У Гарадзецкай спецыяльнай школе-інтэрнаце педагогі не толькі даюць добрыя веды, але і прывіваюць любоў да роднай зямлі. Падрабязнасці — у матэрыяле карэспандэнта “Настаўніцкай газеты”.
— У дзесяці класах тут вучацца 77 дзяцей ва ўзросце ад 7 да 18 гадоў з Рагачоўскага, Веткаўскага, Чачэрскага, Жлобінскага, Буда-Кашалёўскага, Кармянскага раёнаў Гомельскай вобласці, — гаворыць дырэктар Гарадзецкай спецыяльнай школы-інтэрната Жанна Самусева. — У гэтым навучальным годзе ўпершыню адкрыты профільны клас паглыбленай сацыяльнай і прафесійнай падрыхтоўкі па профілі “Агародніцтва”. У першую чаргу фарміруем цікавасць да аграрных прафесій, да таго ж хлопцы і дзяўчаты атрымліваюць уяўленне аб разнастайнасці сельскагаспадарчых раслін, знаёмяцца з тэхналогіямі вытворчасці прадукцыі. Прыемна, што мы можам унесці ўклад у падрыхтоўку кваліфікаваных кадраў для аграпрамысловага комплексу краіны.
Гэтая школа прызнана лепшай сярод устаноў спецыяльнай адукацыі.
Педагог Сяргей Якушаў перакананы, што падчас плённай працы, якая кіпіць на вучэбна-доследным участку, вучні вучацца адрозніваць насенне розных культур, даведваюцца, як вымяраць тэмпературу і вільготнасць глебы. Набытыя веды і навыкі спатрэбяцца маладым людзям у жыцці, напрыклад, пры ўборцы ўласнага ўраджаю.
— Работа ідзе, — запэўнівае настаўнік. — На зямлі працуюць адзінаццацікласнікі — будучыя агароднікі. Яны даглядаюць расаду, пасля дажджоў зямля сыраватая, паліваць не трэба, а вось праполку ніхто не адмяняў.
Вынік агародных старанняў педагогаў і навучэнцаў відаць здалёк: цяпліцы цешаць вока зеленню салатаў “маравіла” і “варта”, радыскі і кропу гатункаў “свежасць” і “багаталісты”, цыбулі і капусты, таматаў, якія неўзабаве парадуюць сакавітым ураджаем. Побач квітнее пладовы сад, у якім прыжыліся саджанцы яблынь і груш, ёсць кусты парэчак. Дзякуючы зладжанай рабоце, ураджай, вырашчаны за лета, разнастаіць і зробіць таннейшым школьнае харчаванне. Так, летась тут удалося сабраць 6 тон бульбы, забяспечылі агароднінай не толькі сябе, але і падзяліліся з сельскім дзіцячым садам і школай.
Сярод выхаванцаў папулярнасцю карыстаюцца аб’яднанні па інтарэсах. Дзеці з задавальненнем асвойваюць алмазны жывапіс, які з’явіўся ў Кітаі і заваяваў сэрцы тых, каму даспадобы арыгінальныя ідэі.
— На палатне надрукавана схема, на якую па парадку прыклейваюцца стразы, і паступова карціна запаўняецца яркімі фарбамі, — знаёміць з тэхнікай выхавальніца і педагог сацыяльны Ганна Свірыдава. — Гэтая дзейнасць аказвае станоўчы эфект на дзяцей — супакойвае, здымае стрэс, развівае дробную маторыку рук і, вядома, спрыяе праяўленню творчых здольнасцей.
Пакуль адны дзеці старанна выкладваюць стразы роўным радком, другія таксама развіваюць фантазію і ўяўленне — яны пагрузіліся ў бісерапляценне. Напрыклад, вучаніца Аліна захапілася гэтым рукадзеллем у 4 класе, а хлопчыкі Саша і Назар пачалі плесці вырабы з пацерак у 2-м.
— Пляценне бісерам прадугледжвае развіццё дробнай маторыкі, а значыць, паралельна развіваюцца маўленне і мысленне. Заняткі фарміруюць у дзяцей увагу, уседлівасць, вучаць пачатую справу даводзіць да канца, — падкрэслівае настаўніца Алена Аляксеенка. — Усе нашы работы калектыўныя. На занятках дзеці вучацца працаваць у камандзе, набіраюць бісер, каб зрабіць лісточак, бутон кветкі, з якіх збіраецца цудоўная архідэя.
Разьба па дрэве, пляценне кошыкаў і вышыўка крыжыкам таксама падабаюцца выхаванцам — у іх атрымліваюцца ўнікальныя вырабы. Напрыклад, сярод апошніх вышытых работ многія прысвечаны велікоднай тэматыцы.
P.S. Пра яркую і прадукцыйную сустрэчу журналістаў і педагогаў на Рагачоўшчыне глядзіце відэа тут.
Алена КАСЬЯН-ПАЎЛЯНКОВА
