Рэзалюцыя аб каардынацыі намаганняў па барацьбе з гандлем людзьмі атрымала падтрымку

- 10:42Інфармацыйная гадзіна

Трэці камітэт Генеральнай Асамблеі ААН прыняў кансэнсусам рэзалюцыю “Паляпшэнне каардынацыі намаганняў па барацьбе з гандлем людзьмі”, ініцыіраваную Беларуссю. Аб гэтым паведамілі ў прэс-службе беларускага знешнепалітычнага ведамства.

Рэзалюцыя накіравана на паляпшэнне ўсёабдымнага падыходу ў выпрацоўцы палітыкі ў барацьбе з гандлем людзьмі на ўсіх узроўнях узаемадзеяння. У ёй адлюстраваны апошнія асноўныя глабальныя тэндэнцыі ў гэтай сферы, уключаючы шэраг рэгіянальных і міжнародных ініцыятыў, а таксама новыя выклікі, з якімі сутыкаецца сусветная супольнасць у барацьбе з гандлем людзьмі. У прыватнасці, у дакуменце адзначаецца ўплыў інфармацыйна-камунікацыйных тэхналогій і інтэрнэту на распаўсюджанне маштабаў гэтага віду злачынстваў.

Дзяржавы — члены ААН падтрымалі прапанову Беларусі правесці пасяджэнне на ўзроўні кіраўнікоў міжустаноўскай каардынацыйнай групы па барацьбе з гандлем людзьмі (ІКАТ) па прычыне неабходнасці ў больш зладжанай рабоце групы з актыўным уключэннем у яе дзейнасць усіх членаў ІКАТ.

Рэзалюцыя заклікае дзяржавы да больш цеснай каардынацыі нацыянальных механізмаў у барацьбе з гандлем людзьмі. У сувязі з гэтым у дакуменце змешчаны заклік да УНЗ ААН забяспечыць збор інфармацыі па гэтым пытанні і зрабіць яе даступнай усім дзяржавам.

Суаўтарамі беларускай рэзалюцыі сталі 70 дзяржаў з усіх рэгіёнаў свету, сярод якіх Аўстралія, Аўстрыя, Ізраіль, Індыя, Італія, Кітай, Куба, Латвія, Мексіка, Партугалія, Расія, ЗША, Філіпіны, Японія.