На працягу 10 гадоў у Барысаўскім дзяржаўным каледжы працуе рэсурсны цэнтр вытворчага навучання па спецыяльнасці “Швачка”, дзе прафесійныя навыкі атрымліваюць навучэнкі аднапрофільных устаноў адукацыі Мінскай вобласці.
Менавіта Барысаўскі дзяржаўны каледж — адна з галоўных устаноў адукацыі, якая рыхтуе спецыялістаў для вядомых у краіне прадпрыемстваў па пашыве адзення. У рэсурсным цэнтры Барысаўскага дзяржаўнага каледжа будучыя спецыялісты вучацца працаваць на сучасным швейным абсталяванні, а таксама набываюць практычныя навыкі работы на ўніверсальных і спецыялізаваных швейных машынах і паўаўтаматах.
“Сёння Барысаўскі дзяржаўны каледж — гэта шматпрофільная ўстанова, дзе рэалізуюцца адукацыйныя праграмы прафесійна-тэхнічнай і сярэдняй спецыяльнай адукацыі (дзённая і завочная форма), а таксама праграмы дадатковай адукацыі дарослых, — прэзентавала каледж намеснік дырэктара па вучэбна-выхаваўчай рабоце Лілія Эдуардаўна Чэча. — За 5 апошніх гадоў наш каледж падрыхтаваў і выпусціў больш за 5000 рабочых і спецыялістаў. На дзённай і завочнай формах навучання адукацыю атрымліваюць 1903 чалавекі. У структуры каледжа сёння працуюць 10 аддзяленняў, якія аб’ядноўваюць спецыяльнасці аднаго профілю”.
У БДК рыхтуюць кадры для арганізацый аграпрамысловага комплексу, прадпрыемстваў машынабудаўнічай галіны, аб’ектаў гандлю, грамадскага харчавання і бытавога абслугоўвання насельніцтва, а таксама для ўстаноў дашкольнай і агульнай сярэдняй адукацыі. “Для забеспячэння адукацыйнага працэсу ў каледжы ёсць неабходная матэрыяльна-тэхнічная база, якая адпавядае вучэбным планам і праграмам па ўсіх спецыяльнасцях, — сказала Л.Э.Чэча. — Акрамя гэтага, у каледжы функцыянуюць 33 лабараторыі, вучэбна-вытворчыя майстэрні, 4 спартыўныя і 3 актавыя залы, 4 сталовыя, 4 інтэрнаты, медпункт, 4 бібліятэкі, аўтадром і трактарадром”.
У БДК арганізавана прафесійная падрыхтоўка навучэнцаў 10-х класаў у рамках вучэбнага прадмета “Працоўнае навучанне”. Для навучання дзяцей выкарыстоўваецца III мадэль рэалізацыі адукацыйнай праграмы прафесійнай падрыхтоўкі рабочых. “Штогод у нас фарміруюцца 4 групы з навучэнцаў пяці школ горада, — працягвае расказваць Лілія Эдуардаўна. — Наша ўстанова адукацыі пастаянна праводзіць аналіз рынку працы. Мы сочым за тым, у якіх кадрах і ў спецыялістах якіх узроўняў кваліфікацыі мае патрэбу наш раён. Так, у Барысаўскім раёне нашымі заказчыкамі кадраў з’яўляюцца больш за 170 прадпрыемстваў, арганізацый і ўстаноў. Таксама нашы выпускнікі працуюць у многіх структурах Мінскай вобласці і краіны. Работадаўцамі для нашых маладых спецыялістаў з’яўляюцца ААТ “Світанак”, ААТ “БелАЗ”, СЗАТ “Белджы”, ААТ “Амкадор”, ААТ “Барысаўскі завод “Аўтагідраўзмацняльнік”, ААТ “140 рамонтны завод”, упраўленне па адукацыі Барысаўскага райвыканкама і інш. Дарэчы, прадстаўнікі прадпрыемстваў і арганізацый прымаюць удзел у выніковай атэстацыі выпускнікоў, у прысваенні кваліфікацыі будучым рабочым, а таксама ў правядзенні конкурсаў прафесійнага майстэрства і прафарыентацыйных мерапрыемствах”.
Навучэнцы Барысаўскага дзяржаўнага каледжа штогод прымаюць удзел у міжнародных маладзёжных форумах і мерапрыемствах па прафесійнай адукацыі, у інтэрнэт-канферэнцыях, стажыроўках педагагічных работнікаў і навучэнцаў. Дарэчы, у мінулым навучальным годзе каледж сумесна з Дашкольным цэнтрам развіцця дзіцяці Барысава пачаў рэалізацыю праекта па ранняй прафарыентацыі BabySkills. Мэта ініцыятывы — фарміраванне ў дашкольнікаў эмацыянальных адносін да свету прафесій. Акрамя гэтага, праект дазваляе малышам паспрабаваць свае сілы ў даступных відах дзейнасці.
“Ранняя прафарыентацыя, якая ахоплівае дзяцей дашкольнага і малодшага школьнага ўзросту, накіравана на развіццё цікавасці да прафесій, — пацвярджае прадстаўнік каледжа. — Таксама BabySkills дапамагае развіваць у дзетак творчыя здольнасці, эстэтычны густ, фарміруе экалагічную культуру і г.д. Што тычыцца прафарыентацыі навучэнцаў каледжа, то ва ўстанове працуе цэнтр “Прафкансультант”. У ім нашы спецыялісты аказваюць дапамогу не толькі абітурыентам, але і іх бацькам у вырашэнні праблем, звязаных з прафесійным вызначэннем іх дзяцей. Таксама цэнтр дапамагае разабрацца з выбранымі спецыяльнасцямі: кім можна стаць, дзе можна будзе працаваць, калі выбраць тую ці іншую спецыяльнасць. Асаблівую ролю ў прафесійнай арыентацыі навучэнцаў адыгрывае музей гісторыі развіцця прафесійнай адукацыі Мінскай вобласці. У зале прафарыентацыі прадстаўлены матэрыялы, якія дапамагаюць павысіць узровень ведаў па тым кірунку, які выбраў навучэнец. Таксама ў музеі можна даведацца пра сацыяльную значнасць рабочых прафесій. Дарэчы, падчас правядзення дзён адкрытых дзвярэй мы стараемся даступна расказаць сваім будучым навучэнцам, кім яны змогуць стаць, калі прыйдуць да нас вучыцца. Хочацца, каб абітурыенты ўсвядомлена выбіралі прафесію і не шкадавалі аб сваім выбары”.
Наталля САХНО.
