Падведзены вынікі XXVII Рэспубліканскага конкурсу навуковых работ студэнтаў. У Беларускім нацыянальным тэхнічным універсітэце ўрачыста ўзнагародзілі ўсіх лаўрэатаў.
Сёлета ў конкурсе прынялі ўдзел 3767 студэнтаў і магістрантаў з 54 устаноў вышэйшай адукацыі. Яны прадставілі амаль 3,5 тысячы работ. Найбольш актыўна на конкурс падаваліся прадстаўнікі Беларускага дзяржаўнага ўніверсітэта (278 работ), Беларускага дзяржаўнага медыцынскага ўніверсітэта (192), Полацкага дзяржаўнага ўніверсітэта (187), Гродзенскага дзяржаўнага ўніверсітэта імя Янкі Купалы (177).
Па выніках конкурсу званне лаўрэата прысвоена аўтарам 70 навуковых работ (60 з іх падрыхтаваны індывідуальна, 10 — у суаўтарстве). 839 работ аднесены да першай катэгорыі, 1356 — да другой, 701 — да трэцяй.
Вітаючы лаўрэатаў конкурсу, першы намеснік міністра адукацыі Ірына Старавойтава заўважыла: “Гэта вельмі значная падзея ў вашым жыцці — вынік плённай навукова-даследчай працы і першае прызнанне дасягненняў у навуцы. Навукова-даследчая работа студэнтаў — важны складнік дзейнасці кожнага ўніверсітэта. Яна накіравана на дасягненне дзвюх асноўных мэт: з аднаго боку, зрабіць максімальны ўклад у прафесійны рост будучага спецыяліста, а з другога — забяспечыць пераемнасць у падрыхтоўцы навуковых кадраў шляхам фарміравання даследчыцкіх кампетэнцый і зацікаўленасці студэнтаў у навучанні ў аспірантуры”.
Ірына Старавойтава адзначыла, што ў нашай краіне створаны неабходныя ўмовы для фарміравання ў студэнтаў даследчыцкіх навыкаў, аказваецца ўсебаковая дапамога адоранай моладзі ў творчым і кар’ерным росце. Як паказвае практыка, вынікі больш за 90% конкурсных работ ужо апублікаваны, дакладваліся на канферэнцыях, укаранёны ў адукацыйны працэс і вытворчасць. Усяго ўдзельнікамі конкурсу апублікаваны 8622 артыкулы і 6157 тэзісаў дакладаў, укаранёны ў вытворчасць і вучэбны працэс 5422 распрацоўкі, атрымана 14 дакументаў па ахове інтэлектуальнай уласнасці.
“Якасць конкурсных работ студэнтаў у значнай ступені вызначаецца прафесіяналізмам іх навуковых кіраўнікоў”, — падкрэсліла Ірына Старавойтава.
Сёлета работы падрыхтаваны пад кіраўніцтвам 2570 выкладчыкаў, сярод якіх — 246 дактароў навук і 1526 кандыдатаў навук. Варта адзначыць студэнтаў і навуковых кіраўнікоў БДУ, якія падрыхтавалі 11 работ, узнагароджаных дыпломамі лаўрэатаў конкурсу, а таксама Беларускага нацыянальнага тэхнічнага ўніверсітэта — 6 лаўрэацкіх дыпломаў.
Галіна СІДАРОВІЧ.
Фота аўтара.
