Выхоўваць грамадзяніна, сем’яніна, прафесіянала

Пасяджэнне каардынацыйнага савета па распрацоўцы і рэалізацыі сумесных праграм супрацоўніцтва паміж органамі дзяржаўнага кіравання і Беларускай Праваслаўнай Царквой адбылося ў Полацку. Тэмай сустрэчы, якая праходзіла на базе сярэдняй школы № 18 імя Ефрасінні Полацкай, стала ўзаемадзеянне ўстаноў адукацыі Віцебскай вобласці з епархіяльнымі структурамі па выкананні Праграмы супрацоўніцтва паміж Міністэрствам адукацыі Рэспублікі Беларусь і Беларускай Праваслаўнай Царквой на 2015—2020 гады.

Як адзначыў у прывітальным слове міністр адукацыі Ігар Карпенка, перад педагагічнымі калектывамі ўстаноў адукацыі ставіцца задача выхавання маральна сталай, духоўна развітой асобы, здольнай усвядоміць сваю адказнасць за лёс Айчыны і свайго народа. Важным фактарам у рэалізацыі гэтай задачы з’яўляецца арганізацыя мэтанакіраванага і плённага ўзаемадзеяння ўстаноў адукацыі з Праваслаўнай царквой на аснове дзеючай праграмы супрацоўніцтва. Гэта магчыма толькі на аснове аб’яднання намаганняў органаў кіравання адукацыяй, устаноў адукацыі, царкоўных і грамадскіх арганізацый для выкарыстання патэнцыялу праваслаўных традыцый, каштоўнасцей у фарміраванні асобы чалавека, духоўна-маральным і патрыятычным выхаванні дзяцей і моладзі, карэкцыі паводзін і сацыяльнай падтрымцы дзяцей і падлеткаў з дэвіянтнымі паводзінамі і тых, хто апынуўся ў сацыяльна небяспечным становішчы. Мэтазгодна аб’ядноўваць намаганні ўстаноў адукацыі, рэлігійных і грамадскіх арганізацый для правядзення сумесных мерапрыемстваў па прафілактыцы правапарушэнняў, злачынстваў у падлеткавым і мала-дзёжным асяроддзі, суіцыдаў, ужывання наркатычных і псіхаактыўных рэчываў, а таксама працягваць практыку рэалізацыі сумесных праектаў, арыентаваных на развіццё дабрачыннасці, міласэрнасці, праваслаўнага краязнаўства, далучэння навучэнцаў да работы па вывучэнні, аднаўленні і ахове помнікаў гісторыі і культуры, догляду магіл і месцаў пахаванняў абаронцаў Айчыны. Прыярытэтам сумеснай дзейнасці ўстаноў адукацыі і Беларускай Праваслаўнай Царквы павінна стаць фарміраванне ў дзяцей і навучэнскай моладзі актыўнай жыццёвай пазіцыі, заснаванай на духоўна-маральным і прававым падмурку.

Акрэсліваючы задачы на перспектыву, Ігар Карпенка акцэнтаваў увагу на забеспячэнні рэалізацыі праграм факультатыўных заняткаў па фарміраванні духоўна-маральнай культуры, правядзенні тэматычных экскурсій, выкарыстоўваючы магчымасці шостага школьнага дня, неабходнасці абагульнення і распаўсюджвання эфектыўнага вопыту работы рэсурсных цэнтраў па духоўна-маральным выхаванні — такіх як сярэдняя школа № 18 Полацка. Трэба выпрацаваць эфектыўны механізм узаемадзеяння сацыяльна-педагагічных цэнтраў і царквы па прафілактыцы сямейнага няшчасця, прафілактыцы залежнасцей, дэвіянтных паводзін, прапагандзе здаровага ладу жыцця сярод непаўналетніх.

— Мы хочам перанесці некаторыя акцэнты ў дзейнасці адзначаных цэнтраў у плане пабудовы кропкава-індывідуальнай работы з падлеткамі, — расказаў міністр адукацыі. — Не заўсёды псіхолаг і сацыяльны педагог у школе могуць выйсці на гэты ўзровень, а дэвіянтныя паводзіны нярэдка патрабуюць менавіта індывідуальнай карэкцыйнай работы. Такую функцыю могуць выконваць сацыяльна-педагагічныя цэнтры пры адпаведнай падрыхтоўцы і навуковым суправаджэнні і ўдзеле ўсіх зацікаўленых — органаў кіравання адукацыяй, аховы правапарадку, медыцынскіх службаў. Запрашаю далучыцца да гэтай работы і нашу паважаную Праваслаўную царкву.

