Узмоцнена адказнасць за тэрарызм і экстрэмізм

У Казахстане плануецца павялічыць тэрміны пазбаўлення волі, а таксама ўвесці абавязковую канфіскацыю маёмасці за экстрэмізм і тэрарызм. Адпаведны праект закона распрацавала спецыяльна створаная рабочая група, паведаміў старшыня Камітэта нацыянальнай бяспекі Рэспублікі Казахстан Уладзімір Жумаканаў.

“Узмацняецца адказнасць за злачынствы экстрэмісцкага і тэрарыстычнага характару шляхам павелічэння ніжніх і верхніх межаў тэрмінаў пазбаўлення і абмежавання волі, увядзення норм аб канфіскацыі маёмасці ў якасці абавязковай меры пакарання за экстрэмізм і тэрарызм”, — сказаў Жумаканаў, выступаючы на пасяджэнні ўрада Рэспублікі Казахстан.

У цэлым, паводле яго слоў, праект закона аб унясенні змяненняў і дапаўненняў у некаторыя заканадаўчыя акты па пытаннях процідзеяння экстрэмізму і тэрарызму прадугледжвае папраўкі ў шэсць кодэксаў і 18 законаў па шэрагу напрамкаў.

Акрамя таго, прадугледжваецца ўдасканальванне заканадаўства аб ахове аб’ектаў, слаба абароненых у тэрарыстычных адносінах. “Ахоўныя арганізацыі будуць уключаны ў лік суб’ектаў, адказных за забеспячэнне антытэрарыстычнай аховы аб’ектаў, якія яны абараняюць. У выпадку ўхілення ад выканання антытэрарыстычнага заканадаўства прадугледжваецца магчымасць прыпынення дзейнасці аб’ектаў, недастаткова абароненых у антытэрарыстычных адносінах да ўстаранення парушэнняў”, — сказаў Жумаканаў.

Таксама старшыня Камітэта нацыянальнай бяспекі паведаміў, што ў Казахстане плануецца ўзмацніць кантроль за абаротам зброі.

Папраўкі прадугледжваюць узмацненне адміністрацыйнай адказнасці за парушэнне заканадаўства ў гэтай сферы, прадастаўленне падраздзяленням органаў унутраных спраў паўнамоцтваў па праверцы ў асаблівым парадку аб’ектаў, на тэрыторыі якіх ёсць зброя, боепрыпасы і выбуховыя рэчывы, а таксама ўстанаўленне асаблівых патрабаванняў да арганізацый, што ажыццяўляюць ахову такіх аб’ектаў, і ўвядзенне альтэрнатыўнай падследнасці органаў унутраных спраў і нацыянальнай бяспекі па злачынствах у сферы незаконнага абароту зброі, нелегальнай міграцыі і наркабізнесу.

Нагадаем, 18 ліпеня ў 12 гадзін 20 мінут па часе Астаны на тэрыторыі горада Алматы быў уведзены “чырвоны” ўзровень тэрарыстычнай небяспекі. Падставай для ўвядзення крытычнага ўзроўню тэрарыстычнай небяспекі паслужыла нападзенне на будынак Алмацінскага РАУС і Дэпартамента КНБ, праінфармавалі ў Антытэрарыстычным цэнтры Рэспублікі Казахстан. У выніку перастрэлкі ад атрыманых раненняў памерлі чатыры супрацоўнікі паліцыі, адзін пагранічнік і адзін грамадзянін.