У перыяд вясновых канікул навучэнцы сярэдняй школы № 2 Верхнядзвінска змаглі прыняць удзел у прафарыентацыйнай акцыі “Дзень ценю”. Галоўная задача, якая стаяла перад арганізатарамі акцыі, — даць школьнікам не толькі ўяўленне пра асаблівасці прафесіі, але і магчымасць паспрабаваць сябе ў ёй. На працягу тыдня 42 вучні 9—11 класаў наведалі арганізацыі і прадпрыемствы нашага горада і раёна, дзе ўбачылі на свае вочы асаблівасці многіх прафесій і атрымалі яшчэ больш выразныя арыенціры для сваёй будучай прафесійнай дзейнасці.
Так, у цэнтральнай раённай бальніцы падлеткаў азнаёмілі з усімі аддзяленнямі, паказалі сучаснае медыцынскае абсталяванне. У аптэцы будучым фармацэўтам прадэманстравалі працэс падрыхтоўкі лекавых форм, а маладыя спецыялісты, работнікі аптэкі, расказалі пра вучобу ў медыцынскай УВА. Шмат жадаючых было больш даведацца аб працы супрацоўнікаў РАУС, РАНС, ваеннаслужачых пагранзаставы. Падчас размовы з пракурорам раёна дзяўчаты, якія жадаюць атрымаць юрыдычную адукацыю, знаёміліся з асаблівасцямі расследавання крымінальных спраў, правядзення пракурорскіх праверак, а таксама атрымалі рэкамендацыі аб паступленні ў навучальныя ўстановы. У раённым аддзеле Следчага камітэта старшакласнікі зрабілі выснову, што ў прафесіі следчага неабходны такія якасці, як назіральнасць, таварыскасць, аналітычны розум, эмацыянальная ўстойлівасць. На базе Верхнядзвінскага ДРУП ЖКГ праходзіла знаёмства з прафесіямі праграміста, электрыка. Будучых сувязістаў прымаў раённы вузел электрасувязі, з прафесіяй вадзіцеля юнакі знаёміліся ў ААТ “Верхнядзвінскі райаграсэрвіс”. Раённае спажывецкае таварыства дало магчымасць дзяўчынкам пазнаёміцца з прафесіяй кандытара ў кандытарскім цэху, а з прафесіяй кухара — у рэстаране «Флора +», дзе ім не толькі расказалі, што ў гэтых прафесіях трэба цярпенне і добрая памяць, але і далі магчымасць паўдзельнічаць у прыгатаванні булачак і салатаў.
Таксама школьнікі спрабавалі сябе ў ролі паштальёна, фотакарэспандэнта, цырульніка, культработніка, ветурача, псіхолага… і нават намесніка старшыні райвыканкама. Прыемна, што школьнікаў цікавіла пытанне набыцця накіравання для навучання, а гэта значыць, што яны плануюць вяртацца на радзіму.
У першы дзень чацвёртай чвэрці старшакласнікі актыўна дзяліліся сваімі ўражаннямі ад убачанага і пачутага. Усе без выключэння адзначылі захапляльнасць акцыі “Дзень ценю” і карысць у далейшым прафесійным самавызначэнні.
Алена СЛЯМНЁВА,
намеснік дырэктара па выхаваўчай рабоце сярэдняй школы № 2 Верхнядзвінска.
Фота Віталіі САЛАЎЁВАЙ,
навучэнкі 10 “А” класа.
Водгукі навучэнцаў
Я даўно вырашыў стаць урачом, з вялікім нецярпеннем чакаў той дзень, калі змагу наведаць бальніцу, каб убачыць прафесію ўрача знутры. Пасля цікавай экскурсіі па аддзяленнях бальніцы загадчык тэрапеўтычнага аддзялення Віктар Іванавіч Кураш спыніўся на спецыфіцы працы тэрапеўта, расказаў пра складанасці і адказнасць гэтай прафесіі.
Станіслаў НЕВЯРОЎСКІ, навучэнец 10 “А” класа.
Пасля 9 класа планую працягнуць вучобу па спецыяльнасці “Кухар-кандытар”, таму, калі прапанавалі паўдзельнічаць у акцыі, я з задавальненнем скарысталася магчымасцю наведаць кандытарскі цэх. Там нас з дзяўчынкамі сустрэлі вельмі ветліва і прыязна. Паказалі, як робяць розныя віды печыва, хлеб, батон, навучылі, як працаваць з кандытарскімі прыборамі, і нават далі магчымасць прыгатаваць печыва. Мне вельмі спадабалася.
Вікторыя ГАСЕВІЧ, навучэнка 9 “В” класа.
Мне вельмі спадабалася сустрэча з загадчыцай аптэкі Ларысай Пятроўнай Бубновай, якая займальна пазнаёміла з працай фармацэўта. Я пераканалася, што выбрала тую прафесію, якая мне сапраўды цікавая. Ды і жаданне вучыць патрэбныя прадметы ўзмацнілася.
Алена СПІЦЭВІЧ, навучэнка 10 “А” класа.
У будучыні я планую атрымаць спецыяльнасць “Тэхнік па тэлекамунікацыях”. На раённым вузле электрасувязі нам паказвалі тэхніку і апаратуру, на якіх працуюць сувязісты. Спадабалася сучаснае абсталяванне, вялікі пералік паслуг, якія прадастаўляюцца насельніцтву. А магчымасць атрымаць накіраванне для навучання гарантуе ў далейшым і месца працы.
Павел СКІПАР, навучэнец 9 “В” класа.
Падчас акцыі “Дзень ценю” я абраў раённы аддзел па надзвычайных сітуацыях, бо мару стаць ратавальнікам. Там мне расказалі, на якія здарэнні выязджаюць ратавальнікі, паказалі тэхніку, аварыйна-выратавальнае абсталяванне. Павучылі апранаць баявую вопратку на час, дыхаць у спецыяльных масках. Жаданне стаць ратавальнікам стала яшчэ мацнейшым.
Мікіта СТРЫЖОНАК, навучэнец 9 “В” класа.
Мне вельмі падабаецца дзейнасць культработнікаў, і сваю будучую прафесію я хачу звязаць менавіта з гэтай сферай. Падчас акцыі ў мяне была магчымасць бліжэй пазнаёміцца з працай культарганізатараў. Я дапамагала работнікам РЦКіНТ праводзіць у Запрудскім СДК вакальны конкурс “Галасы будучыні”. Дзякуючы гэтаму, я больш даведалася аб сваёй будучай прафесіі, аб яе перавагах і некаторых цяжкасцях. Лічу, што такія прафарыентацыйныя мерапрыемствы патрэбныя школьнікам, бо гэта выдатная магчымасць даведацца больш аб жаданай прафесіі.
Любоў АНАНЧАНКА, навучэнка 11 класа.
У мяне быў цяжкі, але цікавы дзень. Столькі розных сітуацый вырашаецца ў кабінеце намесніка старшыні райвыканкама, і гэта толькі адзін дзень! Ад кіраўніка патрабуецца хуткасць прыняцця рашэнняў, неабходна валодаць ведамі ў розных сферах. Я зразумела, што галоўнае — імгненна адрэагаваць на сітуацыю і ўзяць яе пад кантроль. Мне цікава было ўсё, у тым ліку як вядзецца прыём па зваротах грамадзян. У будучыні планую паступаць у Акадэмію кіравання пры прэзідэнце, таму гэты дзень быў для мяне карысны.
Ульяна ЗЯЗЮЛЯ, навучэнка 10 “А” класа.
