Загадчыца ДЦРД “Сонейка” № 64 Бабруйска Наталля Віктараўна Індзюхіна з гордасцю гаворыць пра свой калектыў, у якім большая палова педагогаў мае вышэйшую адукацыю па спецыяльнасці, а таксама вышэйшую і першую кваліфікацыйную катэгорыю. Прыярытэтнымі кірункамі дзейнасці ўстановы з’яўляюцца патрыятычнае выхаванне, фарміраванне асноў бяспечнай жыццядзейнасці, выхаванне экалагічнай культуры.
У мінулым годзе ў рамках святкавання Года малой радзімы дашкольны цэнтр развіцця дзіцяці № 64 Бабруйска стаў пераможцам гарадскога конкурсу на лепшы лэпбук “Малая радзіма — астравок зямлі…” і ўзнагароджаны дыпломам I ступені ўпраўлення па адукацыі Бабруйскага гарвыканкама. Гэты дыдактычны дапаможнік уяўляе сабой папку фармату А4 (у разгорнутым выглядзе — А3) з разнастайнымі развіццёвымі элементамі. На яго старонках ёсць заданні і гульні, якія дазваляюць дзіцяці, гуляючы, замацоўваць уяўленні аб сваім горадзе, прыродзе роднага краю. На тытульнай старонцы размешчаны магнітная візітная картка Бабруйска і фатаграфіі (у скрынцы) усіх помнікаў бабру. На развароце прадстаўлены беларускія лялькі на магніце, дыдактычныя гульні “Знайдзі беларускі арнамент”, “Складзі карцінку” (на магніце), “Прадпрыемствы горада”, гульнявыя заданні “Разгледзь слайды”, “Стары горад. Новы горад”, кніжкі-гармонікі “Вядучыя прадпрыемствы Бабруйска”, “Прырода роднага краю”, кніжкі-
раскладушкі “Знакамітыя бабруйчане”, “Гісторыя назваў вуліц Бабруйска”, “Гісторыя герба Бабруйска”, віктарына аб родным горадзе (на катушцы), макеты прыродных аб’ектаў. На задняй старонцы лэпбука прадстаўлены рознакаляровыя пластыкавыя канверты з дыдактычнымі гульнямі “Складзі карту”, “Знайсці на карце Бабруйск”, з вершамі і песнямі пра горад, прыказкамі і прымаўкамі пра радзіму. Сярод іншых цікавых элементаў дыдактычнага дапаможніка — круг, які верціцца, шкатулкі, празрыстыя каробкі, бочачкі, магнітныя фігуры, слайды, лупы, рознакаляровыя прышчэпкі і г.д. Лэпбук рэкамендуецца для выкарыстання ў рабоце з выхаванцамі старэйшага дашкольнага ўзросту — як у індывідуальнай, так і ў групавой рабоце, у нерэгламентаванай, гульнявой дзейнасці.
У групах дашкольнага цэнтра аформлены беларускія куткі, у якіх прадстаўлены гульні на патрыятычную тэматыку, альбомы з дзяржаўнай сімволікай, сімваламі Беларусі, прысвечаныя нацыянальным святам, стравам, вядомым людзям краіны, нацыянальным героям, прадпрыемствам, славутасцям Мінска, Магілёва, Бабруйска. Ёсць куткі дэкаратыўна-прыкладнога мастацтва Беларусі. У кніжных кутках арганізоўваюцца выставы беларускай кнігі для дзяцей, аўтарскія выставы беларускіх паэтаў і пісьменнікаў. Бацькі выхаванцаў афармляюць тэматычныя насценгазеты, сямейныя партфоліа, буклеты. У рамках супрацоўніцтва з бабруйскім краязнаўчым музеем у дашкольным цэнтры былі арганізаваны выязныя тэматычныя заняткі з выкарыстаннем сродкаў ІКТ. Педагог-псіхолаг цэнтра Алена Юр’еўна Аўчыннікава прыняла ўдзел у раённым фестывалі беларускай мовы, правяла круглы стол для бацькаў “Мая мова”, падчас якога прагучаў аўтарскі верш намесніка загадчыка па асноўнай дзейнасці Наталлі Мікалаеўны Дзегцяровай з аднайменнай назвай.
