Аляксандр ЛУКАШЭНКА: “Мы абавязкова павінны, захаваўшы незалежнасць і суверэнітэт, палепшыць жыццё нашых людзей”

Найважнейшая задача мясцовай вертыкалі ўлады — палепшыць жыццё людзей. На гэтым акцэнтаваў увагу Прэзідэнт Беларусі Аляксандр Лукашэнка, узгадняючы назначэнне кіраўнікоў мясцовых выканаўчых і распарадчых органаў.

Кіраўнік дзяржавы нагадаў, што 2019 і 2020 гады для краіны будуць асаблівымі, насычанымі палітычнымі падзеямі. Паводле яго слоў, Беларусь “і злева, і справа, і на Захадзе, і на Усходзе, падпал пад сур’ёзную рэвізію на прадмет суверэнітэту і незалежнасці”.

“Я пра гэта ўжо гаварыў. Мы павінны быць да гэтага гатовы. Але запомніце: ніхто нас не зрушыць з месца, калі мы будзем працаваць эфектыўна, — падкрэсліў Аляксандр Лукашэнка. — Беларусы заслужылі нармальнае жыццё, і мы абавязкова павінны, захаваўшы незалежнасць і суверэнітэт, палепшыць жыццё нашых людзей. У адваротным выпадку нікому гэты суверэнітэт не будзе патрэбны. Гэта найважнейшая задача для ўсіх”.

Брэст трэба дашліфаваць

Прэзідэнт адзначыў, што на працягу года пабывае ў розных абласцях краіны і азнаёміцца з работай мясцовых органаў улады па развіцці рэгіёнаў. Пры гэтым асаблівую ўвагу ён звярнуў на стан спраў у Брэсцкай і Гомельскай абласцях.

“Брэст адзначыць тысячагоддзе. Многае ў Брэсце зроблена, — канстатаваў кіраўнік дзяржавы. — Брэст трэба, па-народнаму кажучы, дашліфаваць, каб у каралях Беларусі гэта была самая яркая жамчужына. Тым больш гэта заходнія вароты велізарнейшага Еўразійскага рэгіёна. І людзі, перасякаючы граніцу, павінны бачыць, што яны трапілі ў цудоўны, квітнеючы свет”.

Для Гомельскай вобласці час эксперыментаў скончыўся

Развіццём Гомельскай вобласці Аляксандр Лукашэнка пакуль незадаволены. Работа кіраўніцтва гэтага рэгіёна трапіць пад рэвізію, увага будзе звернута таксама і на Магілёўскую вобласць.

“Час выпрабаванняў і эксперыментаў даўно скончыўся, і гамяльчане не павінны адставаць у сваім развіцці ад іншых абласцей. Тым больш у сацыяльным плане мы для Гомельскай вобласці зрабілі больш, чым для любой іншай. Час “аддаваць даўгі”. Людзі ў Гомельскай вобласці павінны жыць не горш, чым у Мінскай або Гродзенскай”, — падкрэсліў прэзідэнт.

Мінск трэба зрабіць абсалютна ўтульным горадам

Задачы па сацыяльна-эканамічным развіцці сталіцы кіраўнік дзяржавы паставіў у снежні мінулага года на нарадзе з актывам Мінска, таму зараз не стаў дэталізаваць свае даручэнні.

“Свой пункт гледжання я выказаў. Мы вашу рэакцыю і мінчан адсочвалі. Людзі ў агульным плане, нават у дэталях падтрымліваюць вынікі нашай нарады. Пераканаўча прашу вас прытрымлівацца тых даручэнняў, якія былі мною выказаны. Нам трэба зрабіць Мінск абсалютна ўтульным горадам для таго, каб мінчане ганарыліся горадам-героем”, — запатрабаваў Аляксандр Лукашэнка.

На сітуацыю ў сталіцы ў бягучым і наступным гадах будзе ўплываць правядзенне II Еўрапейскіх гульняў, прэзідэнцкіх і парламенцкіх выбараў. Аднак гэтыя мерапрыемствы, звярнуў увагу кіраўнік дзяржавы, не галоўнае. “Галоўнае — тая работа, якую мы павінны правесці ў гэтым годзе па ўладкаванні і добраўпарадкаванні нашага горада. Зрабіць гэта не фармальна, каб горад быў вельмі чыстым і акуратным”, — заявіў ён.

Мінскай вобласці не хапае выканальнасці

Прэзідэнт дадаў, што таксама ўважліва сочыць за развіццём Мінскай вобласці. Паводле яго слоў, у рэгіёне пачалі абуджацца кадры, але пра работу губернатара пакуль штосьці сказаць складана, паколькі ён займае гэтую пасаду не так шмат часу.

“Не хапае выканальнасці і дысцыпліны, паваротлівасці. Калі ласка, актывізуйцеся, — запатрабаваў Аляксандр Лукашэнка. — На тэрыторыі Мінскай вобласці ў вёсцы я сам жыву, таму для мяне няма ніякай цяжкасці паглядзець на работу не толькі Лагойскага, Дзяржынскага або Смалявіцкага раёнаў, але і далей”.

Кіраўнік дзяржавы нагадаў кіраўнікам мясцовых органаў улады аб сур’ёзнай адказнасці за карупцыю. Гэтае пытанне зноў набыло актуальнае гучанне пасля таго, як былі затрыманы кіраўнікі Пухавіцкага раёна і Жодзіна. Прэзідэнт падкрэсліў, што дзве службовыя асобы былі затрыманы за неаспрэчныя парушэнні.

“Пакуль на стол мне не пакладуць вычарпальныя факты, ніхто да вас дакрануцца не можа. Вы знаходзіцеся ў кадравым рэестры прэзідэнта і, зразумела, пад абаронай прэзідэнта. Але калі толькі я бачу канкрэтныя правапарушэнні, асабліва звязаныя з хабарам і іншымі праяўленнямі карупцыі, значыць, памнажайце на два як мінімум”, — папярэдзіў беларускі лідар.