Цікавымі і карыснымі былі восеньскія канікулы ў Радамльскім ВПК дзіцячы сад – сярэдняя школа. Асаблівая ўвага ў нашай установе падчас канікул удзялялася здароваму ладу жыцця, развіццю фізічнай культуры і спорту. Кожны дзень нашы навучэнцы мелі магчымасць займацца міні-футболам, валейболам, настольным тэнісам, гуляць у шашкі і шахматы. Таксама працавала ў гэты час і трэнажорная зала. Для вучняў малодшых і сярэдніх класаў была праведзена спартландыя “Пасябруй са спортам”.
Не пуставалі падчас канікул спартыўная і трэнажорная залы і ў вячэрні час, прычым з задавальненнем займаліся спортам тут як школьнікі, так і дарослыя жыхары аграгарадка Радамля.
На працягу двух гадоў ва ўстанове існуе клуб “Крылаты дазор”, удзельнікі якога на восеньскіх канікулах праводзілі назіранне за птушкамі, арганізоўвалі віктарыны і конкурсы для вучняў пачатковых класаў.
Значная увага ў нашай школе ўдзяляецца патрыятычнаму выхаванню. Робіцца гэта на простых, звычайных рэчах, выкарыстоўваючы краязнаўчы падыход. Так падчас канікул вучні наведалі помнікі і брацкія воінскія пахаванні ў вёсках Александроўка, Будзіна, Заложжа і навялі там неабходны парадак. Таксама ў выніку тэматычнай, пазнавальнай экскурсіі ў школьны музей вучні даведаліся шмат цікавага аб гісторыі сваёй малой радзімы ў гады Вялікай Айчыннай вайны і ў мінулы час. Цікава прайшла экскурсія на «Замкавую гару», месца дзе ў XII-XVII стст. існаваў замак радзімічаў.
Яскрава прайшоў школьны конкурс, прысвечаны 125-годдзю з дня нараджэння Максіма Багдановіча “Мой Максім Багдановіч”, дзе вучні малявалі асацыятыўны партрэт пісьменніка, чыталі яго творы.
Алена РАГУЕВА,
намеснік дырэктара па выхаваўчай рабоце
Радамльскага ВПК дзіцячы сад – сярэдняя школа.
