Верагоднасць фінансавання тэрарызму праз Беларусь — мізэрная

Існуе мізэрная верагоднасць так званага транзітнага фінансавання тэрарызму праз банкаўскую сістэму Беларусі.
Аб гэтым заявіў дырэктар Дэпартамента фінансавага маніторынгу Камітэта дзяржаўнага кантролю Вячаслаў Рэўт.

“Адсочваць гэтыя аперацыі вельмі складана, — адзначыў Вячаслаў Рэўт. — Але наша задача ў тым, каб выявіць такія транзітныя патокі. Што тычыцца непасрэднага фінансавання тэрарызму з Беларусі, то ступень верагоднасці мізэрная”.
Ён нагадаў аб тэрактах у Іспаніі, калі былі арганізаваны ўзрывы паяздоў. На іх ажыццяўленне спатрэбілася менш як 1,5 тысячы еўра, а на тэракты ў ЗША 11 верасня — усяго $500 тысяч. “Любы фанатызм падтрымліваецца фінансава, немагчыма ваяваць або арганізаваць тэракт без фінансавай дапамогі, — падкрэсліў Вячаслаў Рэўт. — У зоне ІДІЛ цяпер не дзейнічае ніводны банк, але ж хтосьці пастаўляе зброю баевікам для вядзення поўнамаштабнай вайны. Значыць, з нейкіх крыніц грошы паступаюць. З захопленых раёнаў прадаецца нафта — хтосьці ж яе купляе”.
Паводле слоў прадстаўніка Дэпартамента фінансавага маніторынгу, краіны свету, у тым ліку і Беларусь, павінны прымаць актыўны ўдзел у процідзеянні легалізацыі злачынных даходаў і фінансаванню тэрарызму, пастаянна ўдасканальваць нацыянальнае заканадаўства. “Гэта тычыцца бяспекі і нашай краіны таксама”, — дадаў ён.