У Саюзнай дзяржаве створаць адзіную навуковую прастору

- 10:50Інфармацыйная гадзіна

Беларусь і Расія да 2020 года сфарміруюць адзіную навукова-тэхналагічную прастору. Аб гэтым паведаміў старшыня Дзяржаўнага камітэта па навуцы і тэхналогіях Беларусі Аляксандр Шумілін.

“Пастаўлены тэрмін да 2020 года, каб сфарміраваць адзіную навукова-тэхналагічную прастору. У рамках Саюзнай дзяржавы гэта працэс няпросты, няхуткі, але вельмі важны. Гэта будзе сур’ёзны прарыў. Ужо рухаемся ў гэтым напрамку, — сказаў Аляксандр Шумілін. — Мы імкнёмся ўвязаць стратэгію развіцця нашай навукі з расійскай, правядзенне як навуковых даследаванняў, так і стварэнне высокатэхналагічных вытворчасцей. Вызначымся, што лепш рабіць у Беларусі, што — у Расіі. У гэтай краіне шмат задзелаў, распрацовак, ажыццяўляецца вялікая праграма па імпартазамяшчэнні. Паасобку развіваемся добра, але пакуль дрэнна плануем сумеснае развіццё, тут слабае звяно”.

У Беларускім нацыянальным тэхнічным універсітэце прайшло першае пасяджэнне камісіі па адзінай навукова-тэхналагічнай прасторы Саюзнай дзяржавы. “Вызначымся з распрацоўкай прагнозу навукова-тэхнічнага развіцця Саюзнай дзяржавы, дадзім старт такой праграме да 2040 года. Мы імкнёмся не толькі займацца навуковымі распрацоўкамі, але і задзейнічаць работнікаў вытворчасці і інвестараў, каб аб’яднаць увесь цыкл — ад навуковых даследаванняў да стварэння канкрэтных вытворчасцей”, — растлумачыў Аляксандр Шумілін.

Для супрацоўніцтва ўжо вызначаны тры праекты ў галіне машынабудавання, ініцыіраваныя Мінпрамам Беларусі. Яны звязаны з вытворчасцю кампанентнай базы радыёэлектронікі, з касмічнымі распрацоўкамі і вытворчасцю электронных мікрасхем.

Намеснік міністра адукацыі і навукі Расіі Рыгор Трубнікаў, які з’яўляецца сустаршынёй камісіі, адзначыў, што яе дзейнасць накіравана на ўзгадненне прыярытэтаў у даследаваннях, спрашчэнне і актыўны абмен тэхналогіямі і спецыялістамі. “Для таго каб займацца сумеснымі праектамі і атрымліваць хуткі і эфектыўны вынік, патрэбна адзіная сістэма паказчыкаў даследаванняў і распрацовак, гэта значыць, вызначымся, як у нашых краінах ацэньваюць узровень іх гатоўнасці. Мы не проста партнёры, а займаемся ўзаемадапаўняльнымі работамі як у галіне сістэм для грамадзянскай навукі, так і ў галіне сістэм двайнога прызначэння”, — дадаў ён.