Замежная мова — ключ да новых адкрыццяў

Гімназія № 1 імя акадэміка Я.Ф.Карскага Гродна — найстарэйшая і адна з лепшых у краіне. Акрамя таго, навучальная ўстанова размешчана ў вельмі маляўнічым кутку горада — у парку Румлёва на беразе ракі Нёман, што стварае асаблівую атмасферу.

Асаблівая ўвага ў гімназіі удзяляецца вывучэнню замежных моў. У якасці асноўнай гімназісты вывучаюць англійскую, нямецкую, французскую мову, у якасці другой прапаноўваюцца англійская, нямецкая, французская, польская, а з 2014 года яшчэ і кітайская мова. З 2016 года гімназія № 1 Гродна ўдзельнічае ў інавацыйным праекце Міністэрства адукацыі “Укараненне мадэлі полікультурнага выхавання ўстановы адукацыі ў выхаваўчую прастору рэгіёна”.

Акрамя вывучэння агульнаадукацыйных прадметаў, навучэнцы (на выбар) займаюцца выяўленчым мастацтвам, танцамі ці ігрой на адным з музычных інструментаў (фартэпіяна, цымбалы, гітара, баян, скрыпка, флейта). У гімназіі дзейнічае ансамбль народных інструментаў “Румлёўскiя зорачкi”, тэатр на французскай мове “Мом”, інтэлектуальны клуб “Дэбаты” на рускай і англійскай мовах, а таксама экалагічнае таварыства “Экасвет”.

За 25 гадоў існавання ва ўстанове склаліся багатыя традыцыі. Тут праводзяцца розныя святы, прадметныя тыдні і дэкады, фестывалі, конкурсы, навукова-практычная канферэнцыя школьнікаў з удзелам гасцей з Літвы, Польшчы, Расіі і розных рэгіёнаў Беларусі. Гімназісты таксама прымаюць удзел у сумесных праектах з аднагодкамі з Літвы, Польшчы, Германіі, Расіі.

“У 2014/2015 навучальным годзе ў нас стала магчымым вывучэнне кітайскай мовы на факультатыўных занятках у 5-х класах. З 2015 года гімназісты прымаюць удзел у алімпіядзе па кітайскай мове.

Улічваючы сучасныя тэндэнцыі ў развіцці двухбаковых адносін паміж Кітайскай Народнай Рэспублікай і Рэспублікай Беларусь, назіраецца рост цікавасці да кітайскай мовы і кітайскай культуры сярод розных катэгорый беларускага насельніцтва і школьнікаў у прыватнасці. У маі 2016 года на базе гімназіі пад эгідай Мінскага дзяржаўнага лінгвістычнага ўніверсітэта быў афіцыйна адкрыты клас Канфуцыя.

Нашы гімназісты зацікаўлены не толькі ў вывучэнні кітайскай мовы, але і знаёмяцца з музыкай, выяўленчым мастацтвам, літаратурай Кітая. У нас ёсць магчымасці і неабходныя ўмовы для правядзення культурных мерапрыемстваў з прыцягненнем навучэнцаў не толькі нашай гімназіі, але і іншых устаноў адукацыі гродзенскага рэгіёна. Наяўнасць абсталяванага класа Канфуцыя зрабіла падрыхтоўку і правядзенне падобных мерапрыемстваў больш якаснымі”, — паведаміла намеснік дырэктара па вучэбнай рабоце Ларыса Шчарбакова.

Пасля адкрыцця класа Канфуцыя ў гімназіі адкрылі гурткі па інтарэсах для вучняў 5—7 класаў, факультатыўныя заняткі па кітайскай мове ў 5—10 класах, праводзяцца выставы работ (малюнкаў) на кітайскую тэматыку. Кітайскай мовай у класе Канфуцыя займаюцца навучэнцы і іншых устаноў адукацыі Гродна.

“Мы запрашаем на заняткі кітайскай мовай не толькі вучняў — гатовы адкрыць курсы па вывучэнні гэтай мовы і для дарослых. Уся неабходная інфармацыя пра арганізацыю такога навучання знаходзіцца на афіцыйным сайце гімназіі.

Акрамя заняткаў, выкладчык-валанцёр з КНР Лю Сіньюань праводзіць з навучэнцамі майстар-класы па гатаванні нацыянальных кітайскіх страў; ладзяцца мерапрыемствы, прысвечаныя святкаванню кітайскага Новага года, заканчэнню навучальнага года. Слухачы класа Канфуцыя прымаюць актыўны ўдзел і ў алімпіядах рознага ўзроўню, навукова-практычных канферэнцыях”, — працягвала Ларыса Шчарбакова.

У красавіку 2017 года работа навучэнкі 7 “Ч” класа гімназіі Арыны Яраш на кітайскай мове атрымала дыплом І ступені на гарадской канферэнцыі даследчых работ “Відавочнае-неверагоднае”. Як бачна, дружная шматмоўная сям’я Гродзенскай гімназіі № 1 імя акадэміка Я.Ф.Карскага ўвесь час развіваецца, таму наперадзе яе чакаюць новыя адкрыцці, ключом да якіх з’яўляецца замежная мова.

Вольга ДУБОЎСКАЯ.

Пакінуць каментарый

Ваш электронны адрас не будзе апублікаваны. Абавязковыя палі пазначаны *