Сакрэтамі паспяховай падрыхтоўкi спартсменаў з карэспандэнтам “Настаўніцкай газеты” дзеляцца трэнеры самых папулярных секцый Чачэрскай дзіцяча-юнацкай спартыўнай школы — па футболе і дзюдо.
Ключ да поспеху
Перад бацькамі часта паўстае пытанне: чым заняць сына ці дачку? Відаў спорту шмат, але важна трапіць у рукі добрага трэнера. Можна шмат чаго дасягнуць, калі верыць у сябе і ў свайго настаўніка, лічаць у ДЮСШ, бо трэнер — ключ да поспеху, які можа дапамагчы вучню раскрыць яго талент.
У Чачэрскай ДЮСШ 296 юных спартсменаў паспяхова займаюцца футболам, баскетболам, вольнай барацьбой, лёгкай атлетыкай, плаваннем і дзюдо. Трэнеры-выкладчыкі робяць усё магчымае, каб спартыўныя дасягненні выхаванцаў заўсёды былі на вышыні.
У Чачэрскай дзіцяча-юнацкай спартыўнай школе самымі папулярнымі секцыямі сярод дзяцей з’яўляюцца дзюдо, футбол і вольная барацьба. На спаборніцтвах падлеткі паказваюць добрыя вынікі. Напрыклад, поспех спартсмена Андрэя Селіванава — кандыдата ў майстры спорту па дзюдо і па самба — лічыцца самым значным дасягненнем гэтага года.
— У Ізраілі на сусветным першынстве Еўропы па самба Андрэй Селіванаў заняў 2-е месца, — з гордасцю адзначае дырэктар ДЮСШ Аляксандр Цвірко. — Нашай спартсменцы Ганне Бураковай няма роўных на спаборніцтвах, дзяўчына — майстар спорту па дзюдо, член нацыянальнай зборнай Рэспублікі Беларусь. Сёстры Валерыя і Вераніка Максіменка — майстры спорту па дзюдо, выдатна валодаюць прыёмамі самага займальнага віду баявога мастацтва.
Гэтых спартсменаў падрыхтавала прафесiянал сваёй справы — трэнер-выкладчык па дзюдо Алена Картозія. Менавіта яна дапамагае выхаванцам спасцігаць філасофію адзінаборства, дасканала вывучаць прыёмы. Да сваіх падапечных трэнер ставіцца вельмі ўважліва і педантычна, яна шмат душэўнай энергіі ўкладвае ў кожнага вучня, наладжана работа і з бацькамі. Сярод усіх трэнераў ДЮСШ Алена Вітальеўна самая папулярная, да яе ў секцыю запісваюцца як хлопчыкі, так і дзяўчынкі.
Паводле слоў трэнера-выкладчыка, залог поспеху — у індывідуальным падыходзе і правільна складзенай праграме трэніровак:
— Самае галоўнае — быць на адной хвалі з дзецьмі. Смела магу сказаць, што я — фанат дзюдо і сапраўды не ўяўляю свайго жыцця без гэтага захапляльнага і відовішчнага віду спорту. Вядома, пачынаць спасцігаць асновы неабходна з базавых правіл, гэта дазваляе пазбегнуць памылак падчас бою і дае спартсмену магчымасць з часам выйсці на прафесійны ўзровень.
Спартыўная школа ў Чачэрску была адкрыта ў 1970 годзе і сёння славіцца сваімі поспехамі і дасягненнямі. Тут рыхтуюць выдатных спартсменаў, якія пакараюць вяршыні п’едэсталаў.
Аўчынка вартая вырабу
Школьнікамі футбол успрымаецца як забаўка. Для трэнера Міхася Канцавога ў прыярытэце любоў дзяцей да футбола. Калі яны трапляюць да яго на заняткі, то не толькі развіваюць каардынацыю рухаў, сілу, вынослівасць і ўменне ўзаемадзейнічаць у камандзе, але і забываюць аб сваіх гаджэтах. Акрамя таго, яго падапечныя з зайздроснай рэгулярнасцю трапляюць у склад нацыянальнай зборнай па футболе. Міхаіл Валер’евіч працуе трэнерам у ДЮСШ больш за 10 гадоў і за гэты час многім таленавітым выхаванцам дапамог ажыццявіць мару, раскрыўшы іх патэнцыял. Напрыклад, Уладзіслаў Балотнікаў, Мікіта Казлоў падпісалі кантракты з ФК “Белшына”, хлопцы гуляюць у асноўным складзе футбольнай каманды. Уладзіслаў Балотнікаў задзейнічаны ў нацыянальнай зборнай Беларусі па футболе U-19, яго брат Кірыл, а таксама Ілья Семінар сёлета падпісалі кантракты з ФК “Белшына”, гуляюць за дубль “Белшына”. 14-гадовага Анатоля Ястачкіна лічаць вельмі перспектыўным футбалістам, цэнтральны нападаючы зараз у складзе каманды ФК “Дынама-Мінск”. Аматары футбола гавораць, што такіх юных і таленавітых гульцоў яшчэ не сустракалі.
Несумненна, высокіх вынікаў хлопцы дабіліся дзякуючы зладжанай рабоце ў тандэме з трэнерам, які ўсіх зараджае сваёй актыўнасцю, ведае кожнага свайго калегу і перспектыўнага гульца рэгіёна і краіны, яму давяраюць і заўсёды звяртаюцца па дапамогу. Яго фішка ў адкрытасці, шчырасці і ўпэўненасці ў тым, што ён робіць. Разам з дзецьмі Міхаіл Валер’евіч удзельнічае ў трэніровачным працэсе, каб выхаванцы хутчэй засвойвалі інфармацыю.
— Самае галоўнае ў маёй рабоце — любіць дзяцей і выхоўваць у іх дысцыпліну, прывіваць любоў да спорту, вучыць паважаць старэйшых і быць дастойнымі грамадзянамі нашай краіны, — падкрэслівае Міхаіл Канцавы. — Мне падабаецца адчуваць, што я ўсё зрабіў якасна. Перакананы, што вучыцца можна бясконца і ніколі не варта спыняцца на дасягнутым.
Алена КАСЬЯН-ПАЎЛЯНКОВА
Фота з архіва Чачэрскай ДЮСШ