Ігар Карпенка павіншаваў Беларускую Праваслаўную Царкву з надыходзячым 1025-годдзем заснавання Полацкай епархіі, перадаў прывітальны адрас, выказаў словы глыбокай удзячнасці за нястомнае служэнне, якое дапамагае не толькі захаванню хрысціянскіх традыцый, але і ўмацоўвае палачан духоўна і маральна, выказаў упэўненасць у тым, што епархія будзе і далей садзейнічаць умацаванню адзінства і згоды ў грамадстве, дзейснага ўзаемадзеяння адукацыі і царквы ў выхаванні падрастаючага пакалення.

Мітрапаліт Мінскі і Заслаўскі Павел, Патрыяршы Экзарх усяе Беларусі, падкрэсліў невыпадковасць і сімвалічнасць таго, што пасяджэнне каардынацыйнага савета праходзіць ў самым старажытным горадзе Беларусі, асвечаным імем святой прападобнай Ефрасінні Полацкай. Полацк мае прамое дачыненне да найважнейшай юбілейнай даты гэтага года, 500-годдзя беларускага і ўсходнеславянскага кнігадрукавання: тое, што Францыск Скарына родам са слаўнага горада Полацка, — адзін з нямногіх бясспрэчных фактаў біяграфіі першадрукара.

— Традыцыйныя духоўна-маральныя каштоўнасці з’яўляюцца цвёрдай асновай грамадзянскага міру і згоды ў нашым грамадстве. Маладых людзей з самага ранняга ўзросту варта вучыць сапраўднай хрысціянскай любові, дабру і стваральнай працы, каб не дапусціць маральнага разбэшчвання, — адзначыў уладыка Павел. — У гэтай сферы мы бачым адну з асноўных задач супрацоўніцтва дзяржавы і царквы ў сферы адукацыі. Мы разам закліканы прывіваць дзецям і моладзі высокія ідэалы патрыятызму, любові да Айчыны, бацькоў, людзей, справядлівасці, міласэрнасці, суперажывання, гонару, абавязку і адказнасці.

Падрабязна аб узаемадзеянні Віцебскага аблвыканкама, органаў кіравання адукацыяй і ўстаноў адукацыі вобласці з епархіяльнымі структурамі па выкананні Праграмы супрацоўніцтва паміж Міністэрствам адукацыі і Беларускай Праваслаўнай Царквой на 2015—2020 гады расказалі начальнік упраўлення адукацыі Віцебскага аблвыканкама Дзмітрый Хома, архіепіскап Віцебскі і Аршанскі Дзімітрый і архіепіскап Полацкі і Глыбоцкі Феадосій. З прыкладамі станоўчага вопыту і эфектыўных мадэлей сумеснай работы сістэмы адукацыі і Праваслаўнай царквы выступілі загадчык аддзела краязнаўства і выхавання Рэспубліканскага цэнтра экалогіі і краязнаўства Аляксандра Кравец, дырэктар полацкай дзяржаўнай гімназіі № 1 Святлана Валюшкіна, галоўны спецыяліст аддзела адукацыі, спорту і турызму Полацкага райвыканкама Анжэла Валасевіч, настаяцель Свята-Хрыста-Раждзественскай царквы Брэста протаіерэй Яўген Ліхота, намеснік дырэктара па вучэбнай рабоце сярэдняй школы № 18 Полацка Ірына Недакунева і настаяцель Свята-Георгіеўскага храма Віцебска протаіерэй Мікалай Каляда.

— Галоўная задача сістэмы адукацыі — забеспячэнне комплекснага падыходу ў фарміраванні асобы маладога чалавека як грамадзяніна, сем’яніна і толькі потым — прафесіянала, — падводзячы вынікі пасяджэння, нагадаў Ігар Карпенка. — І менавіта тут значэнне нашай сумеснай работы з Праваслаўнай царквой цяжка пераацаніць. Таму што жывём на гэтай зямлі не толькі для таго, каб нашы дзеці жылі лепш, а самае важнае, каб яны былі лепшымі, чым мы. Калі атрымаецца гэта зрабіць, мы будзем моцным квітнеючым грамадствам.

Таццяна БОНДАРАВА.
Фота аўтара.

Пакінуць каментарый

Ваш электронны адрас не будзе апублікаваны. Абавязковыя палі пазначаны *