Мовазнаўства, “Кветка лотаса” і “Кацюша”

Сучасны лінгафонны кабінет прэзентаваў сярэдняй школе № 16 Оршы Надзвычайны і Паўнамоцны Пасол Кітайскай Народнай Рэспублікі ў Беларусі Цуй Цымін у знак высокай ацэнкі працы па вывучэнні і папулярызацыі кітайскай мовы і культуры.

З 2014 года ў дзвюх сярэдніх школах і гімназіі Оршы пачалі працаваць валанцёры з КНР, якія выкладаюць мову на факультатыўнай аснове. Прычым заняткі арганізаваны не толькі для навучэнцаў, але і для дарослых у рамках асобнага курса. Урачыстая цырымонія адкрыцця новага лінгафоннага кабінета стала адной з найбольш яркіх вясновых падзей для сістэмы адукацыі раёна. Дзякуючы аршанскім педагогам, кітайскім валанцёрам і іх таленавітым вучням, яна ператварылася ў запамінальнае свята. Прэзентацыя работы па робататэхніцы і калекцыя адзення “Фенікс. Адраджэнне”, выстава дэкаратыўна-прыкладной творчасці, майстар-класы кітайскіх валанцёраў па мастацтве напісання іерогліфаў, беларускай выцінанцы і кітайскай выразцы з паперы, пляценні з бісеру, вырабе з паперы і вязанні традыцыйных кітайскіх вузлоў, а таксама іх беларускіх калег — па тэхніцы вырабаў з пер’я і фоамірану, стварэнні папяровых кветак і арганізацыі ўсходняга міні-саду — нікога не пакінулі раўнадушнымі. Святочны настрой падтрымала выдатная канцэртная праграма, дзе кітайскія песні і танцы арганічна перапляліся з асабліва блізкай сэрцу кожнага аршанца “Кацюшай”, у трыа выканаўцаў якой выступіла Лі Сюе ў суправаджэнні аркестра сярэдняй школы № 16.

— Больш за два дзесяцігоддзі мінула з дня ўстанаўлення дыпламатычных адносін паміж Рэспублікай Беларусь і Кітайскай Народнай Рэспублікай. Значнасць і актуаль-насць нашых сувязей з Кітаем цяжка пераацаніць: сёння яны — адзін з найважнейшых фактараў гарантавання нацыянальнай бяспекі Беларусі, прыярытэтны напрамак знешняй палітыкі дзяржавы, — адзначыў старшыня Аршанскага райвыканкама Мікалай Лісоўскі. — З году ў год кантакты паміж нашымі краінамі паспяхова і стабільна развіваюцца. Упэўнены, што ў беларуска-кітайскага супрацоўніцтва — у тым ліку ў дачыненні да Оршы — ёсць перспектыва, бо яго асновай з’яўляецца сяброўства нашых народаў, цікавасць, павага, добразычлівасць і ўзаемная карысць. Расце цікавасць да вывучэння кітайскай мовы, што вельмі актуальна для ўмацавання гандлёва-эканамічных адносін з Кітаем. Трое выпускнікоў устаноў адукацыі Оршы праходзяць у цяперашні час стажыроўку ў КНР, больш за 200 навучэнцаў факультатыўна вывучаюць кітайскую мову ў школах раёна. Сённяшняя сустрэча — яшчэ адзін крок у гэтым напрамку. Думаю, што лінгафонны кабінет з сучасным абсталяваннем, які сёння наша школа атрымала ў дар, дапаможа рэалізаваць нашы далейшыя сумесныя планы.

Як паведаміла дырэктар сярэдняй школы № 16 Галіна Кабешава, разлічаны на 14 чалавек лінгафонны кабінет на першай змене задзейнічаюць у адукацыйным працэсе. У другой палове дня падарунак кітайскіх сяброў дапаможа будучым кітаязнаўцам вывучаць мову на факультатыўных занятках. Мяркуецца, што неўзабаве ва ўстанове адукацыі будзе адкрыты кабінет Канфуцыя.

Таццяна БОНДАРАВА.

Пакінуць каментарый

Ваш электронны адрас не будзе апублікаваны. Абавязковыя палі пазначаны *