны тыдзень ён ставіць новыя асабістыя рэкорды і павялічвае фізічную нагрузку.

На гэты раз яны кінулі школьнікам выклік, ці, як сёння кажуць падлеткі, “чэлендж”: жыць па новых правілах — піць чыстую ваду, есці больш садавіны, а не прысмакаў, і чытаць не менш за 5 кніжных старонак у дзень. Пяцікласнікам выдалі спецыяльныя нататнікі, дзе сабраны парады, як любы выклік (зразумела, карысны) ператварыць у займальную і пазнавальную гульню.

А за эксперыментальную частку ўрока адказваў яшчэ адзін госць — Ілья Курашоў, дырэктар музея займальных навук “Квантум”. Хімік па адукацыі, ён правёў разам з вучнямі доследы, якія наглядна і эфектна праілюстравалі ўласцівасці вады. Каб расказаць пра тое, як уздзейнічае вада на наш арганізм у спякоту, падчас хваробы ці пасля фізічнай нагрузкі, яе і афарбоўвалі, і з азотам змешвалі, і нават падпальвалі.

Незвычайны фармат навучання падтрымаў і камітэт па адукацыі Мінгарвыканкама. “Падобны фармат урокаў цікавы, — адзначае намеснік начальніка аддзела выхаваўчай і ідэалагічнай работы камітэта па адукацыі Мінгарвыканкама Надзея Вялікая. — Гэта крэатыўнае, інавацыйнае рашэнне, арыентаванае на здароўе навучэнцаў, на здароўе нацыі ў цэлым. У красавіку Мінску было прысвоена ганаровае званне “Горад, дружалюбны да дзяцей”. І асноўныя індэксы, якія даюць нагоду вызначаць, наколькі горад дружалюбны да дзяцей, тычацца якраз здароўя дзяцей, мерапрыемстваў і праектаў, у якіх задзейнічаны дзеці. І таму нам вельмі цікава такое ўзаемасупрацоўніцтва.

І гэта добры прыклад дзяржаўна-прыватнага партнёрства. Здароўе дзяцей — агульнае, і тут інтарэсы не трэба дзяліць на прыватныя ці дзяржаўныя, а трэба знаходзіць шляхі сутыкнення і праводзіць такія ўрокі на карысць дзецей. Калі вывучэнне пытанняў свайго здароўя ў новым фармаце будзе цікава і дзецям, і іх бацькам, то і мы гатовы супрацоўнічаць і ўкараняць такія інавацыі ў школах, у тым ліку на ўроках па хіміі, біялогіі і інш. Бо сённяшнія педагогі — гэта не фокуснікі, а ўдзельнікі навуковых конкурсаў, аўтары праектаў у галіне экалогіі, медыцыны, будаўніцтва водных збудаванняў. Іх доследы не проста так нараджаюцца: яны добра ведаюць хімію, біялогію, ведаюць хімічныя рэакцыі, якія дэманструюць работу нашага арганізма. Вось чаму дзеці забыліся пра званок і гатовы працягваць урок. І нам трэба, арганізоўваючы мерапрыемствы, узяць на заметку такія формы ўзаемадзеяння, у тым ліку і ў шосты школьны дзень.

Урок-эксперымент абяцае стаць першай ластаўкай. Арганізатары адной толькі карысцю пітной вады абмяжоўвацца не збіраюцца. Абяцаюць расказваць пра важнасць чытання кніг, рэгулярных заняткаў спортам, захавання рэжыму сну.

Святлана НІКІФАРАВА.

Пакінуць каментарый

Ваш электронны адрас не будзе апублікаваны. Абавязковыя палі пазначаны *