Перыяд старшынства Беларусі азнаменаваўся атмасферай супрацоўніцтва

Адным з самых паспяховых за ўсю гісторыю арганізацыі назваў старшынства Беларусі ў Цэнтральна-Еўрапейскай ініцыятыве намеснік генеральнага сакратара ЦЕІ Эрык Чарновіц.

“Я павінен адзначыць, што старшынства Беларусі ў ЦЕІ было адным з самых паспяховых за ўсю гісторыю Цэнтральна-Еўрапейскай ініцыятывы. Вы змаглі арганізаваць вялікую колькасць мерапрыемстваў, уключаючы семінары, практычныя канферэнцыі, сустрэчы, пасяджэнні. Вы змаглі сабраць разам усе дзяржавы — члены ініцыятывы. І за гэта мы вам вельмі ўдзячны”, — сказаў Эрык Чарновіц.

Намеснік генеральнага сакратара ЦЕІ асабліва падкрэсліў, што ў Беларусі такая ж місія, пазіцыя і мэта, як і ў ЦЕІ. “Беларусь таксама выступае ў ролі своеасаблівага моста паміж Усходам і Захадам, паміж Поўначчу і Поўднем. Таму перыяд старшынства Беларусі азнаменаваўся атмасферай супрацоўніцтва. Мы, можна сказаць, ішлі поплеч”, — адзначыў ён. Дэвіз старшынства Беларусі ў арганізацыі — пашырэнне сумяшчальнасці і ўзаемадапаўняльнасці ў Вялікай Еўропе — перасякаецца з мэтамі і задачамі Цэнтральна-Еўрапейскай ініцыятывы.

Што тычыцца супрацоўніцтва членаў ініцыятывы, намеснік генеральнага сакратара адзначыў, што ЦЕІ падобная на адну вялікую сям’ю. Гэта вельмі празрыстая і практычная арганізацыя, дзе ёсць толькі статус паўнапраўнага члена, а статусу кандыдата, як гэта сустракаецца ў іншых арганізацыях, тут няма. У кожнага члена ініцыятывы ёсць адзін голас, усе рашэнні прымаюцца на падставе 100-працэнтнага кансэнсусу. Кожная дзяржава — член арганізацыі можа свабодна ўзаемадзейнічаць і кантактаваць у рамках разнастайных сумесных праектаў. Гэта тычыцца развіцця малых і сярэдніх прадпрыемстваў, навукі і тэхналогій, культуры, акадэмічнага абмену і стыпендыяльных праграм.

Цэнтральна-Еўрапейская ініцыятыва была створана ў 1989 годзе. Сёння арганізацыя налічвае 18 краін-членаў. Беларусь стала членам ЦЕІ ў чэрвені 1996 года. Рэспубліка разглядае арганізацыю як эфектыўны інструмент пашырэння і ўмацавання рэгіянальнага супрацоўніцтва праз рэалізацыю канкрэтных сумесных праектаў па актуальных напрамках дзейнасці, уключаючы эфектыўную энергетыку, устойлівае развіццё, экалогію, навуку і тэхналогіі.

Пакінуць каментарый

Ваш электронны адрас не будзе апублікаваны. Абавязковыя палі пазначаны *