Захаваць сувязную ніць пакаленняў і абараніць гістарычную праўду

- 9:07Інфармацыйная гадзіна

Больш за 500 мерапрыемстваў рэспубліканскага патрыятычнага праекта “Кветкі Вялікай Перамогі”, прысвечанага 76-й гадавіне перамогі савецкага народа ў Вялікай Айчыннай вайне, правядуць з 1 па 9 мая па ўсёй краіне, паведаміў першы сакратар Цэнтральнага камітэта Беларускага рэспубліканскага саюза моладзі член Савета Рэспублікі Дзмітрый Варанюк.

“Сёння важна не толькі захаваць сувязную ніць пакаленняў і перадаць эстафету памяці маладым сучаснікам, але і больш смела процістаяць спробам скажэння гістарычнай праўды аб гераізме і ролі савецкага народа ў час Вялікай Айчыннай вайны. Менавіта гэтым мэтам адпавядае праект БРСМ “Кветкі Вялікай Перамогі”, сімвал якога — чырвона-зялёная стужачка з яблыневым цветам”, — расказаў Дзмітрый Варанюк.

Актывісты саюза моладзі да 76-й гадавіны Перамогі падрыхтавалі больш за 500 патрыятычных мерапрыемстваў. “Сярод іх — рэспубліканскія інтэрнэт-чэленджы і марафоны “Пісьмо Герою Вялікай Перамогі”, “Беларусь памятае. Кветкі Вялікай Перамогі”, “Беларусь памятае. Ніхто не забыты, нішто не забыта”, “Беларусь памятае. Памятаем кожнага”, “Беларусь памятае. Родныя твары Перамогі”, “Мой фільм аб вайне”, “Песні Вялікай Перамогі”. Літаральна гэтымі днямі мы запусцім новы патрыятычны конкурс “Мы памятаем” для юных выканаўцаў, майстроў мастацкага слова і маладых аўтараў. Акрамя таго, у рэгіёнах пройдуць аўта- і велапрабегі “Дарогамі Перамогі”, творчыя эстафеты, адкрытыя дыялогі, open-air “Беларусь памятае “Кветкі Вялікай Перамогі”, акцыі “Ветэран жыве побач”, “Дзякуй за Перамогу” і іншыя”, — дадаў першы сакратар ЦК БРСМ.

Для ўвекавечання памяці аб невядомых героях валанцёрскія атрады прымуць удзел у правядзенні архіўна-даследчых работ па ўстанаўленні імёнаў, лёсаў і месцаў пахаванняў воінаў, якія загінулі ў гады вайны.

Рэспубліканскі патрыятычны праект БРСМ “Кветкі Вялікай Перамогі” ўпершыню стартаваў у Беларусі ў Год моладзі і быў падтрыманы кіраўніком дзяржавы. Штогод гэтая патрыятычная ініцыятыва аб’ядноўвае дзясяткі тысяч беларусаў.