Народная мудрасць сцвярджае, што ўпарты бамбук праб’е і асфальт. Гэтае выслоўе з’яўляецца жыццёвым крэда настаўніцы нямецкай мовы Наталлі Сяргееўны Гузарэвіч з гімназіі № 2 Пінска.
Выпускніца гімназіі годна працягвае лепшыя традыцыі сваіх настаўнікаў. На працягу многіх гадоў аддае сэрца не толькі сваім дзецям, якіх у яе трое, але і вучням. За 20 гадоў работы ў гімназіі Наталля Сяргееўна зарэкамендавала сябе высокакваліфікаваным, працавітым, ініцыятыўным і творчым спецыялістам.
— Толькі ўпартасць, настойлівасць і карпатлівая праца могуць дапамагчы ў дасягненні пастаўленай мэты, — лічыць выпускніца Мінскага дзяржаўнага лінгвістычнага ўніверсітэта. — Гэтыя важныя якасці характару выхоўваю і ў вучняў.
Урокі Наталлі Сяргееўны вылучаюцца камунікатыўнай накіраванасцю і метадычнай прадуманасцю. З дапамогай розных метадаў і прыёмаў настаўніца дае вучням трывалыя і глыбокія веды па нямецкай мове. Эфектыўна выкарыстоўвае элементы сучасных адукацыйных тэхналогій: інфармацыйна-камунікацыйных, праблемнага навучання, даследчай і праектнай дзейнасці, навучання ў супрацоўніцтве.
Н.С.Гузарэвіч назапасіла станоўчы вопыт работы з адоранымі і высокаматываванымі дзецьмі. Выхаванцы педагога — пераможцы ўсіх этапаў Рэспубліканскай алімпіяды па нямецкай мове і Рэспубліканскага конкурсу даследчых работ школьнікаў, актыўныя ўдзельнікі міжнародных праектаў. Паліна Севярына і Вера Сагановіч — лаўрэаты спецыяльнага прэзідэнцкага фонду па сацыяльнай падтрымцы адораных навучэнцаў і студэнтаў.
Наталля Сяргееўна актыўна ўзаемадзейнічае ў рамках ініцыятывы “Школы — партнёры будучыні” з Федэральным упраўленнем школьнай адукацыі за мяжой Германіі, з’яўляецца членам камісіі па прыёме іспытаў па нямецкай мове на атрыманне шпрах-дыпломаў.
Н.С.Гузарэвіч — рэцэнзент вучэбнага дапаможніка па нямецкай мове для васьмікласнікаў гімназій. Некалькі гадоў працавала ў гарадскім рэсурсным цэнтры па падрыхтоўцы вучняў да Рэспубліканскай алімпіяды па нямецкай мове. Выдатныя арганізатарскія здольнасці педагога дапамагаюць ёй паспяхова кіраваць гімназічным вучэбна-метадычным аб’яднаннем настаўнікаў нямецкай мовы.
У вольны час Наталля Сяргееўна шые (амаль увесь гардэроб пашыла сама), кулінарнічае, падарожнічае па Беларусі і за мяжой, шмат чытае.
— Шчасце — гэта мець дружную сям’ю, любімую работу, пастаянна развівацца і дзяліцца сваім вопытам з калегамі і вучнямі, — лічыць настаўніца.
Асабістыя якасці педагога, яе прафесіяналізм, кампетэнтнасць і высокія прафесійныя дасягненні ацэнены па заслугах: па выніках мінулага года Наталля Сяргееўна стала чалавекам года Пінска ў галіне адукацыі і навукі.
За высокае педагагічнае майстэрства, поспехі ў навучанні і выхаванні дзяцей Н.С.Гузарэвіч адзначана Ганаровай граматай галоўнага ўпраўлення па адукацыі Брэсцкага аблвыканкама і прэміяй Брэсцкага аблвыканкама за падрыхтоўку пераможцаў рэспубліканскай прадметнай алімпіяды.
Таццяна ЛІПАЕВА,
намеснік дырэктара па вучэбнай рабоце гімназіі № 2 Пінска.