У дашкольным цэнтры функцыянуе экалагічны пакой, у якім размешчаны “Жывы куток”, дзе жывуць водныя чарапахі, трус, марскія свінкі і рыбкі. На паліцах знаходзяцца макеты з прыроднымі супольнасцямі, гербарыі. Аформлены падворак, дзе прадстаўлены свойскія жывёлы. На сцяне — вялікая карта жывёльнага і расліннага свету. З мэтай фарміравання ў выхаванцаў элементарных уяўленняў аб космасе прадстаўлена Сонечная сістэма, глобус. У экалагічным пакоі выхаванцы назіраюць за аб’ектамі прыроды, выконваюць працоўныя даручэнні па доглядзе жывёл з “Жывога кутка”, праводзяць доследы і эксперыменты. У рабоце з дзецьмі педагогі выкарыстоўваюць метад праектаў, праблемна-гульнявыя і эўрыстычныя метады работы.
У рамках дзейнасці педагагічнага калектыву па праблеме фарміравання беражлівасці, патрэбы ў захаванні прыродных багаццяў сумесна з бацькамі ў групах арганізоўваюцца творчыя выставы, акцыі, ствараюцца лістоўкі, партфоліа і інш. Станоўчым вынікам работы ў гэтым кірунку стаў удзел у I этапе Рэспубліканскага конкурсу даследчых работ дзяцей дашкольнага ўзросту “Я — даследчык” у намінацыі “Дзіця і прырода”. На конкурс была прадстаўлена работа “Другое жыццё поліэтыленавага пакета”, выкананая выхаванкай старшай групы Лізаветай Афяронак і выхавальніцай Раісай Васільеўнай Грыгаровіч з удзелам сям’і дзяўчынкі. Даследчая работа была адзначана дыпломам I ступені. Вынікам работы стала выстава вырабаў “Другое жыццё поліэтыленавага пакета”, выраб экасумачак і кошыкаў для сюжэтна-ролевай гульні і калекцыя ўбораў, якія дзяўчынкі з задавальненнем дэманстравалі на святах, для мадэлінгу. Гэтая даследчая работа прадстаўлялася на гарадскі конкурс “Зялёная аптэка”, дзе была адзначана дыпломам III ступені ў намінацыі “Адходы ў даходы”.
Ва ўстанове аформлены пакой бяспекі, у якім праводзяцца тэматычныя гутаркі, экскурсіі, прайграюцца праблемна-гульнявыя сітуацыі з дзецьмі па тэмах пажарнай бяспекі, бяспекі дарожнага руху. У пакоі прадстаўлены элементы касцюма работніка службы МНС, макеты скрыжавання, пажарнай тэхнікі, машыны ДАІ, хуткай дапамогі, лялькі ў абліччы пажарнага, доктара Айбаліта, развіццёвыя гульні і гульнявыя атрыбуты, ілюстрацыі. Размешчаны стэнды “Прылады працы службы МНС”, “Пажарны шчыт”, стэнд з сямейнымі фотаздымкамі “Бяспечнае сэлфі” і дарожныя знакі. У групах цэнтра таксама аформлены “Куткі бяспекі”. Бацькі выхаванцаў ствараюць партфоліа “Бяспека дома”, а педагогі вырабляюць лэпбукі, дываналіны, дыдактычныя гульні па тэматыцы фарміравання навыкаў пажарнай бяспекі, правіл дарожнага руху і здаровага ладу жыцця. Ладзіцца конкурс карысных кніг-самаробак “Бяспечны свет” з удзелам дзяцей і бацькоў.
Надзея ЦЕРАХАВА.
Фота Алега ІГНАТОВІЧА.
