Аб’яднаць партнёраў і ідэі

Круглы стол “Падрыхтоўка да агляду глабальнага плана дзеянняў па барацьбе з гандлем людзьмі ў 2017 годзе: як аб’яднаць партнёраў і ідэі?” прайшоў у штаб-кватэры ААН па ініцыятыве Беларусі, паведамілі ў прэс-службе МЗС.

“У рамках візіту ў штаб-кватэру Арганізацыі Аб’яднаных Нацый намеснік міністра замежных спраў Беларусі Валянцін Рыбакоў прыняў удзел у круглым стале “Падрыхтоўка да агляду глабальнага плана дзеянняў па барацьбе з гандлем людзьмі ў 2017 годзе: як аб’яднаць партнёраў і ідэі?”. Мерапрыемства праведзена па ініцыятыве Беларусі ад імя Групы сяброў, якія аб’ядналіся ў барацьбе з гандлем людзьмі”, — расказалі ў МЗС.
У якасці суарганізатараў мерапрыемства выступілі Аўстрыя, Венгрыя і Ліхтэнштэйн, а таксама Міжнародная арганізацыя працы.

Валянцін Рыбакоў прадставіў бачанне Беларусі адносна правядзення пасяджэння высокага ўзроўню ГА ААН па аглядзе глабальнага плана дзеянняў па барацьбе з гандлем людзьмі. Намеснік міністра таксама азнаёміў удзельнікаў круглага стала з ініцыятывамі Беларусі на міжнароднай арэне па гэтым напрамку дзейнасці ААН.

У адпаведнасці з рэзалюцыяй 70/179 “Паляпшэнне каардынацыі намаганняў па барацьбе з гандлем людзьмі”, якая ўносіцца ў ААН па ініцыятыве Беларусі, Генеральная асамблея ААН прыняла рашэнне аб правядзенні ў кастрычніку 2017 года пасяджэння высокага ўзроўню ГА ААН па аглядзе глабальнага плана дзеянняў па барацьбе з гандлем людзьмі для абмеркавання асноўных праблем у барацьбе з гандлем людзьмі. Глабальны план дзеянняў прыняты кансэнсусам у 2010 годзе па ініцыятыве Беларусі.

Пакінуць каментарый

Ваш электронны адрас не будзе апублікаваны. Абавязковыя палі пазначаны *