“Мы ў мастацтве…”

Мастацтва заўсёды натхняла чалавека на стварэнне прыгожага, кранальнага, эмацыянальна-пачуццёвага.

Напрыканцы лістапада яно неспадзявана завітала ў госці да вучняў і настаўнікаў пачатковых класаў Азярэцкай школы Глыбоцкага раёна Віцебскай вобласці — на тэматычны тыдзень “Мы ў мастацтве…”.

Штодня, з 20 па 24 лістапада, дзеці і дарослыя знаходзіліся ў віры творчых спраў, мерапрыемстваў, адкрыццяў. Балазе, гэтаму спрыяў і сам дэвіз тэматычнага тыдня “Я хачу, я магу, я ўмею”, які задаваў пазітыўны, бадзёры настрой.

У панядзелак — дзень дэкаратыўна-прыкладнога мастацтва — вучні пачатковых класаў праз відэапрэзентацыю, якую дэманстравала настаўніца 3 класа С.М.Баран, даведаліся шмат новага пра розныя віды мастацтва. У вершаванай форме дзеці цікава расказалі пра свой клас. А яшчэ разам з педагогамі сталі стваральнікамі стракатых калажаў “Поры года”.

У аўторак — дзень музыкі — настаўніца 4 класа А.І.Шынкевіч запрасіла пачаткоўцаў на майстар-клас “До-мі-солька”, падчас якога яны спявалі любімыя песні, ад душы танцавалі і весяліліся.

Запамінальнай атрымалася і серада — дзень маляванкі. Настаўніца 1 класа В.Т.Мамошына праводзіла з хлопчыкамі і дзяўчынкамі майстар-клас “Умелыя ручкі”, на якім вучні 1—4 класаў вучыліся маляваць у пальчыкавай тэхніцы. Шматлікія работы сталі асновай для вялікай выставы.

Чацвер — дзень тэатра і кіно — запрасіў дзяцей і дарослых у школьную кіназалу на прагляд кароткаметражнага дзіцячага кінафільма, а пасля — на займальнае шоу “Тэатральны мікс”, якое праводзіла настаўніца 2 класа Г.А.Грыгаровіч.

Пятніца — дзень літаратуры — стала заключным этапам у межах тыдня пачатковых класаў “Мы ў мастацтве…”. Пасля ўрокаў хлопчыкі і дзяўчынкі чыталі на памяць вершы беларускіх аўтараў і самі па прапанаваных настаўнікамі рыфмах спрабавалі ствараць вершы.

…Стракатая палітра мерапрыемстваў тыдня пачатковых класаў падарыла яго ўдзельнікам і арганізатарам шмат прыемных хвілін, натхніла на сумесную творчую дзейнасць.

Людміла ШЫРЫНАВА,
намеснік дырэктара па асноўнай дзейнасці
Азярэцкай сярэдняй школы Глыбоцкага раёна Віцебскай вобласці.

Пакінуць каментарый

Ваш электронны адрас не будзе апублікаваны. Абавязковыя палі пазначаны *